ໃນວັນທີ 1 ມີນາ 2021 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເຜີຍແຜ່ເຊື່ອມຊືມເອກະສານວຽກງານກໍ່ສ້າງພັກ ແລະ ຈັນຍາບັນຂອງພະນັກງານ-ລັດຖະກອນ ໂດຍການໃຫ້ກຽດເຂົ້າຮ່ວມຂອງ ທ່ານ ບຸນໂຮມ ເທດທານີ ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການສະພາປະຊາຊົນແຂວງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ.
ເພື່ອຄຸ້ມຄອງ ແລະ ສຶກສາອົບຮົມໃຫ້ພະນັກງານ-ລັດຖະກອນມີຄຸນທາດການເມືອງ, ຄຸນສົມບັດສິນທໍາປະຕີວັດໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ, ມີສະຕິຕື່ນຕົວເຄົາລົບ, ປະຕິບັດກົດໝາຍແລະ ລະບຽບການຢ່າງເຂັ້ມງວດ, ໃຫ້ມີປະສິດທິພາບປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ. ເນື້ອໃນທີ່ນໍາມາເຜີຍແຜ່ເຊື່ອມຊືມໃນຄັ້ງນີ້ມີ ບົດສະຫລຸບການຈັດຕັ້ງ, ກໍ່ສ້າງພັກ-ພະນັກງານໄລຍະປີ 2016-2020 ແລະ ທິດທາງແຜນການປີ 2021-2025 ຂອງຈັດຕັ້ງແຂວງຊຽງຂວາງ, ດໍາລັດຂອງລັດຖະບານວ່າດ້ວຍຈັນຍາບັນຂອງພະນັກງານ-ລັດຖະກອນ ສະບັບເລກທີ 184, ລົງວັນທີ 26 ມິຖຸນາ 2019, ຄໍາແນະນໍາຂອງກະຊວງພາຍໃນວ່າດ້ວຍການຈັດຕັ້ງປະຕິບັດວຽກງານຈັນຍາບັນຂອງພະນັກງານ-ລັດຖະບານ ໃນນັ້ນຈັນຍາບັນຂອງພະນັກງານ-ລັດຖະກອນໄດ້ແບ່ງອອກເປັນ 4 ປະເພດຄື: ຈັນຍາບັນຕໍ່ຕົນເອງ, ຈັນຍາບັນຕໍ່ອາຊີບ, ຈັນຍາບັນຕໍ່ການຈັດຕັ້ງ ແລ ະຈັນຍາບັນຕໍ່ປະຊາຊົນ ແລະ ສັງຄົມ ໃນນັ້ນພະນັກງານ-ລັດຖະກອນທຸກຄົນຕ້ອງໄດ້ຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານທີ່ດີມີຄຸນທາດການເມືອງ ແລະ ຄຸນສິນທໍາປະຕິວັດ, ຕ້ອງເຄື່ອນໄຫວວິຊາຊີບຂອງຕົນດ້ວຍຄວາມສັດຊື່ ແລະ ບໍ່ສະແຫວງຫາຜົນປະໂຫຍດໃນທາງບໍ່ຖືກຕ້ອງ ແລະ ປະຕິບັດຈັນຍາບັນຂອງຕົນຢ່າງເຂັ້ມງວດ, ຕ້ອງເຄົາລົບ ແລະ ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບມອບ ໝາຍ, ຮັກສາຄວາມລັບ ແລະ ປະຕິບັດລະບຽບວິໄນຂອງການຈັດຕັ້ງຢ່າງເຂັ້ມງວດ, ຕ້ອງບໍລິການຮັບໃຊ້ປະຊາຊົນແລະ ສັງຄົມດ້ວຍຄວາມຈິງໃຈ, ສະເໝີພາບໂປ່ງໃສ, ມີກິລິຍາມາລາຍາດດີ, ຖະໜອມຖ່ອມຕົວ, ບໍ່ຮຽກຮ້ອງສິ່ງຕອບແທນ, ບໍ່ສ້າງຄວາມຫຍຸ້ງຍາກໃຫ້ແກ່ປະຊາຊົນ ແລະ ສັງຄົມໃນການປະຕິບັດໜ້າທີ່ວຽກງານ.
ໃນຕອນທ້າຍ ທ່ານ ບຸນໂຮມ ເທດທານີ ໄດ້ມີຄໍາເຫັນໂອ້ລົມຕໍ່ກັບພະນັກງານ-ລັດຖະກອນສະພາປະຊາຊົນແຂວງເຊິ່ງທ່ານໄດ້ໃຫ້ນໍາເອົາເນື້ອໃນເອກະສານດັ່ງກ່າວໄປຈັດຕັ້ງຜັນຂະຫຍາຍໃຫ້ເກີດຜົນສໍາເລັດສູງ ແລະ ສືບຕໍ່ປະຕິບັດໜ້າທີ່ວຽກງານຂອງຕົນທີ່ໄດ້ຮັບມອບໝາຍໃຫ້ສໍາເລັດຜົນ ໄປຄຽງຄູ່ກັບການປະຕິບັດຈັນຍາບັນຂອງພະນັກງານ-ລັດຖະກອນໃຫ້ໄດ້ດີກວ່າເກົ່າ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ