ຕອນເຊົ້າວັນທີ 31 ກໍລະກົດ 2023 ນີ້ ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງຫລວງນ້ຳທາ ໄດ້ຖະແຫລງຂ່າວກ່ຽວກັບການເປີດກອງປະຊຸມ ສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ຂຶ້ນຢ່າງເປັນທາງການ ທີ່ຫ້ອງປະຊຸມສະພາປະຊາຊົນແຂວງ;ທ່ານໄດ້ກ່າວວ່າ ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ຈະໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 2 ສິງຫາ – ວັນທີ 4 ສິງຫາ 2023 ນີ້ ຊຶ່ງກອງປະຊຸມດັ່ງກ່າວ ຈະໄດ້ພິຈາລະນາ, ຮັບຮອງເອົາບັນຫາສຳຄັນຂອງແຂວງຄື:

ພິຈາລະນາ,ຮັບຮອງເອົາບົດລາຍງານ ຂອງທ່ານ ເຈົ້າແຂວງ ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ກ່ຽວກັບບັນຫາທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະກາງສະໄໝ(202-2023); ບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະກາງສະໄໝ (2021-2023), 6 ເດືອນຕົ້ນປີ ແລະ ແຜນການທ້າຍສະໄໝ (2023-2025), 6 ເດືອນທ້າຍປີ 2023 ຂອງແຂວງ; ບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດ ໄລຍະກາງສະໄໝ (2021-2023), 6 ເດືອນຕົ້ນປີ ແລະ ແຜນການທ້າຍສະໄໝ (2023-2025), 6 ເດືອນທ້າຍປີ 2023 ຂອງແຂວງ; ຮັບຟັງບົດລາຍງານການຈັດຕັ້ງປະຕິບັດກອງທຶນປະກັນສຸຂະພາບແຫ່ງຊາດ ຂອງແຂວງຫຼວງນໍ້າທາ; ຮັບຟັງບົດລາຍງານກ່ຽວກັບການຄຸ້ມຄອງຮ້ານແລກປ່ຽນເງິນຕາ ແລະ ການແລກປ່ຽນເງິນຕາຕ່າງປະເທດ; ພິຈາລະນາ,ຮັບຮອງເອົາວຽກງານ ອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝ (2021-2023), 6 ເດືອນຕົ້ນປີ ແລະ ແຜນການ ທ້າຍສະໄໝ (2023-2025), 6 ເດືອນທ້າຍປີ 2023; ພິຈາລະນາ,ຮັບຮອງເອົາວຽກງານ ສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝ (2021-2023), 6 ເດືອນຕົ້ນປີ ແລະ ແຜນການ ທ້າຍສະໄໝ (2023-2025), 6 ເດືອນທ້າຍປີ 2023; ພິຈາລະນາ, ຮັບຮອງເອົາການປະເມີນບຸກຄະລາກອນ ທີ່ສະພາປະຊາຊົນແຂວງ ເລືອກຕັ້ງ,  ຮັບຮອງເອົາການແຕ່ງຕັ້ງ ແລະ ວຽກງານຂອງສະພາປະຊາຊົນແຂວງ; ພິຈາລະນາ,ຮັບຮອງເອົາບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ (2021-2023); ການເຄື່ອນໄຫວວຽກງານ ລະຫວ່າງສອງກອງປະຊຸມຜ່ານມາ ແລະ ແຜນການທ້າຍສະໄໝ (2023-2025) ແລະ ແຜນຮອດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ.

ຂ່າວ ວັນນີ ແຝງບົວວັນ