ວັນທີ 14 ກຸມພາ 2023 ນີ້ທີ່ຫ້ອງປະຊຸມຊັ້ນ 3 ສະພາປະຊາຊົນແຂວງຫົວພັນໄດ້ເປີດກອງປະຊຸມປະຈຳປີ 2022 ຂອງຄະນະສະມາຊິກສະພາແຫ່ງຊາດ(ສສຊ)ປະຈຳເຂດເລືອກຕັ້ງທີ 8 ແຂວງຫົວພັນ ຂຶ້ນ ໂດຍການເປັນປະທານຂອງທ່ານ ນາງອຳໄພວອນ ລ້ອມບຸນແພງ ກຳມະການສຳຮອງສຸນກາງພັກ, ຮອງເລຂາພັກແຂວງ, ປະທານຄະນະ ສສຊປະຈຳເຂດເລືອກຕັ້ງທີ8, ປະທານສະພາປະຊາຊົນແຂວງຫົວພັນ, ເຂົ້າຮ່ວມມີຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8, ອາດີດ ສສຊ ປະຈຳເຂດເລືອກຕັ້ງ, ຄະນະປະຈຳພັກແຂວງ, ຄະນະປະຈຳສະພາປະຊາຊົນແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ຫົວໜ້າພະແນກການ, ອົງການທຽບເທົ່າຂັ້ນແຂວງ, ກອງບັນຊາການ ປກຊ-ປກສ ແລະ ວິຊາການຂະແໜງວຽກງານຄະນະສະມາຊິກສະມາຊິກສະພາແຫ່ງຊາດປະຈຳເຂດເລືອກຕັ້ງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ໄດ້ຮັບຟັງການລາຍງານການຈັດຕັ້ງປະຕິບັດການເຄື່ອນໄຫວວຽກງານປະຈຳປີ 2022 ແລະ ທິດທາງແຜນການເຄື່ອນໄຫວວຽກງານປະຈຳປິ 2023 ຂອງຄະນະ ສສຊ ປະຈຳເຂດເລືອກຕັ້ງທີ 8 ແຂວງຫົວພັນ ແລະ ຮັບຟັງການລາຍງານຫຍໍ້ຜົນສຳເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ຈາກນັ້ນຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດຄຳເຫັນໃສ່ຮ່າງບົດລາຍງານຢ່າງມີຈຸດສຸມຕໍ່ກັບວຽກງານການເຄື່ອນໄຫວ ຂອງຄະນະ ສສຊ ໃນບາງດ້ານທີ່ຍັງເຫັນວ່າບໍ່ທັນບັນລຸຕາມແຜນການວາງໄວ້ຕາມພາລະບົດບາດສິດ ແລະ ໜ້າທີ່ຕາມກົດໝາຍ ກຳນົດ ເປັນຕົ້ນດ້ານການຕິດຕາມກວດກາ, ການລົງພົບປະຜູ້ມີສິດເລືອກຕັ້ງຍັງເຄື່ອນໄຫວໄດ້ໜ້ອຍ, ບໍທັນທົ່ວເຖິງໂດຍສະເພາະແມ່ນເຂດຊົນນະບົດຫ່າງໄກຊອກຫຼີກຍັງມີຫຼາຍບ້ານບໍໄປຮອດໄປເຖິງເນື່ອງຈາກວ່າມີຫຼາຍປັດໃຈ ພ້ອມດຽວກັນນີ້ຜູ້ແທນເຂົ້າຮ່ວມກອງປະຊຸມໄດ້ພ້ອມກັນຮັບຮອງເອົາການເຄື່ອນໄຫວວຽກງານປະຈຳປີ 2022 ແລະທິດທາງແຜນການປະຈຳປີ 2023ຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ

ຕອນທ້າຍ, ທ່ານນາງອໍາໄພວອນ ລ້ອມບຸນແພງ ປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານຄະນະ ສສຊທີ່ ສາມາດຈັດຕັ້ງປະຕິບັດຕາມພາລະບົດບາດຂອງຕົນໃນໄລຍະ 1 ປີຜ່ານມາເຫັນວ່າມີຫຼາຍດ້ານພົ່ນເດັນ ແລະ ມີຜົນສຳເລັດແຕ່ເຖິງຢ່າງໃດກໍຕາມ ຍັງມີບາງດ້ານທີ່ຈະໄດ້ສືບຕໍ່ເອົາໃຈໃສ່ປັບປຸງ, ແກ້ໄຂໃນຕໍ່ໜ້າເປັນຕົ້ນ: ກົນໄກການປະສານງານ, ແບບແຜນການເຄື່ອນໄຫວວຽກງານ ລະຫວ່າງ ຄະນະ ສສຊ ປະຈຳເຂດເລືອກຕັ້ງ ກັບ ອົງການປົກຄອງແຂວງ ແລະ ຂະແໜງການກ່ຽວຂ້ອງ ໃຫ້ດີຂື້ນກ່ວາເກົ່າ, ພ້ອມນີ້ ທ່ານຍັງໄດ້ຮຽກຮ້ອງໃຫ້ຄະນະ ສສຊ ປະຈຳເຂດເລືອກຕັ້ງຈົ່ງພ້ອມກັນເອົາໃຈໃສ່ເຄືື່ອນໄຫວຕາມພາລະບົດບາດທີ່ໄດ້ກຳນົດໄວ້ໃນກົດໝາຍ ໃນນາມເປັນຕົວແທນແຫ່ງສິດແລະຜົນປະໂຫຍດຂອງປະຊາຊົນບັນດາເຜົ່າ ໃຫ້ນັບມື້ນັບດີຂຶ້ນເປັນກ້າວໆ.