ກອງປະຊຸມກອງປະຊຸມເພື່ອລະດົມແນວຄິດກ່ຽວກັບການແກ້ໄຂບັນຫາທາງດ້ານເສດຖະກິດ-ສັງຄົມ ແລະ ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນສະພາບການແຜ່ລະບາດຂອງພະຍາດໂຄວິດ-19 ກອງປຊຸມດັ່ງກ່າວໄດ້ຈັດຂຶ້ນໃນວັນທີ 6 ເມສາ 2022 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານຄະນະປະຈໍາສະພາແຫ່ງຊາດ ເປັນກຽດເຂົ້າຮ່ວມໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີທ່ານ ປະທານ-ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດ, ພ້ອມດ້ວຍບັນດາທ່ານ ຕາງໜ້າຈາກ 8 ກະຊວງໃນຂົງເຂດເສດຖະກິດ, ຕາງໜ້າໃຫ້ສະຖາບັນເສດຖະກິດ-ສັງຄົມແຫ່ງຊາດ, ສະພາການຄ້າ ແລະ ອຸດສາຫະກຳ ແຫ່ງ ສປປລາວ, ຕາງໜ້າ UNDP ປະຈໍາ ສປປ ລາວ ແລະ ສະມາຊິກສະພາແຫ່ງຊາດ ທີ່ເປັນກຳມະການຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໃນຂອບເຂດທົ່ວປະເທດ ແລະ ພາກສ່ວນທີ່ກ່ຽວຂ້ອງ. ສຳລັບ ແຂວງຄໍາມ່ວນ ເຂົ້າຮ່ວມຜ່ານລະບົບ ວີດີໂອທາງໄກ ໂດຍມີ ທ່ານ ສະເຫຼີມສັກ ແກ້ວຈັນທະລາ ເລຂາທິການສະພາປະຊາຊົນແຂວງ ທັງເປັນ ກຳມະການຂອງກຳມະທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍ ທ່ານ ນາງ ສາທິດ ຈັນສີ ຄະນະປະຈໍາສະພາປະຊາຊົນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ ເຂົ້າຮ່ວມ.
ໃນກອງປະຊຸມ ທ່ານ ໄຊສົມພອນ ພົມວິຫານ ປະທານກອງປະຊຸມໄດ້ກ່າວຈຸດປະສົງຂອງການເປີດກອງປະຊຸມໃນຄັ້ງນີ້ ກໍ່ເພື່ອເປັນການລະດົມແນວຄວາມຄິດກ່ຽວກັບການແກ້ໄຂບັນທາງດ້ານເສດຖະກິດ-ສັງຄົມ ແລະ ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍເລັງໃສ່ 4 ບັນຫາໃຫ່ຍ ຄື: ຊອກຫາມາດຕະການ ແລະ ນຳໃຊ້ທ່າແຮງອັນບົ່ມຊ້ອມ; ວາງມາດຕະການໃນການຈັດຕັ້ງປະຕິບັດບັນດາຄາດໝາຍ ທີ່ໄດ້ກຳນົດໄວ້ໃນມະຕິ ກອງປະຊຸມສະພາແຫ່ງຊາດ ສະບັບເລກທີ ສະບັບເລກທີ 12/ສພຊ, ລົງວັນທີ 4 ພະຈິກ 2022 ທີ່ຕິດພັນກັບວຽກງານຂະແໜງການອຸດສະຫະກໍາ ແລະ ການຄ້າ, ຂະແໜງກະສິກໍາ ແລະ ປ່າໄມ້; ແຜນດໍາເນີນກິດຈະການພັດທະນາທາງດ້ານ ໂຄງລ່າງພື້ນຖານ ເປັນຕັ້ນ ລະບົບໂລຈິດຕິກ, ຄົມມະນາຄົມ ແລະ ຂົນສົ່ງໃນການນໍາໃຊ້ເສັ້ນທາງລົດໄຟລາວ-ຈີນ; ຊອກວິທີ ແລະ ມາດຕະການ ໃນການແກ້ໄຂສະພາບເສດຖະກິດ ໃນຊ້ວງທີ່ມີການແຜ່ລະບາດຂອງພະຍາດໂຄວິດ 19 ໃນປັດຈຸບັນ. ໂອກາດດຽວກັນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຜູ້ຊີ້ນໍາວຽກງານຂົງເຂດເສດຖະກິດ ໄດ້ມີຄໍາເຫັນ ແລະ ລາຍງານຫຍໍ້ຕໍ່ກອງປະຊຸມ ກ່ຽວກັບສະພາບການ ແລະ ການຈັດຕັ້ງປະຕິບັດວຽກງານ ກໍຄືການຈັດຕັ້ງປະຕິບັດການແກ້ໄຂບັນຫາຄວາມຍຸ້ງຍາກທາງດ້ານເສດຖະກິດ-ສັງຄົມ ແລະ ການຈັດຕັ້ງປະຕິບັດວາລະແຫ່ງຊາດ. ຈາກນັ້ນ, ບັນດາທານຜູ້ແທນກອງປະຊຸມໄດ້ລາຍງານ ແລະ ປະກອບຄໍາຄິດເຫັນ ຕາມຫົວຂໍຄໍາຖາມເຈາະຈີ້ມທີ່ປະທານກອງປະຊຸມໄດ້ນໍາສະເໜີ ເພື່ອເຮັດໃຫ້ບັນດາເນື້ອໃນທີ່ນໍາມາພິຈາລະນາໃນກອງປະຊຸມຄັ້ງນີ້ ບັນລຸຜົນສໍາເລັດຕາມຄາດໝາຍ ແລະ ສາມາດນໍາໄປຈັດຕັ້ງປະຕິບັດຢ່າງມີປະສິດທິຜົນ.
( ອາລີ )