ໃນວັນທີ 1 ທັນວາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ຈັດຕັ້ງໂຄສະນາປາຖະກະຖາວັນສະຖາປານາ ສປປລາວ ຂຶ້ນໂດຍການເປັນປະທານຂອງທ່ານ ວຽງໄຊ ສີວິໄລ ກຳມະການພັກແຂວງຮອງປະທານສະພາປະຊາຊົນແຂວງ, ມີຄະນະໜ່ວຍພັກສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຫົວໜ້າ-ຮອງຫົວໜ້າຂະແໜງ ແລະ ຕະຫຼອດຮອດພະນັກງານສະພາປະຊາຊົນແຂວງເຂົ້າຮ່ວມ.
ໃນພິທີບັນດາທ່ານຄະນະຮັບຜິດຊອບໄດ້ຜັດປ່ຽນຂຶ້ນບັນລະຍາຍເອກະສານ ເຊິ່ງເອກະສານທີ່ນໍາມາຈັດຕັ້ງໂຄສະນາປາຖະກະຖາໃນຄັ້ງນີ້ມີ: ວັນສະຖາປານາ ສປປລາວຄົບຮອບ 47 ປີ ແລະ ວັນເກີດປະທານໄກສອນພົມວິຫານ ເພື່ອເປັນການທົບທວນຫວນຄືນມູນເຊື້ອ ແລະ ໄຊຊະນະປະຫວັດສາຂອງພາລະກິດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ ແລະ ໄດ້ຮັບຜົນສໍາເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການຊີ້ນໍາ-ນໍາພາຂອງພັກ ແລະ ລັດ, ເປັນການເພີ່ມທະວີການເຮັດວຽກສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນສະພາປະຊາຊົນແຂວງ ໃຫ້ມີນໍ້າໃຈຮັກຊາດ, ມູນເຊື້ອຄວາມສາມັກຄີປອງດອງຂອງປະຊາຊົນລາວບັນດາເຜົ່າ, ມີນໍ້າໃຈຕໍສູ້ອັນອົງອາດກ້າຫານຂອງກອງທັບ ແລະ ປະຊາຊົນລາວເຮົາ, ສຶກສາ, ຄົ້ນຄວ້າ, ຮໍ່າຮຽນເອົາມູນເຊື້ອປະຕິວັດ, ຄຸນທາດການເມືອງ, ຄຸນສົມບັດສິນທໍາປະຕິວັດ, ຖືເອົາແນວຄິດແບບແຜນການດໍາລົງຊີວິດ ຂອງປະທານ ໄກສອນ ພົມວິຫານເປັນທິດນໍາໃນການປັບປຸງໜ້າທີວຽກງານໃຫ້ບັນລຸຕາມຈຸດປະສົງ ແລະ ລະດັບຄາດໝາຍ, ສືບຕໍ່ບຸກທະລຸທາງດ້ານແນວຄິດຈິນຕະນາການ, ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊີ່ງ ແລະ ຮອບດ້ານ, ສ້າງຄວາມຮັບຮູ້ທາງດ້ານແນວຄິດ ແລະ ການກະທໍາ, ສົ່ງເສີມດ້ານດີແກ້ໄຂບັນຫາທີ່ຍັງຄົງຄ້າງ ແລະ ສິ່ງທີ່ທ້າທາຍຕ່າງໆທີ່ເກີດຂຶ້ນ, ສ້າງຄວາມເຊື່ອໝັ້ນໃຫ້ພະນັກງານຕໍ່ການນໍາພາຂອງພັກ, ການຄຸ້ມຄອງບໍລິຫານຂອງລັດ ເພີ່ມທະວີຄວາມຮັບຜິດຊອບປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອນໍາເອົາປະເທດຊາດກ້າວຂຶ້ນສູ່ຄວາມວັດທະນະຖາວອນ, 
ນອກນັ້ນຍັງເປັນການໂຄສະນາແນວທາງນະໂຍບາຍຂອງພັກ, ນະໂຍບາຍຂອງລັດ, ຜົນສໍາເລັດຂອງການປົກປັກຮັກສາ ແລະ ສ້າງສາພັດທະນາປະເທດຊາດພາຍໃຕ້ການຊີ້ນໍາ-ນໍາພາຂອງພັກ-ລັດ ໃຫ້ພະນັກງານສະພາປະຊາຊົນແຂວງໄດ້ຮັບຮູ້, ເຂົ້າໃຈຢ່າງລະອຽດເລິກເຊິ່ງປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ປຸກລະດົມ, ຂົນຂວາຍມະຫາຊົນສ້າງຂະບວນການຂໍ່ານັບຮັບຕ້ອນໃນການເປັນເຈົ້າພາບທີ່ດີໃນການຈັດງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບໃຫ້ເປັນຂະບວນຟົດຟື້ນ.
ໃນໂອກາດດັ່ງກ່າວ, ທ່ານ ວຽງໄຊ ສີວິໄລ ໄດ້ມີຄໍາເຫັນໂອ້ລົມຕໍ່ກັບພະນັກງານ-ລັດຖະກອນ ກໍຄືຄະນະ ປະຈໍາສະພາປະຊາຊົນແຂວງ ຈົ່ງສືບຕໍ່ເອົາໃຈໃສ່ຊີ້ນໍາ-ນໍາພາແບບແຜນວິທີເຮັດວຽກຂອງສະພາປະຊາຊົນແຂວງ, ຕ້ອງມີແບບແຜນວິທີເຮັດວຽກລະອຽດຕື່ມ, ໃຫ້ພະນັກງານສະພາປະຊາຊົນແຂວງ ຈົ່ງພ້ອມກັນສຶກສາຄົ້ນຄວ້າ ຮໍ່າຮຽນເອົາບົດຮຽນທີ່ດີມາພັດທະນາຕົນ, ເອົາໃຈໃສ່ປະສານງານກັນຢ່າງກົມກຽວທັງພາຍໃນ ແລະ ພາຍນອກ ຄ່ຽງຄູ່ໄປກັບການສ້າງຄວາມສາມັກຄີພາຍໃນໃຫ້ແໜ້ນແຟ້ນ, ພາຍນອກໃຫ້ກວ້າງຂວາງກວ່າເກົ່າ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ