ໃນວັນທີ 8 ທັນວາ 2023 ນີ້, ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ຈັດພິທີປາຖະກະຖາ ວັນຊາດ ທີ 02 ທັນວາ ຄົບຮອບ 48 ປີ ( 02 ທັນວາ 1975 – 02 ທັນວາ 2023 ), ແລະ ວັນເກີດປະທານ ໄກສອນ ພົມວິຫານ ຄົບຮອບ 103 ປີ (13 ທັນວາ 1920-13 ທັນວາ 2023 ) ໂດຍການເປັນປະທານ ແລະ ປາຖະກະຖາຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ມີບັນດາ ທ່ານຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ສະມາຊິກພັກ ແລະ ພະນັກງານ-ລັດຖະກອນສະພາປະຊາຊົນແຂວງຄໍາມ່ວນເຂົ້າຮ່ວມ.
ໃນພິທີກໍ່ໄດ້ຮັບຟັງການປາຖະກະຖາລະນຶກເຖິງວັນປະຫວັດສາດສໍາຄັນດັ່ງກ່າວແມ່ນໄດ້ຍົກໃຫ້ເຫັນເຖິງມູນເຊື້ອແລະ ຄວາມໝາຍ ສໍາຄັນຂອງວັນຊາດ 02 ທັນວາ ໂດຍສະເພາະ ແມ່ນຊາດລາວມີມູນເຊື້ອທີ່ສະຫງ່າອົງອາດແຫ່ງການຕໍ່ສູ້ຕ້ານການຮຸກຮານຂອງສັດຕູຈາກພາຍນອກ, ປະຊາຊົນລາວບັນດາເຜົ່າພາຍໃຕ້ການນຳພາຂອງພັກປະຊາຊົນປະຕິວັດລາວໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກ ຈັກກະພັດລ່າເມືອງຂຶ້ນທັງແບບເກົ່າ ແລະແບບໃໝ່ສາມາດປົດປ່ອຍປະເທດຊາດຢ່າງມີໄຊ, ສະຖາປະນາສາທາລະນະລັດປະຊາທິປະໄຕປະຊາຊົນລາວຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ ປີ 1975, ເຊິ່ງແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງ ແທ້ຈິງ. ພ້ອມນັ້ນ, ຍັງໄດ້ຍົກໃຫ້ເຫັນຜົນງານແຫ່ງການປົກປັກຮັກສາແລະສ້າງສາພັດທະນາປະເທດຊາດຕະຫລອດໄລຍະ 48 ປີເຮັດໃຫ້ປະຊາຊົນບັນດາເຜົ່າທົ່ວປະເທດໄດ້ຮັບການພັດທະນາມີຄວາມຈະເລີນກ້າວໜ້າ ແລະໄດ້ໃຫ້ເຫັນຜົນງານທີ່ພົ້ນເດັ່ນໃນເວທີພາກພື້ນ ແລະສາກົນ. ໂອກາດດຽວກັນຍັງໄດ້ຫວນຄືນປະຫວັດ ວັນເກີດ ຂອງທ່ານ ປະທານ ໄກສອນ ພົມວິຫານ ຄົບຮອບ 103 ປີ ( 13 ທັນວາ 1920-13 ທັນວາ 2023 ) ເຊີ່ງໄດ້ຍົກໃຫ້ເຫັນຊີວິດ ແລະ ການເຄື່ອນໄຫວ ປະຕິວັດຂອງປະທານ ໄກສອນ ພົມວິຫານ, ຜົນງານ ແລະ ຄຸນງາມ ຄວາມດີຂອງທ່ານໃນການຊີ້ນໍາ-ນໍາພາ ໃນພາລະກິດການ ປະຕິວັດ ປົກປັກຮັກສາປະເທດຊາດ, ທ່ານແມ່ນນັກຮັກ ຊາດຜູ້ຍິ່ງໃຫຍ່, ແມ່ນລູກຜູ້ປະເສີດຂອງປະຊາຊົນລາວບັນດາເຜົ່າ, ແມ່ນນັກປະຕິວັດຜູ້ດີເລີດ, ເປັນຜູ້ນຳສູງສຸດຂອງການປະຕິວັດລາວທີ່ມີຄວາມປີຊາສາມາດ, ມີຄວາມສະຫລາດຫລັກແຫລມ, ມີໄຫວພິບອັນແຫລມຄົມ ແລະມີນໍ້າໃຈຕໍ່ສູ້ອັນເດັດດ່ຽວໜຽວແໜ້ນເປັນຜູ້ນຳທີ່ແສນເຄົາລົບຮັກຂອງພັກ-ລັດ ແລະປະຊາຊົນ, ເປັນວິລະບູລຸດຂອງຊາດລາວເຮົາ, ການປະຖະກະຖາຄັ້ງນີ້ກໍ່ເພື່ອເຮັດໃຫ້ສະມາຊິກພັກ ແລະ ພະນັກງານ-ລັດຖະກອນສະພາປະຊາຊົນແຂວງຄໍາມ່ວນ ໄດ້ຮັບຮູ້ຕໍ່ມູນເຊື້ອອັນເປັນປະຫວັດຂອງຊາດ ແລະ ນໍາເອົາບົດຮຽນອັນລໍ້າຄ່າຂອງ ທ່ານປະທານ ໄກສອນ ພົມວິຫານ ນໍາໃຊ້ເຂົ້າໃນໜ້າທີ່ການເມືອງຂອງຕົນໃຫ້ມີຜົນສຳເລັດເປັນກ້າວໆ.
ໂດຍ: ເອື້ອ ມະໂນສິງ