(ສພຊ) ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II ໄຂຂຶ້ນໃນຕອນເຊົ້າວັນທີ 11 ມັງກອນ 2023 ທີ່ອົງການປົກຄອງນະຄອນຫຼວງວຽງຈັນ ໂດຍການເປັນປະທານຂອງທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ, ເຂົ້າຮ່ວມມີທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ອາດສະພັງທອງ ສີພັນດອນ ເຈົ້າຄອງນະ ຄອນຫຼວງວຽງຈັນ, ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ, ສະມາຊິກສະພາປະຊາຊົນນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຈະໄດ້ພິຈາລະນາຮັບຮອງເອົາບັນດາເນື້ອໃນທີ່ສໍາຄັນເຊັ່ນ: ພິຈາລະນາ ແລະ ຮັບຮອງ ເອົາບົດລາຍງານຂອງທ່ານເຈົ້າຄອງນະຄອນຫຼວງວຽງຈັນ ກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານ ປະຈໍາປີ 2022 ແລະ ທິດທາງແຜນການ ປີ 2023 ຂອງນະຄອນຫຼວງວຽງຈັນ; ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການ ເຄື່ອນໄຫວວຽກງານປະຈໍາປີ 2022 ແລະ ແຜນການເຄື່ອນໄຫວວຽກງານ ປະຈໍາປີ 2023 ຂອງອົງການກວດສອບປະຈໍາພາກກາງ ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານປະຈໍາປີ 2021 ຂອງນະຄອນຫຼວງວຽງຈັນ; ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2022 ແລະ ແຜນການເຄື່ອນໄຫວວຽກງານ ປະຈໍາປີ 2023 ຂອງອົງການກວດກາລັດ ນະຄອນຫຼວງວຽງຈັນ; ບົດລາຍງານຜົນການກວດກາຕາມຜົນການກວດສອບ ປະຈໍາປີ 2018, ຮັບຟັງການລາຍງານການຈັດຕັ້ງປະຕິບັດ 2 ວາລະແຫ່ງຊາດຄື: ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ ປະຈໍາປີ 2022 ຢູ່ນະຄອນຫຼວງວຽງຈັນ; ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປະຈໍາປີ 2022; ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍ ຂອງນະຄອນຫຼວງວຽງຈັນ 2 ສະບັບຄື: ຮ່າງຂໍ້ຕົກລົງວ່າດ້ວຍການຈັດຕັ້ງປະຕິບັດມາດຕະການສ້າງ ນະຄອນຫຼວງວຽງຈັນສະອາດ (ສ.ສະອາດ); ຮ່າງແຜນຈັດສັນທີ່ດິນ ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຮອບດ້ານຂອງນະຄອນຫຼວງວຽງຈັນ; ຄົ້ນຄວ້າປະກອບຄໍາຄິດຄໍາເຫັນໃສ່ຮ່າງລັດຖະບັນຍັດຂອງປະ ທານປະເທດ 2 ສະບັບຄື: ຮ່າງລັດຖະບັນຍັດຂອງປະທານປະເທດ ແຫ່ງ ສປປລາວ ວ່າດ້ວຍນະຄອນ ຫຼວງ; ຮ່າງລັດຖະບັນຍັດຂອງປະທານປະເທດວ່າດ້ວຍອາກອນຕົວເມືອງ (City Tax) ຮັບຟັງການລາຍງານຂອງອົງການປົກຄອງກ່ຽວກັບການປະເມີນຜົນການຈັດຕັ້ງປະຕິບັດບັນດານິຕິກໍາໃຕ້ກົດໝາຍທີ່ສະພາປະຊາຊົນນະຄອນຫຼວງວຽງຈັນ ໄດ້ຮັບຮອງເອົາ 2 ສະບັບຄື: ຂໍ້ຕົກລົງວ່າດ້ວຍການສ້າງນະຄອນ ຫຼວງວຽງຈັນສີຂຽວ (ສ.ສີຂຽວ) ຂໍ້ຕົກລົງວ່າດ້ວຍນະຄອນຫຼວງວຽງຈັນສະຫງົບສຸກ (ສ.ສະຫງົບ). ໃນນັ້ນ, ລວມທັງການຈັດຕັ້ງປະຕິບັດຂໍ້ຕົກລົງວ່າດ້ວຍມາດຕະການຫຼຸດຜ່ອນອຸບັດເຫດ ແລະ ການຮັກສາຄວາມປອດໄພຕາມທ້ອງຖະໜົນທົ່ວນະຄອນຫຼວງວຽງຈັນ; ພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງອົງການໄອຍະການປະຊາຊົນພາກກາງ ແລະ ອົງການໄອຍະການປະຊາ ຊົນນະຄອນຫຼວງວຽງຈັນ; ພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງສານປະ ຊາຊົນພາກກາງ ແລະ ສານປະຊາຊົນນະຄອນຫຼວງວຽງຈັນ; ພິຈາລະນາ ແລະ ຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງ ສະພາປະຊາຊົນນະຄອນຫຼວງວຽງຈັນ ຊຸດທີ II ຮັບຟັງບົດປະກອບຄໍາເຫັນຂອງອົງການແນວລາວສ້າງຊາດ ນະຄອນຫຼວງວຽງຈັນ ຕໍ່ການເຄື່ອນໄຫວວຽກງານຂອງ ສະພາປະຊາຊົນນະຄອນ ຫຼວງວຽງຈັນ; ພິຈາລະນາໃຫ້ຄະແນນປະເມີນຜົນຕໍ່ການປະຕິບັດໜ້າທີີ່ ຂອງບຸກຄະລາກອນທີ່ ສະພາປະຊາຊົນນະຄອນຫຼວງວຽງຈັນ ເລືອກຕັ້ງ ແລະ ຮັບຮອງເອົາການແຕ່ງຕັ້ງ.

ໃນໂອກາດນີ້, ທ່ານ ອານຸພາບ ຕຸນາລົມ ໄດ້ກ່າວວ່າ: ກອງປະຊຸມສະໄໝສາມັນເທື່ອທີ 4 ຂອງ ສະພາປະຊາຊົນນະຄອນຫຼວງວຽງຈັນ ໄດ້ໄຂຂຶ້ນຢ່າງເປັນທາງການໃນທ່າມກາງບັນຍາກາດທີ່ທົ່ວພັກ-ລັດ ແລະ ທົ່ວປວງຊົນຊາວ ນະຄອນຫຼວງວຽງຈັນ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກນະຄອນຫຼວງວຽງຈັນ ໂດຍສະເພາະແມ່ນການຜັນຂະຫຍາຍບັນດາຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ເປັນແຜນການອັນລະອຽດຢູ່ໃນທ້ອງຖິ່ນ ເພື່ອນໍາໄປຈັດຕັ້ງປະຕິບັດເຂົ້າສູ່ຊີວິດຕົວຈິງ ຢູ່ໃນຮາກຖານ ເປັນຕົ້ນແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານ ຂອງນະຄອນຫຼວງວຽງຈັນ; ເຊິ່ງໄລຍະປີ 2022 ຜ່ານມາ ປະເທດເຮົາໄດ້ປະສົບກັບຄວາມຫຍຸ້ງ ຍາກທາງດ້ານເສດຖະກິດ-ການເງິນ ທີ່ສະສົມມາເປັນເວລາຫຼາຍປີ ການຄຸ້ມຄອງລັດ, ຄຸ້ມຄອງເສດຖະ ກິດ-ສັງຄົມ ພົບສິ່ງທ້າທາຍໃໝ່ ເປັນຕົ້ນອັດຕາແລກປ່ຽນເໜັງຕີງແຮງ ລາຄານໍ້າມັນເຊື້ອໄຟ ແລະ ລາ ຄາສິນຄ້າເພີ່ມສູງຂຶ້ນ. ໃນນີ້, ນະຄອນຫຼວງວຽງຈັນ ໃນຖານະເປັນນະຄອນຫຼວງຂອງປະເທດ ກໍໄດ້ຮັບຜົນກະທົບໂດຍກົງຈາກຂໍ້ຫຍຸ້ງຍາກສິ່ງທ້າທາຍ ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນຊາວນະຄອນຫຼວງວຽງຈັນ ພົບຄວາມຝືດເຄືອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານ ປະຈໍາປີ 2022 ທີ່ໄດ້ຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຂອງ ສະພາປະຊາຊົນນະຄອນຫຼວງວຽງຈັນ ຊຸດທີ II ມີອຸປະສັກຫຼາຍປະການ ເຖິງຢ່າງໃດກໍຕາມພາຍໃຕ້ການຊີ້ ນໍາ-ນໍາພາຂອງອົງຄະນະພັກ ສະພາປະຊາຊົນນະຄອນຫຼວງວຽງຈັນ ອົງການປົກຄອງ ທີ່ໄດ້ມີຄວາມເອົາ ໃຈໃສ່ໃນການຈັດຕັ້ງປະຕິບັດ ແລະ ຜ່ານຜ່າຄວາມຫຍຸ້ງຍາກຢ່າງເປັນເຈົ້າການ ໄດ້ເຮັດໃຫ້ການຈັດຕັ້ງປະຕິບັດບັນດາຄາດໝາຍໃນແຜນພັດທະນາເສດຖະກິດ-ສັງຄົມ ແຜນງົບປະມານປີ 2022 ກໍຄືການປະ ຕິບັດ 2 ວາລະແຫ່ງຊາດ ທີ່ສະພາປະຊາຊົນຮັບຮອງເອົານັ້ນ ໄດ້ມີຄວາມຄືໜ້າດີພໍສົມຄວນ ແລະ ບາງຄາດໝາຍ ທາງດ້ານເສດຖະກິດມະຫາພາກຂອງ ນະຄອນຫຼວງວຽງຈັນ ຈໍານວນໜຶ່ງແມ່ນບັນລຸຄາດໝາຍ ແລະ ມີບາງອັນລື່ນຄາດໝາຍ ການພັດທະນາຂອງ ນະຄອນຫຼວງວຽງຈັນ ສືບຕໍ່ມີສະຖຽນລະພາບທາງດ້ານການເມືອງທີ່ໜັກແໜ້ນ ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ສາມາດປະຄັບປະຄອງເສດຖະກິດບໍ່ໃຫ້ຕົກຢູ່ໃນສະພາບຫຍຸ້ງຍາກກວ່ານີ້ ແລະ ຍັງສາມາດຮັບປະກັນໃຫ້ສະພາບແວດລ້ອມ ແລະ ເງື່ອນໄຂທີ່ເອື້ອອໍານວຍໃຫ້ແກ່ການພັດທະນາ ນະຄອນຫຼວງວຽງຈັນ ໄດ້ກັບເຂົ້າສູ່ສະພາບເກືອບປົກກະຕິ ແລະ ຄ່ອຍໆດີຂຶ້ນເທື່ອລະກ້າວ.

ພ້ອມນັ້ນ, ຍັງຈະໄດ້ຮັບຟັງການຊີ້ແຈງບາງບັນຫາພົ້ນເດັ່ນທີ່ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ຍົກຂຶ້ນ ຫຼື ຊັກຖາມ ຈາກອົງການປົກຄອງ, ສານປະຊາຊົນ, ອົງການໄອຍະການປະຊາຊົນ ແລະ ພາກສ່ວນກ່ຽວຂ້ອງຕື່ມອີກ.

ກອງປະຊຸມ, ຈະດຳເນີນໄປຈົນເຖິງວັນທີ 19 ມັງກອນ 2023 ຈຶ່ງຈະສຳເລັດ.

(ຂ່າວ: ໄຊໂສພາພອນ ມິ່ງມຸງຄຸນ; ພາບ: ສຸພາວັນຫອມສະນິດ)