ໃນລະຫວ່າງວັນທີ 31 ມັງກອນ ຫາ 6 ກຸມພາ 2024, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17 (ສສຊ ເຂດ17)ແຂວງອັດຕະປື ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX. ຢູ່ທີ່ຫໍປະຊຸມໃຫ່ຍຂອງແຂວງ, ຫ້ອງປະຊຸມສະພາປະຊາຊົນແຂວງ (ສພຂ), ແລະ ໂຮງຮຽນການເມືອງ ແລະ ການປົກຄອງແຂວງ, ກອງບັນຊາການ ປກຊ ແຂວງ ແລະ ໂຮງຮຽນເຕັກນິກວີຊາຊີບ ນໍາໂດຍ ທ່ານ ນາງ ມີນາພອນ ໄຊສົມພູ ປະທານ ສພຂ ທັງເປັນປະທານ ສສຊ ເຂດ17, ພ້ອມດ້ວຍຄະນະ ສສຊ ເຂດ17, ຜູ້ເຂົ້າຮ່ວມມີບັນດາທ່ານຄະນະປະຈໍພັກແຂວງ, ກໍາມະການພັກແຂວງ, ສະມາຊິກສະພາປະຊາຊົນແຂວງ (ສສຂ), ພາກສ່ວນພະແນກການ, ກໍາລົງ ປກຊ-ປກສ, ອົງການທຽບເທົ່າ, ພະນັກງານບໍານານ, ລັດວິສະຫະກິດໄຟຟ້າ-ນໍ້າປະປາ,ນັກຮຽນນັກສືກສາໂຮງຮຽນການເມືອງ ແລະການປົກຄອງ, ໂຮງຮຽນເຕັກນິກວີຊາຊີບ ແລະ ທະນາຄານເຂົ້າຮ່ວມ 400 ກວ່າທ່ານ.
ເນື້ອໃນເອກະສານທີ່ນໍາມາເຜີຍແຜ່ປະກອບດ້ວຍມະຕິທີ່ໄດ້ພິຈາລະນາ,ຮັບຮອງໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ເປັນຕົ້ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄຫມ 5 ປີ(2021-2025) ແລະ ທິດທາງແຜນການທ້າຍສະໄຫມ ຮອດປີ 2025, ການຈັດຕັ້ງປະຕິບັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງລັດຖະບານ; ການຈັດຕັ້ງປະຕິບັດແຜນງົບປະມານ, ແຜນເງິນຕາ ກາງສະໄຫມ 5 ປີ (2021-2025) ແລະ ທິດ ທາງແຜນການທ້າຍສະໄຫມ ຮອດປີ 2025, ການຈັດຕັ້ງປະຕິບັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງລັດຖະບານ; ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະ 3 ປີຜ່ານມາ(2021-2023); ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການ ເງິນ ໄລຍະ 3 ປີຜ່ານມາ (2021-2023). ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄຫມ 5ປີ(2021-2025) ແລະ ທິດ ທາງແຜນການທ້າຍສະໄຫມ ຮອດປີ 2025, ການຈັດຕັ້ງປະຕິບັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງອົງການກວດກາແຫ່ງລັດ; ບົດລາຍງານຜົນການກວດກາ ຕາມຜົນການກວດສອບ ປີ 2021; ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄຫມ 5ປີ(2021-2025) ແລະ ທິດທາງແຜນການທ້າຍສະໄຫມ ຮອດປີ 2025, ການຈັດຕັ້ງປະຕິບັດແຜນການ ປະຈໍາປີ 2023 ແລະ ທິດທາງ ແຜນການ ປະຈໍາປີ 2024 ຂອງອົງການກວດສອບແຫ່ງລັດ; ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022. ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄຫມ 5 ປີ (2021-2025) ແລະ ທິດທາງ ແຜນການທ້າຍສະໄຫມ ຮອດປີ 2025, ການຈັດຕັ້ງປະຕິບັດແຜນການ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ. ວຽກງານ ສ້າງ ແລະ ປັບປຸງກົດໝາຍ 7 ສະບັບ ແລະ ການປະເມີນການຈັດຕັ້ງປະຕິບັດກົດໝາຍ 3 ສະບັບ, ຮັບຮອງເອົາກົດໝາຍ ວ່າດ້ວຍລະບົບການຊໍາລະ (ປັບປຸງ); ກົດໝາຍ ວ່າດ້ວຍການບັນຊີ (ປັບປຸງ); ກົດໝາຍ ວ່າດ້ວຍການຕິດຕາມກວດກກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ (ປັບປຸງ); ກົດໝາຍ ວ່າດ້ວຍການປິ່ນປົວ (ປັບປຸງ); ກົດໝາຍ ວ່າດ້ວຍການຮັກສາສຸຂະພາບຂັ້ນຕົ້ນ (ສ້າງໃຫມ່); ກົດໝາຍ ວ່າດ້ວຍຊັບສິນທາງປັນຍາ (ປັບປຸງ); ກົດໝາຍ ວ່າດ້ວຍຜູ້ພິພາກສາ (ປັບປຸງ); ຮັບຮອງເອົາບົດລາຍງານການປະເມີນຜົນການຈັດຕັ້ງປະຕິບັດກົດໝາຍ ຂົງເຂດປ້ອງກັນຊາດ-ປ້ອງກັນຄວາມສະ ຫງົບ ຈໍານວນ 03 ສະບັບ ຄື: ກົດໝາຍ ວ່າດ້ວຍການປ້ອງກັນຊາດ, ກົດໝາຍ ວ່າດ້ວຍນາຍທະຫານກອງທັບປະຊາ ຊົນລາວ ແລະ ກົດໝາຍ ວ່າດ້ວຍກໍາລັງປ້ອງກັນຄວາມສະຫງົບປະຊາຊົນ. ເພື່ອເຮັດໃຫ້ທຸກພາກສ່ວນຮັບຮູ້, ເຂົ້າໃຈຕໍ່ການນຳພາຂອງພັກ, ລະບຽບກົດໝາຍຂອງລັດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືຂອງແຂວງ ແລະ ແນ່ໃສ່ຮັບຮູ້ ແລະ ເຂົ້າໃຈຕໍ່ລະບົບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ເນື້ອໃນວຽກງານສຳຄັນທີ່ໄດ້ພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ແລະ ພ້ອມກັນນໍາເອົານິຕິກໍາໃຕ້ກົດໝາຍ ກໍຄືມະຕິທີ່ໄດ້ຮັບຮອງໄປຈັດຕັ້ງເຜີຍແຜ່ ແລະ ຈັດຕັ້ງປະຕິບັດເຂົ້າໃນວຽກງານຂອງຕົນຢ່າງເປັນຮູບປະທໍາ ແລະ ມີຜົນສໍາເລັດເປັນກ້າວໆ. ນອກນັ້ນ ຜູ້ເຂົ້າຮ່ວມ ຍັງໄດ້ສົນທະນາ, ແລກປ່ຽນຄໍາຄິດຄໍາເຫັນຄິດ ແລະ ສະເໜີກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ປະກົດການຫຍໍ້ທໍ້ຕ່າງໆໃນສັງຄົມ ໃຫ້ມີຄວາມຖືກຕ້ອງສອດຄ່ອງຕາມລະບຽບກົດໝາຍ ແລະ ສະພາບຄວາມເປັນຈິງ ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.
(ວິນັດ)