(ສພຊ) ​ໂດຍ​ປະຕິບັດຕາມ​ວາລະ​ດຳ​ເນີນ​ກອງ​ປະຊຸມ​ສະ​ໄໝສາມັນເທື່ອ​ທີ 4 ຂອງສະພາ​ແຫ່ງ​ຊາດ ​ຊຸດ​ທີ VIII, ​ໃນ​ວັນ​ທີ 20-23 ຕຸລາ 2017, ທີ່​ຫ້ອງ​ປະຊຸມ​ສະພາ​ແຫ່ງ​ຊາດ ຫລັກ 6;  ​ເຂົ້າ​ຮ່ວມ​ ເຂົ້າ​ຮ່ວມມີ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ,​ ທ່ານ ລັດຖະມົນຕີ ​ແລະ ​ສະມາຊິກ​ສະພາ​​ແຫ່ງ​ຊາດ (ສສຊ) ຊຸດ​ທີ VIII ປະຈຳ​ 18 ເຂດ​ເລືອກ​ຕັ້ງ​ໃນ​ທົ່ວ​ປະ​ເທດເຂົ້າ​ຮ່ວມ.

​ໃນ​ວາລະຕອນ​​ເຊົ້າຂອງກອງປະຊຸມ ວັນສຸກທີ 20 ຕຸລາ 2017 ​ໂດຍ​ການ​ເປັນ​ປະທານ​ຂອງ​ທ່ານ ພົທ. ​ແສງ​ນວນ ​ໄຊ​ຍະ​ລາດ ຮອງ​ປະທານ​ສະພາ​ແຫ່ງ​ຊາດ; ບັນດາທ່ານ ສສຊ ໄດ້​ສືບຕໍ່​ປະກອບ​ຄຳ​ເຫັນຕໍ່ບົດ​ລາຍ​ງານ​ຂອງ​ອົງການ​ກວດ​ສອບ​ແຫ່ງ​ລັດ ​ແລະ​ ບົດ​ລາຍ​ງານ​ຂອງ​ອົງການ​ກວດກາ​ລັດຖະບານ; ​ໃນ​ວາລະຕອນ​ບ່າຍ​ຂອງ​ວັນ​ດຽວກັນ ​ໂດຍ​ການ​ເປັນ​ປະທານຂອງທ່ານ ນາງ ປານີ ຢາ​ທໍ່ຕູ້ ປະທານ​ສະພາ​ແຫ່ງ​ຊາດ; ​ມີ ທ່ານ ສຸພັນ ​ແກ້ວ​ມີ​ໄຊ ກະຊວງ​ແຜນການ ​ແລະ​ ການ​ລົງທຶນ; ທ່ານ ນາງ ​ແສງ​​ເດືອນ ຫລ້າ​ຈັນທະ​ບູນ ກະຊວງ​ສຶກສາ​ທິການ ​ແລະ​ ກິລາ ​ແລະ ທ່ານ ບຸນ​ກອງ ສີ​ຫາ​ວົງ ກະຊວງ​ສາ​ທາ​ລະນະ​ສຸກ ​ໄດ້​ຊີ້​ແຈງ​ຕໍ່ຄຳ​ຊັກ​ຖາມ​ຂອງ​ສະມາ​ຊິກ​ສະພາ​ແຫ່ງ​ຊາດ ​ໃນ​ນັ້ນ​ຊີ້​ແຈງ​ຕາມ​ຄຳ​ຊັກ​ຖາມ ​ແລະ​ຊີ້​ແຈງ​ກັບ​ທີ່.

​​ໃນ​ຕອນ​ເຊົ້າ​ວັນ​ຈັນ​ທີ 23 ຕຸລາ 2017 ​ໂດຍ​ການ​ເປັນ​ປະທານ​ຂອງ​ທ່ານ ພົທ. ​ແສງ​ນວນ ​ໄຊ​ຍະ​ລາດ ຮອງ​ປະທານ​ສະພາ​ແຫ່ງ​ຊາດ; ຈາກ​ນັ້ນ​ບັນດາ​ກະຊວງ​, ອົງການ ໄດ້​ຂຶ້ນມາ​ຊີ້​ແຈງ​ຕໍ່ຄຳ​ຊັກ​ຖາມ​ຂອງ ສສຊ ​ເຊິ່ງມີ ​ທ່ານ ນາງ ວັ​ດທະນາ ດາລາ​ລອຍ​ ຮອງ​ຜູ້​ວ່າການ​ທະນາຄານ​ແຫ່ງ ສປປລາວ; ທ່ານ​ ຄຳ​ມະນີ ອິນ​ທິລາດ ລັດຖະມົນຕີ​ກະຊວງ​ພະລັງງານ ​ແລະ ບໍ່​ແຮ; ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ​ກະຊວງ​​ແຮງ​ງານ ​ແລະ ສະຫວັດ​ດີກາ​ນສັງຄົມ; ທ່ານ ສົມ​ດີ ດວງ​ດີ ຮອງ​ນາຍົກ​ລັດຖະມົນຕີ, ລັດຖະມົນ​ຕີ​ກະຊວງ​ການ​ເງິນ; ທ່ານ ນາງ ວຽງທອງ ສີ​ພັນ​ດອນ ປະທານ​ອົງ​ກວດ​ສອບ​ແຫ່ງ​ລັດ; ທ່ານ ບຸນ​ທອງ ຈິດ​ມະນີ ຮອງ​ນາຍົກລັດຖະມົນຕີ,​ ປະທານ​ອົງການ​ກວດກາ​ລັດຖະບານ.

​ໃນ​ຕອນ​ບ່າຍ​ຂອງ​ວັນ​ດຽວກັນ ​ໂດຍ​ການ​ເປັນ​ປະທານ​ຂອງ​ທ່ານ ນາງ ປານີ ຢາ​ທໍ່ຕູ້ ປະທານ​ສະພາ​ແຫ່ງ​ຊາດ; ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ໄດ້​ຂຶ້ນຊີ້​ແຈງ​ຕໍ່ຄຳ​ຊັກ​ຖາມ​ຂອງສະມາຊິກ​ສະພາ​ແຫ່ງ​ຊາດ ກ່ຽວກັບ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ, ​ແຜນ​ເງິນຕາ, ການ​ແກ້​ໄຂ​ຜົນ​ການກວດ​ສອບ ​ແລະ​ ຊີ້​ແຈງ​ຕາມ​ຄຳ​ຊັກ​ຖາມ​ທີ່​ສົ່ງ​ໃຫ້; ຈາກ​ນັ້ນ ທ່ານ​ ນາງ ປານີ ຢາ​ທໍ່ຕູ້ ປະທານ​ກອງ​ປະ​ຊຸມ ​ໄດ້​ສະຫລຸບ​ສັງ​ລວມການ​ປະກອບ​ຄຳ​ເຫັນ ຕໍ່​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ, ​ແຜນ​ເງິນຕາ; ສະຫລຸບ​ສັງ​ລວມການ​ປະກອບ​ຄຳ​ເຫັນ​ຕໍ່ບົດ​ສະຫລຸບ​ຂາດ​ຕົວ; ທ່ານ ນາງ ສວນ​ສະຫວັນ ວິ​ຍະ​ເກດ ​ເລຂາທິການ​ສະພາ​ແຫ່​ງຊາດ ​ໄດ້​ຂຶ້ນຜ່ານ​ມະຕິກອງ​ປະຊຸມສະພາ​ແຫ່ງ​ຊາດ ວ່າ​ດ້ວຍ​ການ​ຮັບຮອງ​ເອົາຕາມຜົນການກວດສອບ ສົກປີ 2013-2014 ແລະ ບົດລາຍງານຍສືບຕໍ່ແກ້ໄຂຜົນການກວດກາຕາມຜົນກວດສອບ ບົດສະຫລຸບຂາດຕົວ 2014-2015, ບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016, ບົດສະຫລຸບການເຄື່ອນໄຫວວຽກງານຂອງອົງການກວດສອບ ແຫ່ງລັດປະຈໍາປີ 2017 ແລະ ທິດທາງແຜນການເຄື່ອນໄຫວປີ 2018; ຕອນ​ທ້າຍ​ຂອງ​ກອງ​ປະຊຸມ​ປະທານ​ກອງ​ປະຊຸມ​ໄດ້​ສະ​ເໜີ ສສຊ ລົງ​ຄະ​​ແນນ​ສຽງຮັບຮອງ​ເອົາ​ມະຕິ​ກອງ​ປະ​ຊຸມ​ວ່າ​ດ້ວຍ​ການ​ຮັບຮອງ​ເອົາ​ບົດ​ລາຍ​ງານ​ຂອງ​ອົງການ​ກວດ​ສອບ​ແຫ່ງ​ລັດ ​ແລະ ບົດ​ລາຍ​ງານ​ຂອງ​ອົງການ​ກວດກາ​ລັດຖະບານ​ ລວມຄະ​ແນນ​ສຽງ 131 ທ່ານ,​​ ​ເຫັນ​ດີ 113 ທ່ານ, ບໍ່​ເຫັນ​ດີ 16 ທ່ານ ​ແລະ ບໍ່ອອກສຽງ 2 ທ່ານ.