(ສພຊ) – ຕອນບ່າຍວັນທີ 20 ຕຸລານີ້ ທີ່ຫໍປະຊຸມແຫ່ງຊາດ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ເຮັດວຽກຮ່ວມກັບທ່ານ ໂອເລັກຊານເດີ ເມເຣຈໂກ (Oleksandr Merezhko) ປະທານກໍາມາທິການນະໂຍ ບາຍຕ່າງປະເທດ ແລະ ຮ່ວມມືລັດຖະສະພາສາກົນ, ລັດຖະສະພາອູແກຣນ; ໂອກາດນີ້, ທ່ານ ສັນຍາ ປຣະເສີດ ໄດ້ສະແດງຄວາມປິຕິຍິນດີທີ່ໄດ້ມີໂອກາດພົບປະກັບທ່ານ ໂອເລັກຊານເດີ ເມເຣຈໂກ ໃນໂອກາດທີ່ນຳພາຄະນະຜູ້ແທນເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃນຖານະເປັນຜູ້ສັງເກດການໄອປາ ຕາມການເຊື້ອເຊີນຂອງສະພາແຫ່ງຊາດລາວ ທີ່ເປັນເຈົ້າພາບຈັດກອງປະຊຸມດັ່ງກ່າວ.

ການພົບປະໃນຄັ້ງນີ້ ເປັນການພົບປະຄັ້ງທໍາອິດລະຫວ່າງສອງປະທານກຳມາທິການວຽກງານການຕ່າງປະເທດ ຂອງສອງອົງການນິຕິບັນຍັດ ເຊິ່ງເປັນການປະກອບສ່ວນເຂົ້າໃນການພັດທະນາສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ກໍຄືສອງອົງການນິຕິບັນຍັດ ລາວ-ອູແກຣນ.

ສປປລາວ ແລະ ອູແກຣນ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 17 ກັນຍາ 1992 ນັບແຕ່ນັ້ນມາ, ສອງປະເທດໄດ້ມີການພົວພັນນຳກັນມາຕະຫຼອດ; ສຳລັບການພົວພັນຮ່ວມມືລະຫວ່າງສະພາແຫ່ງຊາດລາວ ແລະ ລັດຖະສະພາອູແກຣນ, ໃນໄລຍະຜ່ານມາ ເຖິງວ່າຍັງບໍ່ທັນມີການແລກປ່ຽນຢ້ຽມຢາມຂອງຄະນະຜູ້ແທນຂັ້ນຕ່າງໆ, ແຕ່ສອງອົງການນິຕິບັນຍັດ ກໍມີການພົບປະກັນໃນໂອກາດເຂົ້າຮ່ວມກອງປະຊຸມຂອງລັດຖະສະພາພາກພື້ນ ແລະ ສາກົນ ເປັນຕົ້ນແມ່ນໃນຂອບຂອງ AIPA, IPU ແລະ ເວທີປຶກສາຫາລືລັດຖະສະພາອື່ນໆ ເຊິ່ງສອງຝ່າຍຫວັງວ່າໃນຕໍ່ໜ້າ ຈະມີການພົວພັນເພື່ອຜົນປະໂຫຍດຂອງປະຊາຊົນສອງຊາດ, ເພື່ອສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ.

(ນາງ ສຸພາວັນ ຫອມສະນິດ)