ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນແຂວງ ແລະ ວິຊາການ ຂອງສະພາປະຊາຊົນແຂວງຈໍາປາສັກ ກ່ຽວກັບວຽກງານການພິຈາລະນາ ແລະ ແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນ ດຳເນີນເປັນເວລາ 2 ວັນ ຢູ່ທີ່ສະໂມສອນຂອງອົງການປະປົກຄອງເມືອງປາກຊ່ອງ, ແຂວງຈໍາປາສັກ ໄດ້ອັດລົງໃນບ່າຍຂອງວັນທີ 10 ເມສາ 2024 ນີ້ ດ້ວຍຜົນສໍາເລັດຢ່າງຈົບງາມ ໂດຍການເປັນປະທານໃນມື້ອັດກອງປະຊຸມຂອງ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ເຂົ້າຮ່ວມມີບັນດາທ່ານປະທານ-ຮອງປະທານຄະນະກຳມະການ, ຄະນະເລຂາທິການ, ສະມາຊິກສະພາປະຊາຊົນແຂວງເຂດເລືອກຕັ້ງ 9 ເມືອງ, 1 ນະຄອນ, ຕາງໜ້າຈາກອົງການກວດກາຂັ້ນແຂວງ-ຂັ້ນເມືອງ, ອົງການໄອຍະການປະຊາຊົນພາກໃຕ້-ແຂວງ, ສານປະຊາຊົນພາກໃຕ້-ແຂວງ, ພະແນກຍຸຕິທໍາແຂວງ, ກອງບັນຊາການແຂວງ, ຫ້ອງວ່າການແຂວງ, ນັກວິທະຍາກອນ, ນັກສໍາມະນາກອນ, ຫົວໜ້າ-ຮອງຫົວໜ້າຂະແໜງການ ຕະຫຼອດຮອດວິຊາການຂອງສະພາປະຊາຊົນແຂວງ ແລະ ພະນັກງານຊ່ວຍວຽກຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ 9 ເມືອງ ແລະ 1 ນະຄອນ ເຂົ້າຮ່ວມເປັນນັກສໍາມະນາກອນຢ່າງພ້ອມພຽງ.

ໂດຍໄດ້ຮັບການສະໜັບສະໜູນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະສະພາປະຊາຊົນຂັ້ນແຂວງ(STEPS) ສະພາປະຊາຊົນແຂວງຈໍາປາສັກ ຈິ່ງໄດ້ຈັດກອງປະຊຸມຝຶກອົບຮົມຄັ້ງນີ້ຂື້ນ ເພື່ອຍົກສູງຄວາມສາມາດໃນການປະຕິບັດພາລະບົດບາດ, ສິດ ແລະ ໜ້າທີ່ຕາມທີ່ໄດ້ກໍານົດໄວ້ໃນກົດໝາຍ ເຊິ່ງເນື້ອໃນທີ່ນໍາມາຝຶກອົບຮົມໃນຄັ້ງນີ້ ປະກອບມີ 2 ຫົວຂໍ້ຄື: ຄວາມຮູ້ກ່ຽວກັບວຽກງານການແກ້ໄຂຄໍາຮ້ອງທຸກ; ລະບຽບການ, ຂັ້ນຕອນ ກ່ຽວກັບການພິຈາລະນາຄໍາຮ້ອງຂໍຄວາມເປັນທໍາ. ຜ່ານການຝຶກອົບໃນໄລຍະ 2 ວັນ ເຫັນວ່າບັນດາທ່ານສະມາຊິກສະພາປະຊາຊົນແຂວງ ແລະວິຊາການທີ່ເຂົ້າຮ່ວມເປັນນັກສໍາມະນາກອນ ສາມາດຮັບຮູ້ເຂົ້າໃຈຕໍ່ເນື້ອໃນທີ່ນໍາມາຈັດຝຶກອົບຮົມໃນຄັ້ງນີ້ໄດ້ຢ່າງເລິກເຊິ່ງ.

ຕອນທ້າຍຂອງກອງປະຊຸມ, ທ່ານ ສົມສີ ມະນີນິ ປະທານກອງປະຊຸມ ໄດ້ສະແດງຄວາມຊົມເຊີຍຕໍ່ການເຂົ້າຮ່ວມຂອງບັນດາທ່ານສະມາຊິກສະພາປະຊາຊົນແຂວງ; ຕາງໜ້າຈາກພາກສ່ວນຕ່າງໆທີ່ກ່ຽວຂ້ອງ ທີ່ໄດ້ຍົກສູງຄວາມຮັບຜິດຊອບໃນການເຂົ້າຮ່ວມກອງປະຊຸມ, ມີການປະກອບຄວາມຄິດຄວາມເຫັນຢ່າງກົງໄປກົງມາ ແລະ ມີລັກສະນະສ້າງສັນ ເຮັດໃຫ້ເນື້ອໃນ ແລະບັນຍາກາດຂອງກອງປະຊຸມດໍາເນີນໄປຢ່າງຖືກຕ້ອງ ແລະຄົບຖ້ວນ. ພ້ອມນີ້, ປະທານກອງປະຊຸມຍັງໄດ້ຮຽກຮອງໃຫ້ທຸກພາກສ່ວນທີ່ເຂົ້າຮ່ວມ ຈົ່ງນໍາເອົາບົດຮຽນທີ່ໄດ້ຮັບຈາກການຝຶກອົມຮົມໃນຄັ້ງນີ້ໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຕົວຈິງຂອງກົມກອງກໍຄືທ້ອງຖິ່ນຂອງຕົນ ແລະ ຈົ່ງພ້ອມກັນສ້າງສະຕິເຄົາລົບ ແລະປະຕິບັດລັດຖະທໍາມະນູນ, ກົດໝາຍ ຢ່າງເຂັ້ມງວດ, ໂດຍສະເພາະການຈັດຕັ້ງປະຕິບັດໜ້າທີ່ວຽກງານການພິຈາລະນາ ແລະ ແກ່ຄໍາຮອງຂໍຄວາມເປັນທໍາ ຂອງປະຊາຊົນ ທີ່ຍື່ນຄໍາຮ້ອງຕໍ່ອົງການກ່ຽວຂ້ອງ ກ່ຽວກັບການກະທໍາຂອງບຸກຄົນ ຫຼື ການຕົກລົງຂອງນິຕິບຸກຄົນ ຫຼື ການຈັດຕັ້ງອື່ນ ທີ່ຕົນເຫັນວ່າເປັນການລະເມີດກົດໝາຍ, ບໍ່ໄດ້ຮັບຄວາມຍຸຕິທໍາ, ກໍ່ຄວາມເສຍຫາຍແກ່ຜົນປະໂຫຍດຂອງລັດ, ລວມໝູ່ ຫຼື ສິດ ແລະ ຜົນປະໂຫຍດອັນຊອບທໍາຂອງປະຊາຊົນ ໃຫ້ຖືເອົາລະບຽບ, ກົດໝາຍທີ່ຕິດພັນກັບບັນຫາເປັນຫຼັກໃນກວດກາ, ພິຈາລະນາແກ້ໄຂ ໃຫ້ຖຶກຕ້ອງຕາມກົດໝາຍ.

(ຂ່າວ ແລະ ພາບ: ສົມວິຈິດ ໄຊມົນຕີ)