ວັນທີ 22-24 ມັງກອນ 2024 ນີ້ ສະພາປະຊາຊົນແຂວງຫລວງນໍ້າທາ ໄດ້ລົງພົບປະຢ້ຽມຢາມ ແລະ ເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງນາແລ  ແຂວງຫລວງນໍ້າທາ, ລວມທັງໝົດ 3 ຈຸດຄື; ສະໂມສອນເມືອງ, ບ້ານສາງແຫນ ແລະ ບ້ານລ້ອງແຄນ ນຳໂດຍ ທ່ານ ພົນຕີ ປະລິນຍາເອກ ວົງສັກ ພັນທະວົງ ຄະນະປະຈຳສະພາແຫ່ງຊາດ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນໍ້າທາ ແລະ ທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນາແລ ແລະ ພະແນກການທີ່ກ່ຽວຂ້ອງຂອງແຂວງຄື ພະແນກໂຍທາທິການ ແລະ ຂົນສົ່ງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກແຜນການ ແລະ ການລົງທຶນ,ໃຫ້ກຽດເຂົ້າຮ່ວມຮັບຟັງມີ, ຄະນະນຳຂອງເມືອງ, ຫົວໜ້າ, ຮອງຫົວໜ້າຫ້ອງການ,  ພະນັກງານລັດຖະກອນອ້ອມຂ້າງເມືອງ, ສອງກຳລັງປ້ອງກັນຊາດ-ປ້ອງກັນຄວາມສະຫງົບ, ຄະນະພັກຮາກຖານ, ອໍານາດການປົກຄອງບ້ານ ແລະ ປະຊາຊົນເຂົ້າຮ່ວມທັງໝົດ 400 ກວ່າທ່ານ.

ໃນໂອກາດນີ້ໄດ້ຮັບຟັງການເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ກອງປະຊຸມຄັ້ງນີ້; ໄດ້ພິຈາລະນາ ແລະ ຮັບຮອງເອົາຫຼາຍບັນຫາພື້ນຖານສຳຄັນຂອງປະເທດຊາດ ຄື ພິຈາລະນາ, ຮັບຮອງເອົາບົດລາຍງານຂອງລັດຖະບານກ່ຽວກັບການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ກາງສະໄໝ 5 ປີ ຄັ້ງທີ  IX ( 2021-2025 ); ບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ, ແຜນເງິນຕາ ກາງສະໄໝ ( 2021-2025 ) ແລະ ທິດທາງແຜນການທ້າຍສະໄໝ ຮອດປີ 2025, ການສະຫຼຸບຂາດຕົວຂອງການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022, ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ແຜນເງິນຕາ ປະຈໍາປີ 2023, ແຜນງົບປະມານແຫ່ງລັດ ປະຈໍາປີ 2024 ແລະ ແຜນເງິນຕາ 2024 ຂອງລັດຖະບານ; ບົດລາຍງານຂອງອົງການກວດກາ ແລະ ກວດສອບແຫ່ງລັດ ກ່ຽວກັບການຈັດຕັ້ງ ປະຕິບັດແຜນການເຄື່ອນໄຫວວຽກງານກາງສະໄໝ 5 ປີ ( 2021-2025 ), ທິດທາງແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການເຄື່ອນໄຫວວຽກງານ ປະຈໍາປີ 2024 ອົງການກວດສອບແຫ່ງລັດ; ຮັບຮອງເອົາ ຜົນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຂອງລັດຖະບານໃນໄລຍະ 3 ປີ ( 2021-2023 ); ຮັບຮອງເອົາຜົນຂອງການປະເມີນກົດໝາຍ ຂົງເຂດປ້ອງກັນຊາດບປ້ອງກັນຄວາມສະຫງົບ ຈໍານວນ 3 ສະບັບ; ຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ 2 ປີເຄິ່ງ ( 2021-2023 ) ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ບົດລາຍງານ ການຈັດຕັ້ງປະຕິບັດເຄື່ອນໄຫວວຽກງານ ກາງສະໄໝ 5 ປີ (2021-2025 ) ແລະ ທິດທາງແຜນການທ້າຍສະໄໝ ຮອດປີ 2025 ການຈັດຕັ້ງປະຕິບັດແຜນການປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງສະພາແຫ່ງຊາດ ຊຸດທີ IX;

ພ້ອມດຽວກັນນັ້ນໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຫຼວງນໍ້າທາ, ເຊີ່ງໄດ້ພິຈາລະນາຮັບຮອງເອົາບັນຫາສໍາຄັນຂອງແຂວງດັ່ງນີ້: ພິຈາລະນາ, ຮັບຮອງ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ບົດລາຍງານ ຂອງອົງການກວດກາລັດແຂວງ ແລະ ອົງການກວດສອບແຫ່ງລັດປະຈໍາພາກເໜືອ; ບົດລາຍງານ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ບົດສະຫຼຸບການ ຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການ ປະຈໍາປີ 2024 ຂອງສະພາປະຊາ ຊົນແຂວງ; ຮັບຮອງເອົາ ຂໍ້ຕົກລົງຂອງເຈົ້າ ແຂວງວ່າດ້ວຍ ການຄຸ້ມຄອງການຈັດງານ ແລະ ງານບຸນປະເພນີຕ່າງໆຢູ່ບັນດາເມືອງ ແລະ ໄດ້ຮັບຟັງບົດລາຍງານການຈັດຕັ້ງປະຕິບັດ ສອງວາລະແຫ່ງຊາດຢູ່ແຂວງຫຼວງນໍ້າທາ

ໃນໂອກາດລົງພົບປະຢ້ຽມຢາມປະຊາຊົນໃນຄັ້ງນີ້ໄດ້ນຳເອົາວັດຖຸປັດໄຈ ເປັນຕົ້ນແມ່ນເຄື່ອງອຸປະໂພກ, ບໍລິໂພກ, ອຸປະກອນການຮຽນ,ອຸປະກອນກິລາ ແລະ ເຄື່ອງໃຊ້ທີ່ຈຳເປັນ ມອບໃຫ້ບ້ານສາງແຫນ, ບ້ານລ້ອງແຄນ,ບ້ານມົກພາດ,  ໂຮງຮຽນຊົນເຜົ່າ, ໂຮງຮຽນບ້ານສາງແຫນ, ໂຮງຮຽນບ້ານລ້ອງແຄນ,  ແລະ ສຸກສາລາບ້ານມົກຈອດ ເຊິ່ງປະກອບມີ ໂທລະໂຄ່ງ 9 ໜ່ວຍ, ປື້ມຂຽນ 900 ຫົວ, ບິກຂຽນ 600 ກ້ານ, ສໍດໍາ 864 ກ້ານ, ບານເຕະ 6 ໜ່ວຍ, ບານສົ່ງ 6 ໜ່ວຍ, ກະຕໍ້ 6 ໜ່ວຍ, ເຂົ້າສານ 100 ກິໂລ; ຖ້ວຍ  60ໃບ;ຈານ  120 ໃບ; ⁠ບ່ວງ 142ກ້ານ;ໝໍ້ໜຶ່ງເຂົ້າ 5ຊຸດ ແລະ ເງີນສົດຈໍານວນໜື່ງ ລວມມູນຄ່າທັງໝົດ 50 ລ້ານກວ່າກີບ.

ໂດຍ ນາງ ອຳພອນ ສີປະເສີດ