ໃນລະຫວ່າງວັນທີ 5-9 ກຸມພາ 2024 ທ່ານ ຄຳມະນີ ໄຊດວງຕາ ສະມາຊິກສະພາແຫ່ງຊາດ ເຂດເລືອກຕັ້ງທີ່ 04 ແຂວງ ອຸດົມໄຊ ແລະ ທ່ານ ນາງ ບົງພອນ ແກ້ວມະນີ ສະມາຊິກສະພາປະຊາຊົນແຂວງ ເຂດເລືອກຕັ້ງເມືອງ ນາໝໍ້ ພ້ອມດ້ວຍຄະນະ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ເນື້ອໃນຜົນສໍາເລັດກອງປະຊຸມ ສະໄໝສາມັນເທື່ອທີ 6 ຂອງ​ສະພາ​ແຫ່ງ​ຊາດ​ຊຸດ​ທີ IX ​ແລະ ສະພາ​ປະຊາຊົນ​ແຂວງ​ ຊຸດ​ທີ II ຢູ່ເຂດນ້ຳແຊຕອນໃຕ້ ເຊິ່ງປະກອບມີບ້ານ ຫ້ວຍແຮ,​ນ້ຳຕອງ, ຫ້ວຍຮ່າ, ພູອົມ, ພູເອືອດ, ນາຂາມ, ຫົວນ້ຳຂາມ, ນ້ຳແຊ ແລະບັນດາຫ້ອງການອ້ອມຂ້າງເທດສະບານເມືອງນາໝໍ້ ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກພໍ່ແມ່ປະຊາຊົນ ແລະ ບັນດາພາກສ່ວນທີ່ກ່ຽວຂ້ອງໃຫ້ການເຂົ້າຮ່ວມຢ່າງພ້ອມພຽງ.

ການລົງພົບປະຄັ້ງນີ້ ແມ່ນໄດ້ຮັບຟັງການເຜີຍແຜ່ບັນດາເນື້ອໃນຜົນສໍາເລັດ ຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃຫ້ຜູ້ມີສິດເລືອກຕັ້ງ ເພື່ອໃຫ້ຮັບຮູ້ ແລະ ເຂົ້າໃຈກ່ຽວກັບເນື້ອໃນຂອງ 2 ກອງປະຊຸມດັ່ງກ່າວເປັນຕົ້ນ: ແຜນພັດທະນາເສດຖະກິດ-ສັງຄົມ,​ ແຜນງົບປະມານ,​ ວຽກງານຂອງອົງການກວດກາລັດ,​ ອົງການກວດສອບ,​ ສານ, ອົງການໄອຍະການ,​ ວຽກງານຂອງສະພາປະຊາຊົນແຂວງ ແລະ ວຽກງານນິຕິກຳໃຕ້ກົດໝາຍທີ່ໄດ້ຮັບຮອງ,​ ພ້ອມນັ້ນ ກໍໄດ້ເນັ້ນຫນັກໃສ່ວຽກງານການຖາງປ່າເຮັດໄຮ່ຢ່າງຊະຊາຍ,​ ການຖາງປ່າແກ່,​ ກົດລະບຽບ ແລະ ການປັບໄຫມຕໍ່ຜູ້ລະເມີດ,​ ຄຳສັ່ງເລກທີ 999 ຂອງເຈົ້າແຂວງ ໂດຍສະເພາະແມ່ນການປະຢັດ ຕ້ານການຟຸມເຟືອຍ ແລະ ວຽກງານຢາເສບຕິດ ທີ່ກຳລັງເປັນບັນຫາໃນການດຳລົງຊີວິດຂອງພໍ່ແມ່ປະຊາຊົນ.​  

ນອກຈາກນັ້ນ,​ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ຮັບຟັງຄຳສະເໜີ,​ ຄວາມຂັດຂ້ອງໝອງໃຈຂອງພໍ່ແມ່ປະຊາຊົນ ແລະ ໄດ້ຊີ້ແຈງກັບທີຕໍ່ກັບບັນດາຂໍ້ສະເໜີຕ່າງໆ ເປັນຕົ້ນ ບັນຫາຄາຄອງຊີບ, ການຄຸ້ມຄອງລາຄາສິນຄ້າ,​ ວຽກງານພື້ນຖານໂຄງລ່າງ ແລະອື່ນໆ ພ້ອມນັ້ນ ກໍໄດ້ນຳເອົາບາງຄໍາສະເໜີທີ່ກ່ຽວພັນເຖິງຂັ້ນເມືອງ ແລະ ຂັ້ນແຂວງ ມາພິຈາລະນາສະເໜີຕໍ່ພາກສ່ວນກ່ຽວຂອງແກ້ໄຂໃນຂັ້ນຕໍ່ໄປ ຕາມພາລະບົດບາດ,​ ສິດ ແລະ ຫນ້າທີ່.