(ສພຊ) – ທ່ານ ສົມພອນ ສີອຸດົມພັນ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 6 ແຂວງຫຼວງພະບາງ ໄດ້ປະກອບຄຳເຫັນຕໍ່ບົດລາຍງານຂອງທ່ານນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2024 ແລະ ແຜນການປະຈຳປີ 2025; ແຜນການລົງທຶນຂອງລັດ, ແຜນຈັດສັນງົບປະມານ ປະຈຳປີ 2025 ເຊິ່ງມີບາງຕອນວ່າ: ດ້ວຍຄວາມພະຍາຍາມຂອງລັດຖະບານ ເຫັນໄດ້ວ່າບັນລຸຜົນໃນຫຼາຍດ້ານ; ສຳລັບເຂດເລືອກຕັ້ງທີ 6 ກໍມີຜົນສຳເລັດເຊັ່ນດຽວກັນ ອັນພົນເດັ່ນແມ່ນສາມາດເກັບລາຍຮັບໄດ້ແລ້ວ 125%, ການທ່ອງທ່ຽວກໍຂະຫຍາຍຕົວ, ມາຮອດເດືອນຕຸລາ ມີນັກທ່ອງທ່ຽວເຂົ້າມາທ່ຽວຫຼວງພະບາງ 1.7 ລ້ານກວ່າເທື່ອຄົນ.

ຜ່ານການຕິດຕາມກວດກາຂອງຄະນະ ສສຊ ກໍຍັງເຫັນວ່າມີບັນຫາທີ່ຈະຕ້ອງເອົາໃຈໃສ່ ເປັນຕົ້ນແມ່ນການຄຸ້ມຄອງລາຄາສິນຄ້າ, ການຜະລິດສິນຄ້າຍັງບໍ່ທັນເປັນຂະບວນຢ່າງແຂງແຮງ, ການລັກລອບອະນຸຍາດ ແລະ ການຄຸ້ມຄອງການຂຸດຄົ້ນແຮ່ທາດ ຍັງບໍ່ທັນຮັດກຸມ ພາໃຫ້ເກີດມີປາກົດການຫຍໍ້ທໍ້ຫຼາຍຢ່າງ, ບັນຫາທີ່ໜ້າເປັນຫ່ວງຢ່າງໜຶ່ງ ກໍແມ່ນວຽກການສຶກສາ ມີທ່າອຽງຖົດຖອຍ, ປາກົດການຫຍໍ້ທໍ້ຫຼາຍກໍລະນີຍັງບໍ່ທັນໄດ້ຮັບການແກ້ໄຂຢ່າງເດັດຂາດເຂັ້ມງວດ ເປັນຕົ້ນການອະນຸຍາດຂຸດຄົ້ນແຮ່ທາດຊະຊາຍ, ບັນຫາຢາເສບຕິດ ແລະ ອື່ນໆ ເຊິ່ງບັນຫາທີ່ກ່າວມານັ້ນ ສະເໜີລັດຖະບານເອົາໃຈໃສ່ແກ້ໄຂໃຫ້ເປັນຮູບປະທຳ.

ສຳລັບທິດທາງປີ 2025 ຢາກສະເໜີຕໍ່ລັດຖະບານບາງບັນຫາດັ່ງນີ້:

1. ໃຫ້ມີທິດທາງລະອຽດໃນການຊຸກຍູ້ສົ່ງເສີມການຜະລິດສິນຄ້າພາຍໃນ, ໃນນີ້ ແມ່ນໃຫ້ເອົາໃຈໃສ່ຊຸກຍູ້ສົ່ງເສີມດ້ານວິຊາການ, ການນຳໃຊ້ເຕັກນິກວິຊາການໃໝ່ເຂົ້າໃນການຜະລິດ, ການດຳເນີນທຸລະກິດຕ່າງໆ.

2. ເອົາໃຈໃສ່ແກ້ໄຂຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ອັນສຳຄັນແມ່ນໃຫ້ເລັ່ງໃສ່ການສ້າງອາຊີບໝັ້ນທ່ຽງໃຫ້ແກ່ເຂົາເຈົ້າ, ຮີບຮ້ອນປະຕິບັດນະໂຍບາຍເພີ່ມເງິນເດືອນ, ນະໂຍບາຍຕ່າງໆໃຫ້ໄວ ເພື່ອແກ້ໄຂຄວາມຫຍຸ້ງຍາກຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ.

3. ສຸມທຶນຮອນເຂົ້າໃນການປັບປຸງ, ສ້ອມແປງເສັ້ນທາງທີ່ເປ່ເພ ໃຫ້ສາມາດທຽວໄດ້ສະດວກກວ່າເກົ່າ ເພາະເສັ້ນທາງຫຼວງແຫ່ງຊາດທີ່ຜ່ານແຂວງຫຼວງພະບາງ ກໍເປ່ເພຊຸດໂຊມ; ໄລຍະຜ່ານມາທາງກະຊວງໂຍທາທິການ ແລະ ຂົນສົ່ງ ກໍໄດ້ມີຄວາມພະຍາຍາມແກ້ໄຂ, ແຕ່ກໍຢາກໃຫ້ລັດຖະບານຊ່ວຍແກ້ໄຂຕື່ມ.

4. ສຳລັບແຜນການລົງທຶນຂອງລັດປະຈຳປີ 2025 ແມ່ນເຫັນດີສະໜັບສະໜູນ ໂດຍສະເພາະແມ່ນການກຳນົດເປົ້າໝາຍຂອງການລົງທຶນໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ, ການລົງທຶນເຂົ້າໃນການປັບປຸງເສັ້ນທາງທີ່ຕິດພັນກັບການນຳໃຊ້ລົດໄຟລາວ-ຈີນ, ປັບປຸງເສັ້ນທາງຕິດພັນກັບການທ່ອງທ່ຽວ; ສະນັ້ນ, ຢູ່ຈຸດນີ້ຢາກສະເໜີຕໍ່ລັດຖະບານຊ່ວຍຈັດສັນງົບປະມານເຂົ້າໃນການປັບປຸງເສັ້ນທາງໄປຫາສະຖານີລົດໄຟ, ເສັ້ນທາງໄປຕາດກວາງຊີ ເຊິ່ງຜ່ານມາແຂວງກໍໄດ້ມີຄວາມພະຍາຍາມປັບປຸງຈຳນວນໜຶ່ງ ແຕ່ກໍຍັງຕ້ອງການທຶນປັງປຸງຕື່ມ ເພາະເສັ້ນທາງດັ່ງກ່າວຮັບໃຊ້ການທ່ອງທ່ຽວ, ແຂກໄປຫຼາຍ ມັນເປັນໃບໜ້າໃບຕາຂອງປະເທດເຮົາ.

5. ເອົາໃຈໃສ່ຄຸ້ມຄອງການຂຸດຄົ້ນແຮ່ທາດຕ່າງໆ ໂດຍສະເພາະແມ່ນເຂັ້ມງວດໃນການຕິດຕາມກວດກາການອະນຸຍາດຂຸດຄົ້ນແຮ່ທາດຕ່າງໆ, ຖ້າອະນຸຍາດບໍ່ຖືກຕ້ອງ ກໍຕ້ອງເດັດຂາດປະຕິບັດວິໄນ; ນອກນັ້ນ, ກໍຕ້ອງຄຸ້ມຄອງການເຄື່ອນໄຫວຂຸດຄົ້ນຂອງບັນດາບໍລິສັດຕ່າງໆຕາມກົດໝາຍ.