(ສພຊ) ໃນວັນທີ 19 ເມສາ 2019 ສະພາແຫ່ງຊາດ (ສພຊ) ໄດ້ຈັດກອງປະຊຸມສະຫລຸບຕີລາຄາການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ ແລະ ພະນັກງານ ພາຍໃນ ສພຊ ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງເລຂາຄະນະບໍລິຫານງານພັກ, ຮອງປະທານ ສພຊ;ມີບັນດາປະທານ-ຮອງປະທານກໍາມາທິການ, ເລຂາທິການ-ຮອງເລຂາທິການສະພາແຫ່ງຊາດ, ຫົວໜ້າ-ຮອງຫົວໜ້າສະຖາບັນ, ກົມ, ສູນ ແລະ ຫົວໜ້າ-ຮອງຫົວໜ້າພະແນກພາຍໃນສະພາແຫ່ງຊາດເຂົ້າຮ່ວມ.

ທັງນີ້ ກໍເພື່ອເປັນການສະຫລຸບການເຄື່ອນໄຫວຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ ແລະ ພະນັກງານ; ການສະຫລຸບຕີລາຄາການເຄື່ອນໄຫວວຽກງານຂອງ ສພຊ ແລະ ການສະຫລຸບການກໍ່ສ້າງໜ່ວຍພັກປອດໃສ, ເຂັ້ມແຂງແລະ ໜັກແໜ້ນຂອງຄະນະພັກ ສພຊ ປະຈໍາປີ 2018 ແລະທິດທາງແຜນການປະຈໍາປີ 2019.

ກອງປະຊຸມໄດ້ຮັບຟັງການເຜີຍແຜ່ຜົນສໍາເລັດກອງປະຊຸມສະຫລຸບວຽກງານຈັດຕັ້ງກໍ່ສ້າງພັກ-ພະນັກງານທົ່ວປະເທດປະຈໍາປີ 2018 ຈາກກໍາມະການສູນກາງພັກ, ຄະນະປະຈໍາພັກ, ຜູ້ຮັບຜິດຊອບວຽກງານຈັດຕັ້ງ-ພະນັກງານ ແລະ ຜ່ານບົດສະຫລຸບຕີລາຄາການຈັດຕັ້ງປະຕິບັດວຽກງານຈັດຕັ້ງກໍ່ສ້າງພັກ ແລະ ພະນັກງານພາຍໃນ ສພຊ ປະຈໍາປີ 2018 ແລະ ທິດທາງແຜນການປະຈໍາປີ 2019.  ຫລັງຈາກນັ້ນ, ບັນດາສະຫາຍຜູ້ເຂົ້າຮ່ວມໄດ້ຜັດປ່ຽນກັນສຸມສະຕິປັນຍາປະກອບຄໍາຄິດຄໍາເຫັນຕໍ່ຄໍາຖາມເຈາະຈີີ້ມຂອງປະທານກອງປະຊຸມພ້ອມທັງຮັບຟັງຄໍາເຫັນໂອ້ລົມ ແລະ ໃຫ້ທິດຊີ້ນໍາຂອງສະຫາຍນາງສີໃສລືເດດມູນສອນ.

ຕອນບ່າຍຂອງວັນດຽວກັນຍັງໄດ້ມີການປະກາດແຕ່ງຕັ້ງ, ຍົກຍ້າຍຕໍາແໜ່ງບໍລິຫານຂັ້ນກົມ ແລະ ຂັ້ນພະແນກ ໂດຍການເປັນປະທານຂອງສະຫາຍ  ນາງ ສວນສະຫວັນ ວິຍະເກດ ກໍາມະການສໍາຮອງສູນກາງພັກ, ກໍາມະການຄະນະປະຈໍາ, ເລຂາທິການ ສພຊ.

ກອງປະຊຸມໄດ້ຮັບຟັງການຜ່ານມະຕິຂອງຄະນະປະຈໍາ ສພຊ ແລະ ຂໍ້ຕົກລົງຄະນະເລຂາທິການ ສພຊ ກ່ຽວກັບການແຕ່ງຕັ້ງ, ຍົກຍ້າຍຕໍາແໜ່ງບໍລິຫານຂັ້ນກົມ ແລະ ຂັ້ນພະແນກ; ມອບມະຕິຂອງຄະນະປະຈໍາ ສພຊ ໃຫ້ແກ່ຜູ້ໄດ້ຮັບການແຕ່ງຕັ້ງ ແລະ ຍົກຍ້າຍຕໍາແໜ່ງບໍລິຫານປະເພດ 2 ແລະ ປະເພດ 3; ມອບມະຕິຕົກລົງຂອງຄະນະເລຂາທິການ ສພຊ ໃຫ້ແກ່ຜູ້ໄດ້ຮັບແຕ່ງຕັ້ງ ແລະ ຍົກຍ້າຍຕໍາແໜ່ງບໍລິຫານປະເພດ 4 ແລະ 5 ເຊິ່ງມີດັ່ງນີ້: ມະຕິແຕ່ງຕັ້ງຫົວໜ້າກົມ 3 ທ່ານ, ມະຕິຍົກຍ້າຍຂັ້ນຮອງຫົວໜ້າກົມ 1 ທ່ານ, ມະຕິແຕ່ງຕັ້ງຮັກສາການຫົວໜ້າກົມ 2 ທ່ານ, ຂໍ້ຕົກລົງແຕ່ງຕັ້ງຫົວໜ້າພະແນກ 11 ທ່ານ, ຂໍ້ຕົກລົງຍົກຍ້າຍວ່າການຫົວໜ້າພະແນກ 1 ທ່ານ ແລະ ຂໍ້ຕົກລົງແຕ່ງຕັ້ງຮອງຫົວໜ້າພະແນກ 8 ທ່ານ.

(ສອນສັກ ວັນວິໄຊ)