ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍສະພາແຫ່ງຊາດ (ສສຊ) ແລະ ສະພາປະຊາຊົນຂັ້ນແຂວງ (ສສຂ) ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃນທົ່ວແຂວງ ແລະ ເຮັດໃຫ້ພະນັກງານ-ລັດຖະກອນ, ທະຫານ, ຕຳຫລວດ, ຜູ້ມີສິດເລືອກຕັ້ງ ໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ,ແຜນພັດທະນາເສດຖະກິດ-ສັງຄົມແຫ່ງຊາດ, ກໍ່ຄືແຜນພັດທະນາເສດຖະກິດ – ສັງຄົມຂອງແຂວງ.
ຕອນເຊົ້າວັນທີ 15 ກຸມພາ 2022 ທີ່ ຫໍວັດທະນະທໍາແຂວງ ນຳໂດຍທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ຮອງປະທານສະພາປະຊາຊົນແຂວງ; ພ້ອມດ້ວຍທີມງານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊຳເໜືອ ໄດ້ເຜີຍແຜ່ຜົນສໍາເລັດ ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຫົວພັນ ຊຸດທີ II ເປັນກຽດເຂົ້າຮ່ວມຮັບຟັງ ມີບັນດາທ່ານການນຳແຂວງ, ການນຳເມືອງ, ຫົວໜ້າ, ຮອງຫົວໜ້າພະແນກການ, ພະນັກງານ-ລັດຖະກອນ, ທະຫານ, ຕຳຫຼວດ ເຂົ້າຮ່ວມທັງໝົດ 444 ຄົນ ຍິງ 160 ຄົນ.
ການເຜີຍແຜ່ຄັ້ງນີ້, ບັນດາທ່ານ ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ແຂວງຫົວພັນ ຊຸດທີ II ໄດ້ພັດປ່ຽນກັນ ນຳເອົາເນື້ອໃນ,ຈິດໃຈຜົນສຳເລັດ ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ເປັນຕົ້ນແມ່ນ ມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ; ແຜນງົບປະມານແຫ່ງລັດ; ແຜນພັດທະນາພະລັງງານໄຟຟ້າ ແລະ ບໍ່ແຮ່; ບົດລາຍງານລັດຖະບານກ່ຽວກັບວິໄສທັດ 20 ປີ, ຍຸດທະສາດ 10 ປີ ແລະ ແຜນພັດທະນາເສດຖະກິດດີຈີຕອນແຫ່ງຊາດ 5 ປີ; ຜົນການກວດສອບບົດສະຫລຸບຂາດຕົວງົບປະມານແຫ່ງລັດ; ບົດສະຫລຸບການເຄື່ອນໄຫວວຽກງານປະຈຳປີ2021 ແລະ ທິດທາງແຜນການ ປະຈຳປີ 2022 ຂອງອົງການກວດສອບແຫ່ງລັດ; ບົດລາຍງານຂອງ ສານປະຊາຊົນສູງສຸດ, ອົງການໄອຍະການສູງສຸດ; ການແຕ່ງຕັ້ງສະມາຊິກສະພາຜູ້ພິພາກສາ ຂອງສານປະຊາຊົນສູງສຸດ ແລະ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2021 ແລະ ແຜນການ ປີ 2022 ຂອງ ສະພາແຫ່ງຊາດ ຊຸດທີ IX. ພ້ອມນີ້ຍັງໄດ້ເຜີຍແຜ່ ເນື້ອໃນຈິດໃຈ ຜົນສຳເລັດກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ທີ່ກອງປະຊຸມຮັບຮອງເອົາ ເຊັ່ນ: ການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ ຂອງແຂວງ ປະຈຳປີ 2021 ແລະ ທິດທາງແຜນການ ປີ 2022 ຂອງແຂວງຫົວພັນ, ບົດລາຍງານ ການເຄື່ອນໄຫວວຽກງານຂອງອົງການ ກວດສອບປະຈຳພາກເໜືອ ປະຈຳປີ 2021 ແລະ ທິດທາງແຜນການ ປະຈຳປີ 2022, ບົດລາຍງານຜົນການກວດສອບ ບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານ ຂອງແຂວງຫົວພັນ ປີ 2020 ແລະ ເອກະສານລາຍງານການເງິນ ຂອງລັດວິສາຫະກິດນ້ຳປະປາ ແຂວງຫົວພັນ ປະຈໍາປີ 2020, ບົດລາຍງານ ຂອງອົງການກວດກາລັດ ກ່ຽວກັບການກວດກາ ຕາມຜົນຂອງການກວດສອບ ຂອງແຂວງຫົວພັນ, ຈັດຕັ້ງປະຕິບັດວຽກງານປະຈໍາປີ 2021 ແລະ ທິດທາງແຜນການ ປີ 2022 ຂອງອົງການໄອຍະການປະຊາຊົນ ແລະ ສານປະຊາຊົນ ແຂວງຫົວພັນ ແລະ ບົດລາຍງານ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານ ຂອງສະພາປະຊາຊົນ ແຂວງຫົວພັນ ປະຈຳປີ 2021 ແລະ ທິດທາງແຜນການ ປີ 2022 ລາຍງານຕໍ່ພະນັກງານ-ລັດຖະກອນ, ທະຫານ, ຕຳຫລວດໃຫ້ຮັບຮູ້ ແລະ ເຂົ້າໃຈ ຕໍ່ຜົນສຳເລັດຂອງສອງກອງປະຊຸມ ທີ່ໄດ້ຮັບຮອງໄປແລ້ວນັ້ນ ພ້ອມກັນນຳໄປຈັດຕັ້ງປະຕິບັດໃຫ້ປາກົດຜົນເປັນຈິງ .