ຕອນເຊົ້າວັນທີ 7 ສິງຫາ 2023 ນີ້ ທ່ານ ພົນຕີ ປອ ວົງສັກ ພັນທະວົງ, ກໍາມະການຄະນະປະຈໍາສະພາແຫ່ງຊາດປະທານກໍາມາທິການ ປກຊ-ປກສ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ພ້ອມດ້ວຍຄະນະ ໄດ້ລົງເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນ ເທື່ອທີ5 ຂອງສະພາປະຊາຊົນແຂວງ ຢູ່ສະໂມສອນກອງບັນຊາການທະຫານແຂວງ ໃຫ້ກຽດເຂົ້າຮ່ວມຂອງທ່ານ ພົນຈັດຕະວາ ອິ່ນແກ້ວ ມະນີຈັນ ຄະນະປະຈຳພັກແຂວງ ຫົວໜ້າກອງບັນຊາການທະຫານແຂວງ ມີສະຫະພັນນັກຮົບເກົ່າ, ຫົວໜ້າຄະນະກຳມາທິການ ປກຊ-ປກສ ແຂວງ, ຫົວໜ້າ, ຮອງຫົວໜ້າພະແນກ ປກຊ, ປກສ ແຂວງ ພ້ອມດ້ວຍນາຍ ແລະ ພົນທະຫານ, ນາຍ ແລະ ພົນຕຳຫລວດ ແຕ່ຊັ້ນພັນໂທ ເຂົ້າຮ່ວມ 158 ສະຫາຍ, ຍິງ 19 ສະຫາຍ.
ກອງປະຊຸມທ່ານ ພົນຕີ ປອ ວົງສັກ ພັນທະວົງ, ກໍາມະການຄະນະປະຈໍາສະພາແຫ່ງຊາດປະທານກໍາມາທິການ ປກຊ-ປກສ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ໄດ້ເຜີຍແຜ່ເອກະສານເນື້ອໃນກອງປະຊຸມສະໄໝສາມັນເທື່ອເທື່ອທີ5 ຂອງສະພາແຫ່ງຊາດຊຸດທີ9 ຊຶ່ງກອງປະຊຸມສະພາແຫ່ງຊາດໄດ້ຄົ້ນຄວ້າ, ພິຈາລະນາເອົາບັນຫາສຳຄັນຂອງຊາດເປັນຕົ້ນ;ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນ ແລະ ແຜນການ 6 ເດືອນທ້າຍປີ 2023; ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນ ປີ 2023; ບົດລາຍງານຂອງລັດຖະບານ ກ່ຽວກັບວິໄສທັດຮອດປີ 2040 ແລະ ຍຸດທະສາດການຄຸ້ມຄອງນໍ້າ ແລະ ຊັບພະຍາກອນນໍ້າແຫ່ງຊາດ ຮອດປີ 2030; ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດຍຸດທະສາດການປົກປ້ອງສັງຄົມ ແຫ່ງຊາດ (2020-2030); ຮັບຮອງເອົາວຽກງານສ້າງ ແລະ ປັບປຸງກົດໝາຍ 10 ສະບັບ ແລະ ການຈັດຕັ້ງປະຕິບັດກົດໝາຍ 1 ສະບັບ; ຮັບຮອງເອົາຜົນການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທໍາ 4 ສະບັບ; ວຽກງານ ສານປະຊາຊົນສູງສຸດ ແລະ ໄອຍະການປະຊາຊົນສູງສຸດ ໄດ້ຮັບຮອງເອົາການແຕ່ງຕັ້ງສະມາຊິກຜູ້ພິພາກສາຂອງສານປະຊາຊົນສູງສຸດ ສະບັບເລກທີ 102/ສພຊ, ລົງວັນທີ 18 ກໍລະກົດ 2023 ແລະ ໄດ້ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 4 ຫາ ເທື່ອທີ 5 ແລະ ທິດທາງແຜນການຮອດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX;
ພ້ອມດຽວກັນ ທ່ານຍ ກົງເພັດ ແກ້ວບົວພາ ກໍາມະການພັກແຂວງ ຮອງປະທານສະພາປະຊາຊົນແຂວງ ຍັງໄດ້ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ5 ຂອງສະພາປະຊາຊົນແຂວງ ກອງປະຊຸມໄດ້ພິຈາລະນາເອົາບັນຫາສຳຄັນພື້ນຖານຂອງແຂວງຄື: ມະຕິ ກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງອົງການປົກຄອງແຂວງກ່ຽວກັບ ການຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງຫຼວງນ້ຳທາ; ຮັບຮອງເອົາຜົນຂອງການປະເມີນຄວາມໄວ້ວາງໃຈຂອງບຸກຄະລາກອນ ທີ່ສະພາປະຊາຊົນແຂວງເລືອກຕັ້ງ, ຮັບຮອງເອົາການແຕ່ງຕັ້ງ; ບົດລາຍງານການເຄ່ືິ່ອນໄຫວວຽກງານ ກາງສະໄໝ (2021-2023), 06 ເດືອນຕົໍ້ນປີ 2023 ແລະ ທິດທາງແຜນການເຄືອນໄຫວວຽກງານ ທ້າຍສະໄໝ (2023-2025), 06 ເດືອນທ້າຍປີ2023 ຂອງ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ຮັບຮອງເອົາບົດສະຫຼຸບ ການຈັດຕັ້ງປະຕິບັດແຜນການເຄື່ອນໄຫວ ກາງສະໄໝ 5 ປີ (2021-2023); ໄລຍະແຕ່ກອງ ປະຊຸມສະໄໝສາມັນເທື່ອທີ 4 ຫາກອງປະຊຸມສະໄໝສາມັນເທື່ອທີ5 ແລະ ທິດທາງແຜນການທ້າຍສະໄໝ (2023-2025); ແຜນການຮອດກອງ ປະຊຸມສະໄໝສາມັນເທື່ອທີ6 ຂອງສະພາປະຊາຊົນແຂວງຫຼວງນ້ຳທາ ຊຸດທີ II; ຮັບຟັງບົດລາຍງານການຈັດຕັ້ງປະຕິບັດກອງທຶນປະກັນສຸຂະພາບແຫ່ງຊາດ ຂອງແຂວງຫຼວງນໍ້າທາ ແລະ ຮັບຟັງບົດລາຍງານກ່ຽວກັບການຄຸ້ມຄອງຮ້ານແລກປ່ຽນເງິນຕາ ແລະ ການແລກປ່ຽນເງິນຕາຕ່າງປະເທດ
ໂອກາດນີ້ຍັງໄດ້ຮັບຟັງຄຳໂອລົມຂອງທ່ານ ພົນຕີ ປອ ວົງສັກ ພັນທະວົງ, ກໍາມະການຄະນະປະຈໍາສະພາແຫ່ງຊາດປະທານກໍາມາທິການ ປກຊ-ປກສ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທັງ 2 ກຳລັງທີ່ຍາດມາໄດ້ ແລະ ຮຽກຮ້ອງໃຫ້ທັງ 2 ກຳລັງ ເອົາໃຈໃສ່ຕໍ່ລະບຽບວິໄນຢ່າງເຂັ້ມງວດ, ມີສະຕິຕໍ່ກົນອຸບາຍ, ປະກົດການຫຍໍ້ທໍ້ທີ່ເກີດຂື້ນໃນສັງຄົມ, ເຝິກອົບຮົມຍຸດທະວິທີໃຫ້ຄ່ອງແຄ້ວ,ຮັກສາມູນເຊື້ອຄວາມສາມັກຄີ 2 ກຳລັງ ກັບປະຊາຊົນໃຫ້ແໜ້ນແຟ້ນ, ໃຫ້ມີນຳໃຈຮັກຊາດຮັກປະຊາຊົນຢ່າງແທ້ຈິງ ພ້ອມທັງສ້າງຄວາມເຂັ້ມແຂງໃຫ້ຕົນເອງກຸ້ມຕົນເອງ.
ພາບ ແລະ ຂ່າວໂດຍ ວັນນີ ແຝງບົວພາ