(ສພຂ) ໃນວັນທີ 18 ກັນຍາ 2024 ສະພາປະຊາຊົນແຂວງຈໍາປາສັກ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງກ່ຽວກັບວຽກງານຄະນະ ສສຊ ເພດຍິງ, ຄວາມສະເໜີພາບຍິງຊາຍ, ການສົ່ງເສີມຄວາມກ້າວໜ້າ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ວຽກງານໂພຊະນາການ ແລະ ບົດຮຽນການຊຸກຍູ້ຕິດຕາມກວດກາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ແກ່ສະມາຊິກສະພາປະຊາຊົນແຂວງ ແລະ ພະນັກງານວິຊາການຂອງສະພາປະຊາຊົນແຂວງ, ພາຍໃຕ້ການເປັນປະທານຂອງທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງຈໍາປາສັກ; ມີບັນດາທ່ານຮອງປະທານສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 9 ເມືອງ, 1 ນະຄອນ, ຄະນະເລຂາທິການສະພາປະຊາຊົນແຂວງ ແລະ ພະນັກງານລັດຖະກອນຂອງສະພາປະຊາຊົນແຂວເຂົ້າຮ່ວມຫຼາຍກວ່າ 80 ທ່ານ.

ໃນໂອກາດດັ່ງກ່າວ ທ່ານ ສາຍທອງ ໄຊຍະວົງ ປະທານກອງປະຊຸມ ໄດ້ມີຄໍາເຫັນກ່າວເປີດກອງປະຊຸມ ເຊິ່ງມີບາງຕອນວ່າ: ການຈັດກອງປະຊຸມຝຶກອົບຮົມຄັ້ງນີ້ ແມ່ນມີຄວາມສໍາຄັນຫຼາຍ ເປັນຕົ້ນ: ວຽກງານຄວາມສະເໝີພາບຍິງ, ຊາຍ ແລະ ສົ່ງເສີມຄວາມກ້າວໜ້າຂອງແມ່ຍິງ ແລະ ເດັກນ້ອຍ: ແມ່ນຈະໄດ້ຮັບຮູ້ເຖິງການຮັບປະກັນ ສິດ ແລະ ການພັດທະນາທີ່ສະເໝີພາບເທົ່າທຽມກັນລະຫວ່າງ ຍິງ-ຊາຍ; ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ: ຈະໄດ້ຮັບຮູ້ເຖິງພຶດຕິກໍາທີ່ເຮັດໃຫ້ເກີດ ຫຼື ຈະເຮັດໃຫ້ເກີດອັນຕະລາຍ, ຄວາມເສຍຫາຍຕໍ່ແມ່ຍິງ ແລະ ເດັກ ທາງຮ່າງກາຍ, ຈິດໃຈ, ເພດ, ຊັບສິນ ຫຼື ເສດຖະກິດ; ວຽກງານຄະນະສະມາຊິກສະພາແຫ່ງຊາດເພດຍິງ: ຈະໄດ້ຮັບຮູ້ເຖິງຄວາມສະເໝີພາບລະຫວ່າງຍິງ-ຊາຍເຂົ້າໃນທຸກໆກິດຈະກຳທີ່ກ່ຽວຂ້ອງກັບນະໂຍບາຍ,ກົດໝາຍ, ຍຸດທະສາດ, ໂຄງການ, ການບໍລິຫານການເງິນ ແລະ ແບບແຜນວິທີການເຮັດວຽກຂອງອົງການຈັດຕັ້ງ, ວຽກງານການພັດທະນາຊັບພະຍາກອນມະນຸດ: ຈະໄດ້ຮັບຮູ້ເຖິງການປັບປຸງຍຸດທະສາດພັດທະນາຊັບພະຍາກອນມະນຸດ ໃຫ້ແທດເໝາະສົມກັບສະພາບຕົວຈິງ, ສອດຄ່ອງກັບໜ້າທີ່ການເມືອງໄລຍະໃໝ່, ຕິດພັນກັບແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ໃຫ້ເປັນເອກະພາບໃນການຈັດຕັ້ງປະຕິບັດ, ຮັບປະກັນຄວາມເປັນໄປໄດ້ໃນການຈັດຕັ້ງປະຕິບັດ ສາມາດເຊື່ອມໂຍງກັບພາກພື້ນ ແລະ ສາກົນ, ໂພຊະນາການ:ຈະໄດ້ຮັບຮູ້ກ່ຽວກັບບັນດາສານອາຫານທີ່ເຂົ້າສູ່ຮ່າງກາຍ ແລ້ວຮ່າງກາຍສາມາດນຳໄປໃຊ້ ເປັນປະໂຫຍດ ໃນດ້ານການຈະເລີນເຕີບໂຕ ແລະ ສ້ອມແຊມສ່ວນຕ່າງໆຂອງຮ່າງກາຍ; ວຽກງານການຕິດຕາມກວດກາວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ: ຈະໄດ້ຮັບຮູ້ກ່ຽວກັບຂັ້ນຕອນ ແລະ ວິທີການຕ່າງໆ ໃນການຕິດຕາມກວດກາ ຕໍ່ກັບວຽກງານດັ່ງກ່າວ.

ຜູ້ເຂົ້າຮ່ວມໄດ້ຮັບຟັງການນໍາສະເໜີບັນດາບົດຕ່າງໆຈາກນັກວິທະຍກອນທີ່ກ່ຽວຂ້ອງ ເປັນຕົ້ນແມ່ນ ບົດຮຽນກ່ຽວກັນການຈັດຕັ້ງປະຕິບັດຄວາມສະເໝີພາບຍິງ, ຊາຍ ແລະ ສົ່ງເສີມຄວາມກ້າວໜ້າຂອງແມ່ຍິງ ແລະ ເດັກນ້ອຍ; ບົດຮຽນກ່ຽວກັບການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ; ບົດຮຽນກ່ຽວກັບວຽກງານຄະນະສະມາຊິກສະພາແຫ່ງຊາດເພດຍິງ; ບົດຮຽນກ່ຽວກັບການພັດທະນາຊັບພະຍາກອນມະນຸດຢູ່ ແຂວງຈຳປາສັກ; ບົດຮຽນກ່ຽວກັບວຽກງານໂພຊະນາການ ແລະ ບົດຮຽນກ່ຽວກັບການຕິດຕາມກວດກາວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ແຂວງຈໍາປາສັກ.

ກອງປະຊຸມຄັ້ງນີ້ ຈັດຂຶ້ນທີ່ເມືອງຫ້ອງປະຊຸມ ເມືອງໂຂງ ແຂວງຈໍາປາສັກ ເຊິ່ງຈະດໍາເນີນເປັນເວລາ 3 ວັນ ແຕ່ວັນທີ 18-20 ກັນຍາ 2024 ແລະ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).