(ສພຊ) ເພື່ອຮັບຟັງການສະເໜີ ຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງສະຖາບັນ, ຮ່າງແຜນດໍາເນີນງານການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ ແຕ່ປີ 2023-2025. ໃນວັນທີ 23 ມັງກອນ 2023 ທີ່ສະພາແຫ່ງຊາດ ສະຖາບັນຄົ້ນຄວ້ານິຕິກໍາສະພາແຫ່ງຊາດ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານ ປະຈໍາປີ 2022 ໂດຍການເປັນປະທານຂອງທ່ານ ປອ. ຢ່າງກູ້ ຢ່າງລືໄຊ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນໍາສະຖາບັນຄົ້ນຄວ້ານິຕິກໍາສະພາແຫ່ງຊາດ, ມີບັນດາທ່ານຮອງປະທານກໍາມາທິການ, ຮອງເລຂາທິການສະພາແຫ່ງຊາດ, ບັນດາທ່ານຕາງໜ້າເລຂາທິການສະພາປະຊາຊົນຂັ້ນແຂວງ, ຄະນະສະຖາບັນ, ຄະນະສູນ ແລະ ພະນັກງານ-ລັດຖະກອນ ພາຍໃນສະຖາບັນເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງສະຖາບັນສະພາແຫ່ງຊາດ ແລະ ຜ່ານປະຕິບັດວຽກງານຂອງແຜນພັດທະນາຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານເສນາທິການ ໄລຍະ 5 ປີ ຈາກທ່ານຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ. ຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າ ແລະ ປະກອບຄຳເຫັນ ໃຫ້ມີເນື້ອໃນເລິກເຊິ່ງ, ກວ້າງຂວາງ ແລະ ສອດຄ່ອງກັບຄວາມຕ້ອງການໃນການພັດທະນາວຽກງານຂອງສະຖາບັນ ເປັນຕົ້ນແມ່ນວຽກງານຄົ້ນຄວ້າຫົວຂໍ້ວິທະຍາສາດ, ຫົວຂໍ້ຫຼັກສູດ, ທັກສະຕ່າງໆ, ການເຝິກອົບຮົມການຍົກສູງຂີດຄວາມສາມາດ ແລະ ການສະໜອງຂໍ້ມູນ-ຂ່າວສານ ລ້ວນແຕ່ຕິດພັນກັບພາລະບົດບາດຂອງບັນດາກົງຈັກການຈັດຕັ້ງຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ກອງປະຊຸມຍັງໄດ້ຮັບຟັງການໂອ້ລົມຕໍ່ກອງປະຊຸມຈາກທ່ານ ປອ. ນາງ ສູນທອນໄຊຍະຈັກ ແລະ ພ້ອມທັງຮັບຟັງຮ່າງມະຕິຂອງກອງປະຊຸມ ຈາກທ່ານຫົວໜ້າສູນເຝິກອົບຮົມ ແລະ ຂໍ້ມູນຂ່າວສານ.

(ພາບ ແລະ ຂ່າວ: ສອນສັກ ວັນວິໄຊ)