ໃນວັນທີ 9 ທັນວາ 2022 ທີ່ສະໜາມກິລາພູເບຍ ແຂວງຄໍາມ່ວນ ສະພາປະຊາຊົນແຂວງຄໍາມ່ວນ ສ້າງກິດຈະກຳແຂ່ງຂັນກິລາເຕະບານມິດຕະພາບຮ່ວມກັບ ສະພາປະຊາຊົນແຂວງສະຫັວນນະເຂດ ໂດຍການເຂົ້າຮ່ວມຂອງ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ທ່ານ ບົວລົມ ອິດທິທະວົງ ຮອງເລຂາທິການສະພາປະຊາຊົນແຂວງສະຫັວນນະເຂດ ແລະ ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ, ຕະຫຼອດຮອດພະນັກງານສະພາປະຊາຊົນແຂວງຂອງສອງແຂວງເຂົ້າຮ່ວມ.

ຈຸດປະສົງຂອງການສ້າງຂະບວນການຄັ້ງນີ້: ກໍ່ເພື່ອສະເຫຼີມສະຫຼອງວັນສຳຄັນຂອງຊາດກໍ່ຄື ວັນຊາດທີ 2 ທັນວາ ຄົບຮອບ 47 ປີ ( ວັນທີ 2 ທັນວາ 1975 – ວັນທີ 2 ທັນວາ 2022 ) ແລະ ວັນຄ້າຍວັນເກີດປະທານໄກສອນພົມວິຫານ ຄົບຮອບ 102 ປີ ( ວັນທີ 13 ທັນວາ ປີ 1920 – ວັນທີ 13 ທັນວາ ປີ 2022 ), ໃຫ້ມີບັນຍາກາດທີຟົດຟຶ້ນ, ທັງເປັນການສ້າງຄວາມສາມັກຄີຮັກແພງໃນຖັນແຖວພະນັກງານ ລະຫວ່າງ ສະພາປະຊາຊົນແຂວງຄໍາມ່ວນ ກັບ ສະພາປະຊາຊົນແຂວງສະຫັວນນະເຂດ ໃຫ້ໜັກແໜ້ນ, ເລິກເຊິ່ງກ້າວໄປເຖິງການພົວພັນປະສານງານ ແລະ ແລກປ່ຽນບັນດາວຽກງານໃນການຈັດຕັ້ງປະຕິບັດໜ້າທີໃນການເປັນເສນາທິການທີ່ດີ.