ລະຫວ່າງ ວັນທີ 4 ແລະ ວັນທີ 6 ກັນຍາ 2024 ນີ້, ສສຊ ແລະ ສສຂ ສືບຕໍ່ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ນຳໂດຍ ທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າ ສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ; ພ້ອມດ້ວຍບັນດາທ່ານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊຽງຄໍ້ ແລະ ເມືອງ ຫົວເມືອງ ເຊິ່ງເຄື່ອນໄຫວຢູ່ 2 ຈຸດຄື: ບ້ານໂພນທອງ (ເມືອງຊຽງຄໍ້) ແລະ ບ້ານອຸໄທ (ເມືອງຫົວເມືອງ). ເຂົ້າຮ່ວມຮັບຟັງມີ ພໍ່ແມ່ປະຊາຊົນບັນດາເຜົ່າ ທັງສອງບ້ານເຂົ້າຮ່ວມ 196 ຄົນ ຍິງ 71 ຄົນ.

        ການເຜີຍແຜ່ຄັ້ງນີ້, ບັນດາທ່ານ ສສຊ ແລະ ສສຂ ໄດ້ພັດປ່ຽນກັນນຳເອົາເນື້ອໃນຈິດໃຈຜົນສຳເລັດຂອງ 2 ກອງປະຊຸມ ສະເໜີໃຫ້ຜູ້ເຂົ້າຮ່ວມໄດ້ ໃຫ້ຮັບຮູ້ ແລະ ເຂົ້າໃຈ ຕໍ່ຜົນສຳເລັດຂອງສອງກອງປະຊຸມດັ່ງກ່າວ. ພ້ອມທັງ ເປີດໂອກາດໃຫ້ຜູ້ເຂົ້າຮ່ວມສະເໜີຂໍ້ຂ້ອງໃຈ ເພື່ອເປັນການແລກປ່ຽນບັນຫາຕ່າງໆ ທີ່ຕິດພັນກັບການດຳລົງຊີວິດທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ ສສຊ ແລະ ສສຂ ນຳໄປຄົ້ນຄວ້າ ແລະ ປະສານສົມທົບກັບພາກສ່ວນກ່ຽວຂ້ອງພິຈາລະນາ ແລະ ແກ້ໄຂຕາມຄວາມເໝາະສົມ. ພ້ອມທັງໂອ້ລົມ ແລະ ຊຸກຍູ້ໃຫ້ ພໍ່ແມ່ປະຊາຊົນ ປັບປຸງແບບແຜນ ການດຳລົງຊີວິດຕາມແບບໃໝ່ ແລະ ເອົາໃຈໃສ່ ສ້າງເສດຖະກິດຄອບຄົວ ດ້ວຍການປູກຝັງ, ລ້ຽງສັດ ແລະ ບໍລິການອື່ນ ໃຫ້ກາຍເປັນສິນຄ້າ ທີ່ຖືກຕ້ອງຕາມລະບຽບກົດໝາຍ ເພື່ອສ້າງລາຍຮັບເຂົ້າສູ່ຄອບຄົວ, ເຮັດໃຫ້ໃຫ້ຄອບຄົວ ກໍຄືພາຍໃນບ້ານ ຫຼຸດພົ້ນອອກຈາກຄວາມທຸກຍາກ, ພ້ອມກັນສາມັກຄີ ຮັກແພງຊ່ວຍເຫຼືອເຊິ່ງກັນ ແລະ ກັນ, ມີຄວາມກ້າຫານໃນການຊອກຮູ້ຫາຮຽນ ເອົາປະສົບການໃໝ່ມາພັດທະນາປະເທດຊາດບ້ານເມືອງຂອງຕົນເອງ ໃຫ້ມີຄວາມກ້າວໜ້າຂຶ້ນເລື້ອຍໆ.