ໂດຍປະຕິບັດຕາມແຜນການລົງໂຄງສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ອັດຕະປື ຊຸດທີ II ໃນບັນດາຈຸດເປົ້າໝາຍທົ່ວແຂວງອັດຕະປື. ໃນວັນທີ 17 ຕຸລາ 2023. ທ່ານ ສຸກສໍາລານ ໄຊຍະແສງ ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 17 ແລະ ທ່ານ ບຸນເນັມ ໄຊຍະເສັ້ມ ຮອງເລຂາພັກເມືອງ, ຫົວໜ້າໜ່ວຍສະມາຊິກສະພາປະຊາຊົນແຂວງ ເຂດເລືອກຕັ້ງເມືອງຊານໄຊ ພ້ອມດ້ວຍຄະນະໄດ້ເຄື່ອນໄຫວພົບປະກັບຜູ້ມີສິດເລືອກຕັ້ງຢູ່ບ້ານໜອງຟ້າໃໝ່ ເມືອງຊານໄຊ, ເຂົ້າຮ່ວມມີອໍານາດການປົກຄອງບ້ານ ແລະ ພໍ່ແມ່ປະຊາຊົນຜູ້ມີສິດເລືອກຕັ້ງເຂົ້າຮ່ວມຮັບຟັງ 30 ກວ່າຄົນ.
ໂອກາດດັ່ງກ່າວ, ທ່ານ ບົວລໍາ ແກ້ວມະນີຍົກ ເລຂາພັກບ້ານນາຍບ້ານໜອງຟ້າໃໝ່ ໄດ້ລາຍງານສະພາບລວມໂດຍຫຍໍ້ຂອງບ້ານໃຫ້ຊາບວ່າ: ບ້ານໜອງຟ້າໃໝ່ຕັ້ງຢູ່ເນີນສູງ (ເຂດວັງຕັດ), ປະກອບມີ 87 ຫຼັງຄາເຮືອນ,ມີ 110 ຄອບຄົວ, ພົນລະເມືອງທັງໝົດ 634 ຄົນ, ຍິງ 321 ຄົນ, ຍຶດຖືອາຊີບເຮັດໄຮ່ເປັນສ່ວນໃຫຍ່; ພ້ອມນັ້ນ, ນາຍບ້ານ ແລະ ປະຊາຊົນ ໄດ້ສະເໜີຕໍ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ພົວພັນເຖິ່ງການພັດທະນາເສດຖະກິດ-ສັງຄົມເປັນຕົ້ນ: ພື້ນຖານໂຄງລ່າງເສັ້ນທາງ,ໄຟຟ້າ, ນ້ຳໃຊ້ (ນ້ຳລີ່ນ), ດ້ານສາທາລະນະສຸກ, ດ້ານກະສີກໍາ ແລະ ບັນຫາອື່ນໆອີກ.
ຈາກນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຜັນປ່ຽນກັນຍົກເອົາບາງເນື້ອໃນຂອງຜົນສຳເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແລະ ໄດ້ຍົກໃຫ້ເຫັນສະພາບການຂອງໂລກ ແລະ ສະພາບການຫຍຸ້ງຍາກຂອງລາວເຮົາເປັນຕົ້ນແມ່ນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ທີ່ນອນໃນວາລະແຫ່ງຊາດ, ໂຄງການລົງທຶນ, ບັນຫາເງີນເຝີ້, ການຈ້າງງານ ແລະ ໄດ້ສະເໜີໃຫ້ອຳນາດການປົກຄອງບ້ານ ແລະ ພໍ່ແມ່ປະຊາຊົນ ສືບຕໍ່ຍຶດໝັ້ນຕໍ່ການນຳພາຂອງພັກ-ລັດ, ຮັກສາມູນເຊື້ອທີ່ຍາດມາໄດ້ໃນທ່າມກາງສະພາບການຫຍຸ້ງຍາກທາງດ້ານເສດຖະກິດ ໃຫ້ສ້າງເງື່ອນໄຂເສດຖະກິດຄອບຄົວ ປູກຝັງ, ລ່ຽງສັດ ກຸ້ມຕົນເອງ ເປັນເຈົ້າຕົນເອງ; ໃຫ້ເອົາໃຈໃສ່ປຸກລະດົມປູກຝັງຈິດສຳນຶກ ສາມັກຄີປອງດອງເປັນປືກແຜ່ນແໜ້ນໜາ ແລະ ຄໍາສະເໜີຂອງອໍານາດການປົກຄອງບ້ານ ແລະ ພໍ່ແມ່ປະຊາຊົນ ບາງບັນຫາຈະນໍາໄປຄົ້ນຄວ້າພິຈະລະນາຕາມຂັ້ນຕອນ.
(ວິນັດ)