ວັນທີ 8 ສິງຫາ 2023 ທີ່ຫ້ອງປະຊຸມນ້ອຍ ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມ ເຊື່ອມຊຶມ ເອກະສານສຳຄັນຂອງພັກ ພາຍໃຕ້ການປະທານ ຂອງສະຫາຍ ສົມສັກ ດອນຈານິດ ກຳມະການພັກແຂວງ, ເຂລາໜ່ວຍພັກ, ຮອງປະທານສະພາປະຊາຊົນແຂວງ ມີບັນດາສະຫາຍຄະນະປະຈຳ, ຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານວິຊາການ ສະພາປະຊາຊົນແຂວງເຂົ້າຮ່ວມ.

           ກອງປະຊຸມໄດ້ຮັບຟັງການເຊື່ອມຊຶມ ມະຕິ ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງຫົວພັນ ສະໄໝ X; ບົດສະຫລຸບຫຍໍ້ກາງສະໄໝ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ( 2021-2025 ) ຂອງແຂວງຫົວພັນ; ບົດໂອ້ລົມ ຂອງສະຫາຍ ປອ ບຸນທອງ ຈິດມະນີ ກຳມະການກົມການເມືອງ, ຜູ້ປະຈຳການຄະນະເລຂາທິການ ສູນກາງພັກ, ຮອງປະທານປະເທດ ຕໍ່ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຂວງຫົວພັນ ສະໄໝທີ X ແລະ ມະຕິກອງປະຊຸມຄົບຄະນະ ຄັ້ງທີ VI ຂອງຄະນະບໍລິຫານງານສູນກາງພັກ ສະໄໝ XI ຈາກສະຫາຍ ສົມສັກ ດອນຈານິດ ກຳມະການພັກແຂວງ, ເຂລາໜ່ວຍພັກ ສພຂ, ຮອງປະທານສະພາປະຊາຊົນແຂວງ ແລະ ສະຫາຍ ຄຳຟອງ ກົ້ວມີໄຊ ຮອງເລຂາໜ່ວຍພັກ, ເລຂາທິການ ສພຂ.

         ຈຸດປະສົງການເຊື່ອມຊຶມຄັ້ງນີ້, ເພື່ອໃຫ້ສະມາຊິກພັກ, ພະນັກງານ-ລັດຖະກອນພາຍໃນ ສະພາປະຊາຊົນແຂວງ ໄດ້ຮັບຮູ້, ເຂົ້າໃຈເຖິງ ເນື້ອໃນຜົນສຳເລັດ ມະຕິ ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງຫົວພັນ ສະໄໝ X ແລະ ມະຕິກອງປະຊຸມຄົບຄະນະ ຄັ້ງທີ VI ຂອງຄະນະບໍລິຫານງານສູນກາງພັກ ສະໄໝ XI ຢ່າງເລິກເຊິ່ງ, ເຫັນໄດ້ດ້ານຕັ້ງໜ້າ ແລະ ດ້ານອ່ອນຂໍ້ຄົງຄ້າງ ຂອງແຕ່ລະຂົງເຂດວຽກງານ, ພ້ອມນັ້ນ ຍັງໄດ້ຮັບຮູ້ກ່ຽວກັບວຽກງານຈຸດສຸມໃນການນຳພາ-ຊີ້ນຳ ກອງປະຊຸມຄົບຄະນະຄັ້ງທີ VI ຂອງອົງຄະນະບໍລິຫານງານສູນກາງພັກ ສະໄໝ XI ຮອດ ກອງປະຊຸມຄົບຄະນະ ຄັ້ງທີ VII ຂອງຄະນະບໍລິຫານງານສູນກາງພັກ ສະໄໝ XI ພ້ອມດຽວກັນນັ້ນ, ຕ້ອງອອກແຮງແຂ່ງຂັນກັນສົ່ງເສີມຂະຫຍາຍຈຸດດີ-ດ້ານຕັ້ງໜ້າ ແລະ ສູ້ຊົນແກ້ໄຂຈຸດອ່ອນ-ຂໍ້ຄົງຄ້າງໃຫ້ໝົດເທື່ອລະກ້າວ, ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ມີຄວາມເຊື່ອໝັ້ນຕໍ່ການນຳພາຂອງພັກ, ຕັດສິນໃຈສູ້ຊົນປະຕິບັດແຜນພັດທະນາເສດຖະກິດ-ສັງຄົມ ແລະ ນຳເອົາເນື້ອໃນຈິດໃຈມະຕິດັ່ງກ່າວ ນຳໄປຈັດຕັ້ງປະຕິບັດໜ້າທີ່ວຽກງານໃຫ້ເກີດດອກອອກຜົນ ແລະ ມີຜົນສຳເລັດຕາມຄາດໝາຍວາງໄວ້.

ພາບ ແລະ ໂດຍ ນາງ ປຸ້ຍນິຕາ ເພັງມີໄຊ