ວັນທີ 24- 27 ຕຸລາ 2023 ນີ້, ນຳໂດຍ ທ່ານ ສົມສັກ ດອນຈານິດ ຮອງປະທານ ສະພາປະຊາຊົນແຂວງ ທັງເປັນສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງຮຽ້ມ ພ້ອມດ້ວຍຄະນະທີມງານ ລົງພົບປະຊາຊົນຜູ້ມີສິດເລືອກຕັ້ງ ແລະ ເຜີຍແຜ່ ຜົນສຳເລັດ ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຊຸດທີ II ແລະ ສະພາແຫ່ງຊາດ ໄດ້ 4 ຈຸດ, 4 ບ້ານຄື: ບ້ານ ຄອນງົວ, ບ້ານ ສົມມານ, ບ້ານພັນລໍ ແລະ ບ້ານນາແລ ມີຜູ້ເຂົ້າຮ່ວມ 190 ຄົນ ຍິງ 99 ຄົນ.

          ການລົງເຄື່ອນໄຫວຄັ້ງນີ້, ບັນດາທ່ານ ສສຂ ປະຈຳເຂດເລືອກຕັ້ງເມືອງຮ້ຽມ ໄດ້ພັດປ່ຽນກັນຂຶ້ນ ເຜີຍແຜ່ເນື້ອໃນ ຜົນສຳເລັດ 2 ກອງປະຊຸມດັ່ງກ່າວທີ່ໄດ້ສຳເລັດໄປແລ້ວນັ້ນ ເພື່ອໃຫ້ພໍ່ແມ່ປະຊາຊົນຜູ້ທີ່ມີສິດເລືອກຕັ້ງຢູ່ຂັ້ນບ້ານ ໄດ້ຮັບຮູ້, ເຂົ້າໃຈຕໍ່ແນວທາງນະໂຍບາຍ ຂອງພັກ ແລະ ລະບຽບກົດໝາຍ ຂອງລັດ ແລະ ແຜນພັດທະນາເສດຖະກິດ – ສັງຄົມ ຂອງຊາດ, ຂອງແຂວງ ນອກນັ້ນຍັງໄດ້ເຜີຍແຜ່ ພາລະບົດບາດ ສິດ ແລະ ໜ້າທີ່ ຂອງສະມາຊິກ ສະພາແຫ່ງຊາດ ແລະ ພາລະບົດບາດ ສິດ ແລະ ໜ້າທີ່ ຂອງສະມາຊິກສະພາປະຊາຊົນຂັ້ນແຂວງ ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ.

          ໃນການລົງພົບປະຜູ້ມີສິດເລືອກຕັ້ງໃນຄັ້ງນີ້ ທາງຄະທີມງານຍັງໄດ້ນຳເຄື່ອງນຸ່ງຫົ່ມ ແລະ ອຸປະກອນ ການຮຽນມອບໃຫ້ບ້ານ ມອບຕໍ່ໃຫ້ຄອບຄົວທີ່ຍັງຂາດເຂີນຕື່ມອີກ.

ພາບ: ຄຳພຸດ ວັນລາສີ