ຕອນເຊົ້າຂອງວັນທີ 22 ສິງຫາ 2023 ນີ້, ສະພາປະຊາຊົນແຂວງສາລະວັນ ເຄື່ອນໄຫວຕິດຕາມກວດກາການປະເມີນການຈັດຕັ້ງປະຕິບັດນິຕິກໍາໃຕ້ກົດໝາຍ 04 ສະບັບ, ຕິດພັນກັບການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ II ຢູ່ທີ່ເມືອງສະໝ້ວຍ, ໃຫ້ກຽດນໍາພາຄະນະໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 14 ປະທານສະພາປະຊາຊົນແຂວງ ແລະ ຮ່ວມເຄື່ອນໄຫວຂອງທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງ ບັນດາທ່ານຕາງໜ້າພະແນກການທີ່ກ່ຽວຂ້ອງ ພ້ອມດ້ວຍຄະນະ, ເຂົ້າຮ່ວມກອງປະຊຸມມີຄະນະນຳຂອງອົງການປົກຄອງເມືອງ ແລະ ບັນດາທ່ານຫົວໜ້າຫ້ອງການອ້ອມຂ້າງເມືອງ.

ຈຸດປະສົງຂອງການເຄື່ອນໄຫວໃນຄັ້ງນີ້ ເພື່ອເປັນການຈັດຕັ້ງຜັນຂະຫຍາຍ ແຜນເຄື່ອນໄຫວຂອງຄະນະປະຈໍາສະພາປະຊາຊົນແຂວງ ສະບັບເລກທີ 207/ຄຈສຂ.ສວ ລົງວັນທີ 9 ສິງຫາ 2023 ກ່ຽວກັບການຕິດຕາມກວດກາການປະເມີນການຈັດຕັ້ງປະຕິບັດນິຕິກໍາໃຕ້ກົດໝາຍ 04 ສະບັບ, ຕິດພັນກັບການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ 07 ຕົວເມືອງ (ເມືອງເລົ່າງາມ, ວາປີ, ຄົງເຊໂດນ, ລະຄອນເພັງ, ຕຸ້ມລານ, ຕະໂອ້ຍ ແລະ ສະໝ້ວຍ) ແລະ ກົດໝາຍວ່າດ້ວຍ ການສ້າງນິຕິກຳ (ສະບັບປັບປຸງ) ສະບັບເລກທີ 06/ສພຊ, ລົງວັນທີ 16 ພະຈິກ 2021 ມາດຕາ 124 ກ່ຽວກັບການປະເມີນຜົນການຈັດຕັ້ງປະຕິບັດນິຕິກຳໃຕ້ກົດໝາຍ;

ໃນທີ່ປະຊຸມ ຕາງໜ້າຫ້ອງການທີ່ກ່ຽວຂ້ອງໄດ້ຂຶ້ນລາຍງານໂດຍຫຍໍ້ ກ່ຽວກັບຂໍ້ສະດວກ, ຂໍ້ຫຍຸ້ງຍາກ ສະພາບການ ໃນການຈັດຕັ້ງປະຕິບັດນິຕິກຳໃຕ້ກົດໝາຍ 4 ສະບັບ ເປັນຕົ້ນ: ນິຕິກໍາໃຕ້ກົດໝາຍ ຂໍ້ຕົກລົງ ວ່າດ້ວຍການກຳນົດເຂດປະເມີນລາຄາທີ່ດິນຢູ່ແຂວງສາລະວັນ; ຂໍ້ຕົກລົງ ວ່າດ້ວຍການຄຸ້ມຄອງການຂົນສົ່ງໂດຍສານ ແລະ ການຂົນສົ່ງສິນຄ້າທາງບົກຢູ່ພາຍໃນແຂວງສາລະວັນ, ຂໍ້ຕົກລົງ ວ່າດ້ວຍການຄຸ້ມຄອງຢາປາບສັດຕູພືດຢູ່ແຂວງສາລະວັນ, ຂໍ້ຕົກລົງ ວ່າດ້ວຍການຄຸ້ມຄອງຕະຫຼາດວັນນັດຢູ່ແຂວງສາລະວັນ; ຈາກນັ້ນ, ຜູ້ແທນກອງປະຊຸມໄດ້ແລກປ່ຽນ ຄົ້ນຄວ້າປຶກສາຫາລື ແລະ ຊີ້ແຈງ ຢ່າງເປັນເຈົ້າການຕາມໜ້າທີ່ຮັບຜິດຊອບ ຕໍ່ກັບຈຸດທີ່ພາໃຫ້ນິຕິກຳໃຕ້ກົດໝາຍ ຍັງບໍ່ທັນໄດ້ຜັນຂະຫຍາຍເຊື່ອມຊຶມໄດ້ຢ່າງກວ້າງຂວາງ ແລະ ຄວາມເປັນເຈົ້າການໃນການຈັດຕັ້ງປະຕິບັດຂອງພະແນກການຂັ້ນແຂວງ, ຂັ້ນເມືອງ ແລະ ບັນຫາຕ່າງໆທີ່ພົບລ້ວນແຕ່ເປັນຂໍ້ເປັນມູນໃຫ້ພະແນກການທີ່ຮັບຜິດຊອບສ້າງນິຕິກໍາໃຕ້ກົດໝາຍ ນຳໄປຄົ້ນຄວ້າ ແລະ ປັບປຸງເນື້ອໃນບາງມາດຕາຂອງນິຕິກໍາໃຕ້ກົດໝາຍ ທີ່ອາດຍັງບໍ່ທັນສອດຄ່ອງກັບສະພາບຕົວຈິງຂອງສັງຄົມໃນປັດຈຸບັນ, ແນໃສ່ຮັບປະກັນໃຫ້ນິຕິກໍາໃຕ້ກົດໝາຍ ມີເນື້ອໃນຖືກຕ້ອງຕາມແນວທາງ, ແຜນນະໂຍບາຍຂອງພັກ ແລະ ນະໂຍບາຍຂອງລັດ ຕາມລັດຖະທໍາມະນູນ, ກົດໝາຍ ໃຫ້ມີຄວາມສອດຄ່ອງກົມກຽວ, ໜັກແໜ້ນ ສາມາດນໍາໄປຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.

ຕອນບ່າຍຂອງວັນດຽວກັນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ແລະ ສະມາຊິກສະພາປະະຊາຊົນແຂວງ ປະຈໍາເມືອງ ໄດ້ເຄື່ອນໄຫວພົບປະ ປະຊາຊົນຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ມະຕິກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II ຢູ່ທີ່ຈຸດບ້ານເທດສະບານ ເມືອງສະໝ້ວຍ ໄດ້ເຊື່ອມຊຶມ, ຮັບຮູ້ ແລະ ເຂົ້າໃຈ, ທັງເກັບກຳຄຳຄິດເຫັນ, ຄຳສະເໜີ, ຄວາມຂັດຂ້ອງໝອງໃຈ ຈາກຜູ້ມີສິດເລືອກຕັ້ງ ນຳໄປສະເໜີພາກສ່ວນທີ່ກ່ຽວຂ້ອງນຳໄປຄົ້ນຄວ້າ, ປຶກສາຫາລື ຊອກຫາທາງແກ້ໄຂບັນຫາໂດຍໄວ ພ້ອມທັງແຈ້ງໃຫ້ຜູ້ມີສິດເລືອກຕັ້ງແຈ້ງຜົນຂອງການແກ້ໄຂໄດ້ຮັບຊາບ.

ການເຄື່ອນໄຫວໃນຄັ້ງນີ້ໄດ້ຮັບການສະໜັບສະໜູນດ້ານງົບປະມານຈາກໂຄງການມູນິທິ ເອເຊຍ (ASIA FOUNDATION) ແລະ ໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ພາບ-ຂ່າວ: ດີລຳພົນ ພົມມະຈັນ