ໃນລະຫວ່າງວັນ 9-10 ພຶດສະພາ 2024 ທີ່ຜ່ານມານີ້ ສະພາປະຊາຊົນແຂວງ ສະຫວັນນະເຂດ ໄດ້ຕ້ອນຮັບການມາຢ້ຽມຢາມ ຂອງຄະນະຜູ້ແທນ ສະພາປະຊາຊົນແຂວງ ຈໍາປາສັກ; ເຊິ່ງການເເລກປ່ຽນບົດຮຽນຄັ້ງນີ້ໄດ້ຈັດຂຶ້ນທີ່ຫ້ອງປະຊຸມ ສະພາປະຊາຊົນແຂວງ ສະຫວັນນະເຂດ ໃນກອງປະຊຸມພົບປະແລກປ່ຽນບົດຮຽນ ລະຫວ່າງ ສອງສະພາປະຊາຊົນແຂວງ; ຄະນະຜູ້ແທນສະພາປະຊາຊົນແຂວງສະຫວັນນະເຂດ  ນໍາໂດຍທ່ານ ຄໍາຜັນ ຄູນສະຫວັນ ຮອງປະທານສະພາປະຊາຊົນແຂວງສະຫວັນນະເຂດ; ຄະນະຜູ້ແທນສະພາປະຊາຊົນແຂວງຈໍາປາສັກ ນໍາໂດຍທ່ານ ສົມສີ ມະນີນິນ ຮອງປະທານສະພາປະຊາຊົນແຂວງ ຈໍາປາສັກ ເປັນຫົວໜ້າຄະນະ, ມີບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງການ ໃນ 02 ສະພາປະຊາຊົນແຂວງ ເຂົ້າຮ່ວມກອງປະຊຸມ.

ໃນໄລຍະດໍາເນີນກອງປະຊຸມ ໄດ້ມີບັນຍາກາດທີ່ເຕັມໄປດ້ວຍໄມຕີຈິດມິດຕະພາບ ແລະ ຄວາມຮັກແພງສາມັກຄີ, ຄະນະຜູ້ແທນສະພາປະຊາຊົນສອງແຂວງ ມີການລາຍງານ ການເຄື່ອນໄຫວວຽກງານ ຂອງສະພາປະຊາຊົນແຂວງໃນໄລຍະຜ່ານມາ, ວາລະດຽວກັນ ຄະນະຜູ້ແທນສອງແຂວງ ໄດ້ມີຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະ ການຈັດຕັ້ງປະຕິບັດ 3 ພາລະບົດບາດ ຂອງສະພາປະຊາຊົນແຂວງ ຄື: ດ້ານນິຕິກໍາ, ດ້ານການຕົກລົງບັນຫາສໍາຄັນພື້ນຖານຂອງແຂວງ ຜ່ານກອງປະຊຸມສະພາປະຊາຊົນແຂວງ ແລະກອງປະຊຸມຄະນະປະຈໍາສະພາປະຊາຊົນແຂວງ ໂດຍສະເພາະການອອກມະຕິສະເພາະຂອງເມືອງ, ພະແນກການ ແລະ ດ້ານການຕິດຕາມກວດກາ; ວຽກງານປະສານສົມທົບ ກັບອົງການປົກຄອງແຂວງ ແລະ ພາກສ່ວນກ່ຽວຂ້ອງ; ການດໍາເນີນກອງປະຊຸມສະພາປະຊາຊົນແຂວງ; ແລກປ່ຽນບົດຮຽນໃນຫົວຂໍ້ອື່ນ ກ່ຽວກັບບັນຫາທີ່ພົບເຫັນເວລາເຄື່ອນໄຫວພົບປະ ພໍ່ແມ່ປະຊາຊົນຜູ້ທີ່ມີສິດເລືອກຕັ້ງ; ຕາມການເຈາະຈີ້ມ ແລະ ຂົງເຂດທີ່ມີຄວາມສົນໃຈ;

ໃນວາລະທ້າຍສຸດ ປະທານກອງປະຊຸມທັງສອງແຂວງ ໄດ້ເປັນເອກະພາບກັນ ສືບຕໍ່ເພີ່ມທະວີການພົວພັນຮ່ວມມື, ການແລກປ່ຽນຂໍ້ມູນຂ່າວສານ ແລະ ບົດຮຽນ ໃນການເຄື່ອນໄຫວວຽກງານຂອງສະພາປະຊາຊົນສອງແຂວງ ໃຫ້ນັບມື້ສະໜິດແໜ້ນ ແລະ ກ້າວຂຶ້ນສູ່ລະດັບສູງ; ສືບຕໍ່ພົບປະແລກປ່ຽນບົດຮຽນ ລະຫວ່າງ ຄະນະຜູ້ແທນຂອງສະພາປະຊາຊົນແຂວງ ໂດຍການພັດປ່ຽນຢ້ຽມຢາມເຊິ່ງກັນ ແລະ ກັນ.