ຕອນເຊົ້າຂອງວັນທີ 2 ເມສາ 2024 ນີ້ ສະພາປະຊາຊົນແຂວງຫລວງນໍ້າ ຮ່ວມກັບສະພາປະຊາຊົນແຂວງສາລະວັນ ໄດ້ເຄື່ອນໄຫວພົບປະແລກປ່ຽນບົດຮຽນຢູ່ດ່ານສາກົນບໍ່ເຕ່ນ ແຂວງຫຼວງນໍ້າທາ ນໍາໂດຍທ່ານ ສີເຮັງ ຫອມສົມບັດ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ປະທານສະພາປະຊາຊົນແຂວງສາລະວັນ ແລະ ທ່ານ ນາງ ອຸ່ນຫລ້າ ອ້ຽງລໍລາດ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີສະມາຊິກສະພາປະຊາຊົນແຂວງ ປະຈໍາ 8 ເມືອງຂອງແຂວງສາລະວັນ, ຫົວໜ້າດ່ານພາສີສາກົນບໍເຕ່ນ, ຫົວໜ້າ, ຮອງຫົວໜ້າດ່ານພາສີແຂວງສາລະວັນ, ຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ, ຄະນະເລຂາທິການ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ 30 ກວ່າທ່ານ.
ໃນກອງປະຊຸມໄດ້ຮັບຟັງການລາຍງານຂອງຄະນະຄຸ້ມຄອງດ່ານສາກົນບໍ່ເຕ່ນກ່ຽວກັບທີ່ຕັ້ງ,ຈຸດພິເສດຂອງດ່ານສາກົນບໍ່ເຕ່ນ, ການຈັດຕັ້ງປະຕິບັດວຽກງານຄຸ້ມຄອງດ່ານ,ຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ ແລະ ອື່ນໆ ເຊິ່ງດ່ານສາກົນບໍ່ເຕ່ນ ແຫ່ງ ສປປ ລາວ ເປັນດ່ານໜຶ່ງ ຕັ້ງຢູ່ທິດຕາເວັນອອກຂອງແຂວງຫຼວງນໍ້າທາ, ເປັນດ່ານເຊີ່ງ ໜ້າກັບດ່ານສາກົນບໍ່ຫານ ແຫ່ງ ສປ ຈີນ, ເປັນດ່ານດິນຕໍ່ແຜ່ນລະຫວ່າງເມືອງຫຼວງນໍ້າທາ ແຂວງຫຼວງນໍ້າທາ ແລະເມືອງຫຼ້າ ກິ່ງແຂວງສິບສອງພັນນາ ມົນທົນຢຸນນານ. ເປັນດ່ານທີ່ມີມູນເຊື້ອອັນດີງາມ, ມີສາຍພົວພັນອັນດີມາຕະຫຼອດໃນການໄປ-ມາ, ທ່ອງທ່ຽວ, ຢ້ຽມຢາມ, ການຄ້າຂາຍ, ການຂົນສົ່ງ ແລະ ການແລກປ່ຽນດ້ານຕ່າງໆ. ປະຈຸບັນ ດ່ານສາກົນບໍ່ເຕ່ນ ໄດ້ມີສອງຈຸດກວດກາຄືດ່ານເທີງ: ປະກອບມີ 02 ຈຸດກວດກາຄື ຈຸດທາດຫຼວງ; ຈຸດຂາເຂົ້າລົດບັນທຸກສິນຄ້າ ແລະ ດ່ານລຸ່ມກໍຄືດ່ານພາສີ , ການຈັດຕັ້ງປະຕິບັດວຽກງານຄຸ້ມຄອງດ່ານ ນັບແຕ່ຕົ້ນປີມານີ້ ມີຄົນເຂົ້າ-ອອກເມືອງເປັນຄົນປະເທດທີ 3 ກໍ່ເພີ່ມຂຶ້ນ ໂດຍສະເພາະນັກທ່ອງທ່ຽວທີ່ມາເປັນກຣຸບທົວ ຈາກປະເທດໄທ ໃນປີ 2023 ຄົນເຂົ້າເມືອງທັງໝົດ 655.225 ເທື່ອຄົນ, ໃນນີ້ມີຄົນລາວ 207.096 ເທື່ອຄົນ, ຄົນອອກເມືອງທັງໝົດ 624.119 ເທື່ອຄົນ, ໃນນີ້ມີຄົນລາວ 221.573 ເທື່ອຄົນ, ສະເລ່ຍພາຫະນະເບົາເຂົ້າ-ອອກແຕ່ລະວັນ: ເຂົ້າເມືອງ 140 ກ່ວາຄັນ ແລະ ອອກເມຶອງ 150 ກ່ວາຄັນ,ສໍາລັບລົດບັນທຸກສິນຄ້າແຕ່ລະມື້ ຂາເຂົ້າມີປະມານ 300 ກ່ວາຄັນ ແລະ ຂາອອກ ມີປະມານ 250 ກ່ວາຄັນ. ສິນຄ້າຂາອອກສ່ວນຫຼາຍກໍ່ຈະແມ່ນປະເພດສິນຄ້າກະສິກໍາ, ແຮ່ທາດ ແລະ ອື່ນໆ
ແລະໃນຕອນບ່າຍຂອງວັນດຽວກັນ ຄະນະຄຸ້ມຄອງດ່ານສາກົນບໍ່ເຕ່ນ ໄດ້ນຳພາຄະນະຜູ້ແທນ ສະພາປະຊາຊົນແຂວງຫລວງນໍ້າທາ ແລະ ແຂວງສາລະວັນ ທັດສະນະ ແລະ ທ່ຽວຊົມ ສູນວາງສະແດງແຜນຜັງຂອງເຂດເສດຖະກິດພິເສດບໍ່ເຕ່ນແດນງາມ, ຈຸດກວດກາຂາເຂົ້າຂອງລົດບັນທຸກສິນຄ້າ ແລະ ຈຸດກວດກາ ເຂົ້າ-ອອກ ດ່ານສາກົນບໍ່ເຕ່ນ.
ໂດຍ ນາງ ອຳພອນ ສີປະເສີດ