ເພື່ອປະຕິບັດພາລະບົດບາດຂອງສະຖາບັນຄົ້ນຄວ້ານິຕິກຳ ສະພາແຫ່ງຊາດ ໃນການເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ກ່ຽວກັບການຄົ້ນຄວ້າ ແລະ ຄຸ້ມຄອງວິທະຍາສາດກ່ຽວກັບການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ; ເປັນໃຈກາງໃນການຍົກສູງຂີດຄວາມສາມາດ ແລະ ສະໜອງຂໍ້ມູນ-ຂ່າວສານ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີປະສິດຕິພາບ ແລະ ປະສິດທິຜົນ.ໃນວັນທີ 9 ສິງຫາ 2023 ນີ້, ທີ່ຫ້ອງປະຊຸມສະພາປະຊາຊົນແຂວງ ອັດຕະປື ໄດ້ມີກອງປະຊຸມ ເກັບກໍາຂໍ້ມູນວຽກງານ ຂອງສະຖາບັນຄົ້ນຄວ້ານິຕິກໍາ ສະພາແຫ່ງຊາດ ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຮອງຫົວໜ້າສະຖາບັນຄົ້ນຄວ້ານິຕິກໍາ ສະພາແຫ່ງຊາດ. ເປັນກຽດເຂົ້າຮ່ວມຂອງ ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານ ຄະນະກໍາມະການ, ຄະນະເລຂາທິການ, ຫົວໜ້າ-ຮອງຂະແໜງ ສະພາປະຊາຊົນແຂວງ ແລະ ຄະນະຈາກສະຖາບັນຄົ້ນຄວ້ານິຕິກໍາ ສະພາແຫ່ງຊາດ ເຂົ້າຮ່ວມ.

ໃນກອງປະຊຸມ, ຈະໄດ້ຮັບຟັງການລາຍງານ ແລະ ແລກປ່ຽນຄວາມຄິດຄວາມເຫັນ ຂໍ້ສະດວກ, ຂໍ້ຄົງຄ້າງ ແລະ ມາດຕະການຈັດຕັ້ງປະຕິບັດວຽກງານຂໍ້ມູນຂ່າວສານ ແລະ ຫ້ອງສະໝຸດ, ການຄົ້ນຄວ້າ ກະກຽມເພື່ອສ້າງຫ້ອງອ່ານ, ການແກະຄໍາເຫັນຜູ້ແທນກອງປະຊຸມ ແລະ ການສ້າງເວັບໄຊຂອງສະພາປະຊາຊົນແຂວງ, ການພິຈາລະນາ ຮັບຮອງເອົານິຕິກໍາທີ່ສໍາຄັນຂອງທ້ອງຖີ່ນ, ການຕິດຕາມກວດກາ ແລະ ການກຳນົດຫົວຂໍ້ຄົ້ນຄວ້າ ແລະ ຝຶກອົບຮົມ; ການປັບປຸງເນື້ອໃນ, ຮູບການ ແລະ ວິທີການຝຶກອົບຮົມຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານທີ່ເປັນເສນາທິການ, ການປັບປຸງກົນໄກ ແລະ ຂອດປະສານງານ ລະຫວ່າງສະຖາບັນຄົ້ນຄວ້ານິຕິກຳສະພາແຫ່ງຊາດ ກັບ ສະພາປະຊາຊົນແຂວງໃຫ້ດີຂຶ້ນກວ່າເກົ່າ.

(ວິນັດ)