ໃນລະຫວ່າງວັນທີ 17-18 ມັງກອນ 2025 ນີ້, ສະມາຊິກສະພາແຫ່ງຊາດ ເຂດເລືອກຕັ້ງທີ 14 ສົມທົບກັບ ສະມາຊິກສະພາປະຊາຊົນແຂວງສາລະວັນ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝເທື່ອທີ 8 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ສາລະວັນ ຊຸດທີ II ຢູ່ 04 ຈຸດຂອງ 02 ເມືອງ ຄື: ເມືອງລະຄອນເພັງ ຈຸດບ້ານນາຂັ້ນໄດ, ບ້ານດອນໄລ່ ແລະ ເມືອງຄົງເຊໂດນ ຈຸດບ້ານປົ່ງ, ບ້ານຕະຫຼ່າງ; ເຄື່ອນໄຫວຄັ້ງນີ້ມີ ທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ທ່ານ ສາຍສະໝອນ ອິນທິເສນ ປະທານຄະນະກໍາມະການເສດຖະກິດ, ແຜນການ ແລະ ການເງິນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14; ມີບັນດາທ່ານ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງລະຄອນເພັງ ແລະ ເມືອງຄົງເຊໂດນ; ໂດຍໄດ້ຮັບການຕ້ອນຮັບຈາກຄະນະພັກເມືອງ, ຄະນະພັກຮາກຖານກຸ່ມບ້ານ, ອົງການຈັດຕັ້ງບ້ານ, ພະນັກງານ-ລັດຖະກອນ, ພະນັກງານອາວຸໂສບຳນານ, ເຖົ້າແກ່ແນວໂຮມ, ພໍ່ແມ່ປະຊາຊົນ, ຄູ ແລະ ນັກຮຽນ ເປັນຈໍານວນຫຼາຍ;

ການພົບປະ 04 ຈຸດດັ່ງກ່າວນີ້, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຮັບຟັງການລາຍງານກ່ຽວກັບສະພາບການພັດທະນາເສດຖະກິດ-ສັງຄົມຂອງບ້ານ, ຈາກນັ້ນບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງສາລະວັນ ຊຸດທີ II, ພ້ອມທັງໄດ້ມີການແລກປ່ຽນຄໍາຄິດຄໍາເຫັນຕໍ່ບັນດາບັນຫາ ແລະ ຂໍ້ສະເໜີຕ່າງໆຂອງປະຊາຊົນ ໃນຈຸດທີ່ຄະນະໄດ້ລົງໄປ ເຊິ່ງບັນຫາສ່ວນໃຫຍ່ແມ່ນຕິດພັນກັບບັນຫາຄວາມຫຍຸ້ງຍາກດ້ານພື້ນຖານໂຄງລ່າງ, ບັນຫາທາງດ້ານເສດຖະກິດ ແລະ ບັນຫາອື່ນໆ;
ໃນການລົງເຄື່ອນໄຫວພົບປະໃນຄັ້ງນີ້, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາເຄື່ອງອຸປະກອນກິລາ ແລະ ໄດ້ນຳເອົາລົດຖີບທີ່ໄດ້ຮັບການຊ່ວຍເຫຼືອຈາກມູນນິທິຈີນເພື່ອພັດທະນາຊົນນະບົດ ຈຳນວນ 03 ຄັນ ມອບໃຫ້ນ້ອງນັກຮຽນທີ່ຮຽນດີ-ຮຽນເກັ່ງ ແລະ ມີຄວາມທຸກຍາກໃນໂຮງຮຽນຕ່າງໆຂອງເມືອງຄົງເຊໂດນ ຕື່ມອີກ;

ພາບ-ຂ່າວ: ດີລໍາພົນ ພົມມະຈັນ