ໃນລະຫວ່າງວັນທີ 4-7 ມິຖຸນາ 2024 ສະພາປະຊາຊົນແຂວງບໍລິຄໍາໄຊ ນໍາໂດຍ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ ແລະ ທ່ານ ໃສຄໍາ ທອງລັດ ກໍາມະການພັກແຂວງ, ຮອງປະທານສະພາປະຊາຊົນແຂວງ ໄດ້ລົງເຄື່ອນໄຫວຕິດຕາມ ກວດກາ ແລະ ເກັບກຳຂໍ້ມູນກ່ຽວກັບຄາດໝາຍພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກແນວໂຮມ, ຊົນເຜົ່າ, ສາສະໜາ, ການປົກຄອງທ້ອງຖິ່ນ, ໂຄງການລົງທຶນ ແລະ ພັດທະນາທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ຢູ່ ເມືອງປາກຊັນ, ເມືອງທ່າພະບາດ, ເມືອງບໍລິຄັນ, ເມືອງປາກກະດິງ, ເມືອງຄໍາເກີດ, ເມືອງວຽງທອງ ແລະ ເມືອງໄຊຈໍາພອນ; ມີບັນດາທ່ານ ປະທານຄະນະກຳການ, ເລຂາທິການ, ຫົວໜ້າ, ຮອງຫົວໜ້າພະແນກການ ແລະ ຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມ.
ຈຸດປະສົງຂອງການເຄື່ອນໄຫວ ເພື່ອຕິດຕາມກວດກາ, ການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍ ຂອງບັນດາຂະແໜງການ ແລະ ອົງການ, ເພື່ອເປັນການເກັບກຳຂໍ້ມູນ ໃຫ້ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ທີ 11 ແຂວງບໍລິຄໍາໄຊ ເຂົ້າຮ່ວມກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX; ຜ່ານການເຄື່ອນໄຫວຕິດຕາມ ກວດກາວຽກງານດັ່ງກ່າວ ໄດ້ຮັບຟັງການລາຍງານຈາກບັນດາຫ້ອງການທີ່ກ່ຽວຂ້ອງ ພາຍໃນເມືອງ ໂດຍສະເພາະວຽກງານໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າ ເປັນຕົ້ນ: ການຈັດຕັ້ງປະຕິບັດມະຕິສະບັບ 86/ຄປພ.ຂບຊ, ລົງວັນທີ 13 ມີນາ 2023 ແລະ ຄໍາສັ່ງແນະນໍາເລກທີ88/ຄປພ, ລົງວັນທີ 13 ມີນາ 2023 ກ່ຽວກັບການກໍານົດ ແລະ ຮັບຮອງການສ້າງບ້ານໃຫຍ່ສີສັນຕົວເມືອງນ້ອຍໃນຊົນນະບົດ ແລະ ກໍານົດສ້າງຈຸດສຸມບຸລິມະສິດ ເພື່ອການພັດທະນາໃນການຈັດສັນພູມລໍາເນົາ ແລະ ອາຊີບຮອດປີ 2025 ຂອງເມືອງ, ການຈັດຕັ້ງປະຕິບັດບັນດາຄາດໝາຍພັດທະນາຊົນນະບົດຕາມມະຕິສະບັບເລກທີ 15/ສພຂ.ບຊ, ລົງວັນທີ 07 ກຸມພາ 2023 ແລະ ການຈັດຕັ້ງປະຕິບັດດໍາລັດ 348/ລບ; ວຽກງານການຈັດສັນພູມລໍາເນົາ ແລະ ອາຊີບຄົງທີ່ ໃຫ້ປະຊາຊົນຢູ່ພາຍໃນເມືອງ, ສະພາບການຈັດຕັ້ງປະຕິບັດວຽກງານສາສະໜາ ແລະ ບັນຫາສາສະໜາ ທີ່ເກີດຂຶ້ນ ຢູ່ພາຍໃນເມືອງ, ການຈັດຕັ້ງປະຕິບັດວຽກງານກໍ່ສ້າງຮາກຖານ ຕິດພັນກັບວຽກງານສາມສ້າງຂອງຫ້ອງການພາຍໃນເມືອງ, ການຈັດຕັ້ງວຽກງານກອງທືນປະກັນສຸຂະພາບຢູ່ເມືອງ, ປະຕິບັດງົບປະມານທີ່ໄດ້ຮັບໃນແຕ່ລະປີ ແລະ ການຈັດສັນນໍາໃຊ້ງົບປະມານດັ່ງກ່າວໃຫ້ໂຮງໝໍເມືອງ ແລະ ບັນດາສຸກສາລາ ເພື່ອຍົກໃຫ້ເຫັນສະພາບການຈັດຕັ້ງປະຕິບັດວຽກງານດັ່ງກ່າວ ໃຫ້ເຫັນໄດ້ດ້ານດີ, ຂໍ້ຫຍຸ້ງຍາກ ປະກົດການຍໍ້ທໍ້ຕ່າງໆ ເພື່ອເປັນຂໍ້ມູນໃຫ້ແກ່ຄະນະສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງນໍາສະເໜີຕໍ່ພາກສ່ວນກ່ຽວຂ້ອງຄົ້ນຄວ້າພິຈາລະນາ ແກ້ໄຂໃຫ້ສອດຄ່ອງຕາມກົດໝາຍ, ລະບຽບການ ແລະ ນະໂຍບາຍຕ່າງໆທີ່ກ່ຽວຂ້ອງ.
ໃນໂອກາດທີ່ ປະທານສະພາປະຊາຊົນແຂວງເຄື່ອນໄຫວໃນຄັ້ງນີ້ ໄດ້ຢ້ຽມຢາມ ຕິດຕາມ ແລະ ຊຸກຍູ້ ໂຄງການກໍ່ສ້າງທາງດ່ວນວຽງຈັນ-ຮ່າໂນ່ຍ ທີ່ເມືອງວຽງທອງຕື່ມອີກ.
ການເຄື່ອນໄຫວໃນຄັ້ງນີ້, ໄດ້ຮັບການສະໜັບສະໜູນດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).
ຂ່າວ ແລະ ພາບ: ໂສລະຢ໋າ
