ວັນທີ 15-16 ມັງກອນ 2024 ນີ້ ສະພາປະຊາຊົນແຂວງຫລວງນໍ້າທາ ໄດ້ລົງພົບປະຢ້ຽມຢາມ ແລະ ເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີII ຢູ່ເມືອງວຽງພູຄາ  ແຂວງຫລວງນໍ້າທາ, ລວມທັງໝົດ 3 ຈຸດຄື; ສະໂມສອນເມືອງ, ບ້ານຜາແດງ ແລະ ບ້ານນ້ຳມາງ ນຳໂດຍ ທ່ານ ປະລິຍາເອກ ພົນຈັດຕະວາ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3 ພ້ອມດ້ວຍບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ, ໃຫ້ກຽດເຂົ້າຮ່ວມຮັບຟັງມີ, ຄະນະນຳຂອງເມືອງ, ຫົວໜ້າ, ຮອງຫົວໜ້າຫ້ອງການ, ອະດີດການນໍາຂອງເມືອງ, ອະດີດພະນັກງານປະຕິວັດອາວຸໂສ, ບຳນານ, ພະນັກງານລັດຖະກອນອ້ອມຂ້າງເມືອງ, ຄະນະພັກຮາກຖານ, ອໍານາດການປົັນກຄອງບ້ານ ແລະ ປະຊາຊົນເຂົ້າຮ່ວມ 200 ກວ່າທ່ານ.

​          ໃນໂອກາດນີ້ໄດ້ຮັບຟັງການເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ກອງປະຊຸມຄັ້ງນີ້; ໄດ້ພິຈາລະນາ ແລະ ຮັບຮອງເອົາຫຼາຍບັນຫາພື້ນຖານສຳຄັນຂອງປະເທດຊາດ ຄື ພິຈາລະນາ, ຮັບຮອງເອົາບົດລາຍງານຂອງລັດຖະບານກ່ຽວກັບການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ກາງສະໄໝ 5 ປີ ຄັ້ງທີ  IX ( 2021-2025 ); ບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ, ແຜນເງິນຕາ ກາງສະໄໝ ( 2021-2025 ) ແລະ ທິດທາງແຜນການທ້າຍສະໄໝ ຮອດປີ 2025, ການສະຫຼຸບຂາດຕົວຂອງການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022, ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ແຜນເງິນຕາ ປະຈໍາປີ 2023, ແຜນງົບປະມານແຫ່ງລັດ ປະຈໍາປີ 2024 ແລະ ແຜນເງິນຕາ 2024 ຂອງລັດຖະບານ; ບົດລາຍງານຂອງອົງການກວດກາ ແລະ ກວດສອບແຫ່ງລັດ ກ່ຽວກັບການຈັດຕັ້ງ ປະຕິບັດແຜນການເຄື່ອນໄຫວວຽກງານກາງສະໄໝ 5 ປີ ( 2021-2025 ), ທິດທາງແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການເຄື່ອນໄຫວວຽກງານ ປະຈໍາປີ 2024 ອົງການກວດສອບແຫ່ງລັດ; ຮັບຮອງເອົາ ຜົນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຂອງລັດຖະບານໃນໄລຍະ 3 ປີ ( 2021-2023 ); ຮັບຮອງເອົາຜົນຂອງການປະເມີນກົດໝາຍ ຂົງເຂດປ້ອງກັນຊາດບປ້ອງກັນຄວາມສະຫງົບ ຈໍານວນ 3 ສະບັບ; ຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ 2 ປີເຄິ່ງ ( 2021-2023 ) ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ບົດລາຍງານ ການຈັດຕັ້ງປະຕິບັດເຄື່ອນໄຫວວຽກງານ ກາງສະໄໝ 5 ປີ (2021-2025 ) ແລະ ທິດທາງແຜນການທ້າຍສະໄໝ ຮອດປີ 2025 ການຈັດຕັ້ງປະຕິບັດແຜນການປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງສະພາແຫ່ງຊາດ ຊຸດທີ IX;

ພ້ອມດຽວກັນນີ້ກໍ່ໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ6 ຂອງສະພາປະຊາຊົນແຂວງຫຼວງນໍ້າທາ, ເຊີ່ງໄດ້ພິຈາລະນາຮັບຮອງເອົາບັນຫາສໍາຄັນຂອງແຂວງດັ່ງນີ້: ພິຈາລະນາ, ຮັບຮອງ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ບົດລາຍງານ ຂອງອົງການກວດກາລັດແຂວງ ແລະ ອົງການກວດສອບແຫ່ງລັດປະຈໍາພາກເໜືອ; ບົດລາຍງານ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ບົດສະຫຼຸບການ ຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການ ປະຈໍາປີ 2024 ຂອງສະພາປະຊາ ຊົນແຂວງ; ຮັບຮອງເອົາ ຂໍ້ຕົກລົງຂອງເຈົ້າ ແຂວງວ່າດ້ວຍ ການຄຸ້ມຄອງການຈັດງານ ແລະ ງານບຸນປະເພນີຕ່າງໆຢູ່ບັນດາເມືອງ ແລະ ໄດ້ຮັບຟັງບົດລາຍງານການຈັດຕັ້ງປະຕິບັດ ສອງວາລະແຫ່ງຊາດຢູ່ແຂວງຫຼວງນໍ້າທາ.

ໃນການລົງພົບປະຢ້ຽມຢາມຄັ້ງນີ້; ທ່ານ ປະລິຍາເອກ ພົນຈັດຕະວາ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3  ກໍ່ໄດ້ມີຄຳເຫັນໂອ້ລົມ ແລະ ເນັ້ນໜັກບາງບັນຫາເປັນຕົ້ນແມ່ນດ້ານການເມືອງ-ແນວຄິດ, ໃຫ້ມີຄວາມອຸ່ນອຽງທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ, ເພີ່ມທະວີຄວາມສາມັກຄີປອງດອງໃຫ້ເປັນປືກແຜນແໜ້ນໜາຕໍ່ການປົກປັກຮັກສາ ແລະ ສ້າງສາພັດທະນາເສດຖະກິດຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ເພີ່ມທະວີຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ,ເພື່ອໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເປັນເຈົ້າໃນການເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ.