ໃນລະຫວ່າງວັນທີ 3-6 ກັນຍາ 2024 ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ນໍາໂດຍທ່ານ ເລື່ອນວິໄລ ຈັນທະລາພັນ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊັນ, ການນໍາຂອງເມືອງ ແລະ ພະນັກງານຊ່ວຍວຽກຈໍານວນໜຶ່ງ ໄດ້ລົງພົບປະປະຊາຊົນ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ຂອງສະພາປະຊາຊົນແຂວງ (ສພຂ) ຊຸດທີ II ໃຫ້ປະຊາຊົນໄດ້ຮັບຮູ້ບັນດາເນື້ອໃນສໍາຄັນຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະພາ ທັງເປັນການຢ້ຽມຢາມ-ຖາມຂ່າວ, ຟັງຄໍາຄິດເຫັນ ແລະ ຄໍາສະເໜີຂອງພໍ່ແມ່ປະຊາຊົນຢູ່ 4 ບ້ານຂອງເມືອງປາກຊັນຄື: ບ້ານ ບົວແວງຄໍາ, ບ້ານ ນາດີ , ບ້ານ ໂນນອຸດົມ, ບ້ານ ສີສະອາດ ເຊິ່ງມີຫ້ອງການທີ່ກ່ຽວຂ້ອງ ຕະຫຼອດຮອດພໍ່ແມ່ປະຊາຊົນຜູ້ມີສິດເລືອກຕັ້ງພາຍໃນບ້ານເຂົ້າຮ່ວມຢ່າງພ້ອມພຽງ.

ການລົງເຄື່ອນໄຫວເຜີຍແຜ່ໃນຄັ້ງນີ້ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບຈຸດພິເສດທີ່ຕັ້ງ, ການຊີ້ ນໍາໆພາຂອງອົງການປົກຄອງ ແລະ ການພັດທະນາເສດຖະກິດ-ສັງຄົມໃນໄລຍະຜ່ານມາ ພ້ອມຄຳສະເໜີຈາກທ່ານນາຍ ບ້ານຂອງແຕ່ລະບ້ານ ທີ່ພົວພັນກັບຫຼາຍບັນຫາ ເພື່ອຂໍທິດຊີ້ນໍາ ແລະ ຊຸກຍູ້ພາກສ່ວນທີ່ກ່ຽວຂ້ອງແກ້ໄຂຊ່ວຍຕາມຄວາມເໝາະສົມ.

ຈາກນັ້ນ, ສະມາຊິກສະພາ ກໍໄດ້ຜັດປ່ຽນກັນຂຶ້ນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ສພຂ ຊຸດທີ II ໂດຍໄດ້ຍົກໃຫ້ເຫັນບັນຫາສໍາຄັນຕ່າງໆທີ່ໄດ້ຄົ້ນຄວ້າ, ພິຈາລະນາ, ຮັບຮອງເອົາ ແລະ ບັນດາເນື້ອໃນຕ່າງໆທີ່ ສສຊ, ສສຂ ໄດ້ສະເໜີຕໍ່ກອງປະຊຸມ ໂດຍສະເພາະບັນດາປາກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ກໍຄືແຂວງບໍລິຄໍາໄຊ; ພ້ອມກັນນັ້ນ, ກໍໄດ້ຮັບຟັງຄຳສະເໜີຈາກພໍ່ແມ່ປະຊາຊົນ ແລະ ຮັບເອົາຄໍາຄິດຄໍາເຫັນ, ຄໍາສະເໜີຂັດ ຂ້ອງໝອງໃຈຂອງປະຊາຊົນ ເພື່ອນໍາໄປຄົ້ນຄວ້າ, ພິຈາລະນາ ແລະ ສະເໜີຕໍ່ອົງການປົກຄອງແຂວງ-ເມືອງ ເພື່ອແກ້ໄຂ ແລະ ອະທິບາຍ-ຊີ້ແຈງໃຫ້ປະຊາຊົນຮັບຊາບ.

ຂ່າວ: ໂສລະຢ໋າ; ພາບ: ດາວເຮືອງ