ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຫລວງນ້ຳທາ ຊຸດທີ II ໄດ້ຮັບຜົນສຳເລັດລົງຢ່າງເປັນທາງການໃນຕອນແລງວັນທີ 17 ກຸມພາ 2023 ຢູ່ທີ່ສະໂມສອນຂອງແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງນໍ້າທາ, ມີບັນດາທ່ານ ຄະນະປະຈໍາ, ປະທານກໍາມາທິການ  ສະພາແຫ່ງຊາດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3, ມີບັນດາທ່ານການນໍາ, ອະດີດການນໍາ ພັກ-ລັດ ຂອງແຂວງ, ອະດີດສະມາຊິກສະພາແຫ່ງຊາດ-ສະພາປະຊາຊົນແຂວງ, ບັນດາທ່ານນັກປະຕິວັດອາວຸໂສ, ຜູ້ຊົງຄຸນວຸດທິ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສອງກອງບັນຊາການຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 3, ສະມາຊິກສະພາປະຊາຊົນແຂວງຫຼວງນໍ້າທາ ຊຸດທີ II, ບັນດາທ່ານເຈົ້າເມືອງ, ພະແນກການ, ອົງການລັດທຽບເທົ່າຂັ້ນແຂວງ, ສະຖາບັນການສຶກສາ, ພາກສ່ວນທຸລະກິດຜູ້ປະກອບການ, ແຂກຖືກເຊີນເຂົ້າຮ່ວມທັງໝົດ 150 ກວ່າທ່ານ.

ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຫລວງນ້ຳທາ ຊຸດທີ II ໄດ້ຮັບຟັງການລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບ ຜົນການພິຈາລະນາ ຮັບຮອງເອົາບຸກຄະລາກອນ ເປັນລາຍບຸກຄົນ ທີ່ດໍາລົງຕໍາແໜງ ໂດຍການເລືອກຕັ້ງ, ການສະເໜີແຕ່ງຕັ້ງ ຈາກສະພາປະຊາຊົນແຂວງ, ຊຶ່ງໄດ້ຮັບຮອງ ແລະ ສະເໜີ ຕໍ່ທ່ານນາຍົກລັດຖະມົນຕີ ແຫ່ງ ສປປ ລາວ ເພື່ອແຕ່ງຕັ້ງເຈົ້າແຂວງໆຫຼວງນໍ້າທາ ແລະ ຮັບຮອງເອົາການແຕ່ງຕັ້ງຫົວໜ້າກອງບັນຊາການ ປກສ ແຂວງຫຼວງນໍ້າທາ; ໄດ້ຮັບຟັງການສະເໜີໂດຍຫຍໍ້ຂອງທ່ານເຈົ້າແຂວງ ກ່ຽວກັບວິໄສທັດຕໍ່ການພັດທະນາແຂວງຫຼວງນໍ້າທາ ແຕ່ນີ້ ຮອດປີ 2025; ໄດ້ພິຈາລະນາ, ຮັບຮອງເອົາ ບົດລາຍງານກ່ຽວກັບ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງແຂວງ; ໄດ້ພິຈາລະນາ, ຮັບຮອງເອົາ ບົດລາຍງານຂອງອົງການກວດກາລັດແຂວງ ກ່ຽວກັບການເຄື່ອນໄຫວວຽກງານປະຈໍາປີ 2022, ແຜນການປະຈໍາປີ 2023 ແລະ ຜົນການຕິດຕາມກວດກາ ຕາມຜົນຂອງການກວດສອບ ປີ 2020; ໄດ້ພິຈາລະນາ, ຮັບຮອງເອົາ ບົດລາຍງານຂອງອົງການກວດສອບປະຈໍາພາກເໜືອ ກ່ຽວກັບການເຄື່ອນ ໄຫວວຽກງານ ປະຈໍາປີ 2022, ແຜນການ ປະຈໍາປີ 2023 ແລະ ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານຂອງແຂວງຫຼວງນໍ້າທາ ປະຈໍາປີ 2021; ໄດ້ພິຈາລະນາ, ຮັບຮອງເອົາ ບົດລາຍງານກ່ຽວກັບ ການຈັດຕັ້ງປະຕິບັດແຜນການ ເຄື່ອນໄຫວວຽກງານປະຈໍາປີ 2022 ແລະ ແຜນການປະຈໍາປີ 2023 ຂອງອົງການໄອຍະການປະຊາຊົນແຂວງ; ໄດ້ພິຈາລະນາ, ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2022 ແລະ ແຜນການປະຈໍາປີ 2023 ຂອງສານປະຊາຊົນແຂວງ; ໄດ້ພິຈາລະນາ, ຮັບຮອງເອົາ ບົດລາຍງານກ່ຽວກັບ ການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2022 ແລະ ແຜນການປະຈໍາປີ 2023 ຂອງສະພາປະຊາຊົນແຂວງ; ໄດ້ພິຈາລະນາ, ຮັບຮອງເອົາ ນິຕິກໍາໃຕ້ກົດໝາຍຂອງແຂວງ ຈໍານວນ 3 ສະບັບຄື: ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການສົ່ງເສີມຈູນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ ຂອງແຂວງຫລວງນ້ຳທາ (ສ້າງໃໝ່); ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການພັດທະນາອຸດສາຫະກໍາ ຫຼື ນິຄົມອຸດສາ ຫະກໍາ ເພື່ອຮອງຮັບການສ້າງຕັ້ງໂຮງງານຢູ່ແຂວງຫຼວງນ້ຳທາ (ສ້າງໃໝ່);ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງວຽກງານໄປສະນີພາຍໃນແຂວງຫຼວງນ້ຳທາ (ສ້າງໃໝ່); ພ້ອມດຽວກັນ ສະມາຊິກສະພາປະຊາຊົນແຂວງ ແລະ ບັນດາທ່ານຜູ້ແທນກອງປະຊຸມໄດ້ສຸ່ມໃສ່ປະກອບຄຳຄິດເຫັນໃສ່ບັນດາບົດລາຍງານ, ຮ່າງຂໍ້ຕົກລົງເຈົ້າແຂວງທັງ 3 ສະບັບ ຢ່າງມີຈຸດສຸມ ເພື່ອເຮັດໃຫ້ເນື້ອໃນຄົບຖ້ວນສົມບຸນ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຫລວງນ້ຳທາ ຊຸດທີ II

ໂດຍ ນາງ ວັນນີ ແຝງບົວວັນ