(ສປນວ) ໃນລະຫວ່າງວັນທີ 4–5 ມັງກອນ 2023 ສະພາປະຊາຊົນ ນວ ຈັດກອງປະຊຸມສໍາມະນາຮ່າງນິຕິກໍາຂອງ ນວ ຈໍານວນ 4 ສະບັບ ກ່ອນຈະນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນວ ຊຸດທີ II ທີ່ຫ້ອງວ່າການ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນທາມ ພຸດທະວົງສາ ຮອງປະທານ ສະພາປະ ຊາຊົນ ນວ, ມີ ທ່ານ ພູວົງ ວົງຄໍາຊາວ ຮອງເຈົ້າຄອງ ນວ , ບັນດາທ່ານສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງທີ 1 ນວ, ບັນດາທ່ານສະມາຊິກ ສະພາປະຊາຊົນ ນວ ແລະ ຄະນະຮັບຜິດຊອບຮ່າງນະຕິກໍາ ໄດ້ເຂົ້າຮ່ວມ.
ທ່ານ ບຸນທາມ ພຸດທະວົງສາ ໄດ້ກ່າວວ່າ: ໂດຍປະຕິບັດກົດໝາຍວ່າດ້ວຍ ການສ້າງນະຕິກໍາ ແລະ ກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ກໍານົດກ່ຽວກັບກົນໄກຂັ້ນຕອນໃນການພິຈາລະນາບັນດາຮ່າງນິຕິກໍາສໍາຄັນພື້ນຖານຂອງ ນວ ກ່ອນການດໍາເນີນກອງປະຊຸມສະໄໝສາມັນ ຂອງສະພາປະຊາຊົນ ແຕ່ລະຄັ້ງ; ດັ່ງນັ້ນ ເພື່ອເປັນການລະດົມຄວາມຄິດເຫັນຈາກບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໃນນາມເປັນຕົວແທນ ແຫ່ງສິດ ແລະ ຜົນປະໂຫຍດຂອງປະຊາຊົນ ຊາວນະຄອນຫຼວງວຽງຈັນ ໃສ່ບັນດາຮ່າງນິຕິກໍາທີ່ສໍາຄັນ ເພື່ອເປັນການປະກອບ ສ່ວນປັບປຸງເນື້ອໃນບັນດາຮ່າງນິຕິກໍາເຫຼົ່ານັ້ນໃຫ້ມີຄວາມສົມບູນ, ຄົບຖ້ວນ, ຖືກຕ້ອງສອດຄ່ອງກັບລັດຖະທໍາມະນູນ ແລະ ກົດໝາຍ ພ້ອມທັງສອດຄ່ອງກັບສະພາບຈຸດພິເສດ ແລະ ຄວາມເປັນຈິງຂອງ ນວ ກ້າວໄປສູ່ການນໍາສະເໜີບັນດາຮ່າງນິຕິກໍາ 4 ສະບັບ ເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນວ ຊຸດທີ II ທີ່ຈະໄຂຂຶ້ນໃນລະຫວ່າງ ວັນທີ 11-19 ມັງກອນ 2023 ນີ້.
ບັນດາເນື້ອໃນນິຕິກໍາ 4 ສະບັບ ທີ່ຈະຄົ້ນຄວ້າ ແລະ ປຶກສາຫາລື ປະກອບຄໍາຄິດເຫັນໃນການສໍາມະນາຄັ້ງນີ້ ມີຮ່າງນິຕິກຳສ້າງຂຶ້ນໃໝ່ 2 ສະບັບຄື: 1) ຮ່າງລັດຖະບັນຍັດຂອງປະທານປະເທດວ່າດ້ວຍ ນະຄອນຫຼວງ ປະກອບມີ 7 ໝວດ 51 ມາດຕາ; 2) ຮ່າງລັດຖະບັນຍັດຂອງປະທານປະເທດວ່າດ້ວຍ ອາກອນຕົວເມືອງ ປະກອບມີ 10 ໝວດ 31 ມາດຕາ ເພື່ອເປັນການຜັນຂະຫຍາຍມະຕິກົມການເມືອງສູນກາງພັກວ່າດ້ວຍການພັດທະນາ ນວ ໃນໄລຍະໃໝ່ ແລະ ເປັນການຜັນຂະ ຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນວ ໃຫ້ເປັນນິຕິກໍາອັນລະອຽດ. ສ່ວນຮ່າງແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຮອບດ້ານຂອງ ນະຄອນຫຼວງ ເປັນນິຕິກໍາທີ່ເຄີຍພິຈາລະນາຜ່ານມາແລ້ວ, ໄດ້ຮັບຮອງເອົາດ້ານຫຼັກການ ແລະ ໄດ້ສະເໜີໃຫ້ອົງການປົກຄອງ ນວ ໄປຄົ້ນຄວ້າແຜນລະອຽດ ເພື່ອນໍາມາສະເໜີຕໍ່ກອງປະຊຸມຕື່ມ ປະກອບມີ 4 ພາກໃຫຍ່ ແລະ ຮ່າງຂໍ້ຕົກລົງຂອງເຈົ້າຄອງ ນວ ວ່າດ້ວຍການຈັດຕັ້ງປະຕິບັດມາດຕະການສ້າງ ນະຄອນຫຼວງ ສະອາດ (ສ.ສະອາດ) ປະກອບມີ 8 ໝວດ 29 ມາດຕາ ແມ່ນນິຕິກໍາຜັນຂະຫຍາຍນະໂຍບາຍ ສ.ສະອາດ ຂອງ ນວ ທີ່ໄດ້ມີນະໂຍບາຍກ່ອນໜ້ານີ້ແລ້ວ. ( ນາງ ໂຮງທ່າວ ຊົງເຢີ )