ໃນຕອນບ່າຍວັນທີ​ 31 ສິງຫາ​ ຜ່ານມານີ້,​ ສະພາແຫ່ງຊາດ ແລະ ສະພາປະຊາຊົນແຂວງ ມີທ່ານ​ ປອ​ ນາງ​ ສູນທອນ​ ໄຊຍະ​ຈັກ​ ຮອງປະທານ​ສະພາແຫ່ງຊາດ​ ແລະ​ ທ່ານ​ ປອ ແພງສີ ສີລາວີ ຮອງປະທານສະພາປະຊາຊົນແຂວງ​ ເຊກອງ ພ້ອມດ້ວຍພະແນກການ ແລະ ຂະແໜງການທີ່ກ່ຽວຂ້ອງ​ ໄດ້ເຄື່ອນໄຫວຢ້ຽມຢາມ ປັນຍາຄູນຟາມ ເຊິ່ງເປັນຟາມຕົວແບບຂອງ ເມືອງ ລະມາມ ແຂວງ ເຊກອງ.

         ທ່ານ ສີເວີນ ພວງພະຈັນ ຫົວໜ້າຂະແໜງ ລ້ຽງສັດ ແລະ ການປະມົງ ພະແນກກະສິກໍາ ແລະ ປ່າໄມ້ແຂວງ ໄດ້ໃຫ້ຮູ້ວ່າ: ໂດຍປະຕິບັດຕາມທິດຊີ້ນຳຂອງພັກ-ລັດ ເວົ້າລວມ, ເວົ້າສະເພາະ ກໍຄືຄະນະນຳເມືອງລະມາມ ແຂວງເຊ ກອງ ຍາມໃດກໍເອົາໃຈໃສ່ຊຸກຍູ້, ສົ່ງເສີມວຽກງານການປູກຝັງ-ລ້ຽງສັດ ຕິດພັນກັບມູນເຊື້ອດຸໝັ່ນຂະຫຍັນພຽນ ຂອງຊາວເຊກອງ ທີ່ເຄີຍເຮັດແບບກະແຈກກະຈາຍ ພໍກຸ້ມຢູ່ກຸ້ມກິນ, ພໍໃຜພໍລາວ, ພໍແຕ່ແກ້ໄຂຄວາມທຸກຍາກຂອງ ຄອບຄົວ ໃຫ້ກາຍເປັນການປູກຝັງ-ລ້ຽງສັດຂະໜາດໃຫຍ່ ເປັນສິນຄ້າຂາຍອອກ ເພື່ອຕອບສະໜອງດ້ານສະບຽງ ອາຫານໃຫ້ພຽງພໍ ກັບຄວາມຮຽກຮ້ອງຕ້ອງການຂອງຕະຫຼາດ ຢູ່ເມືອງລະມາມ ກໍຄືທົ່ວແຂວງເຊກອງ ແລະ ຕ່າງ ແຂວງ ປັນຍາຄູນຟາມ ເຊິ່ງເປັນຟາມ ຂອງບໍລິສັດ ການຄ້າ ຂາອອກ-ຂາເຂົ້າ ເມືອງລະມາມ ແຂວງເຊກອງ ຈຳກັດ ໂດຍໄດ້ຮັບການອະນຸຍາດໃຫ້ຟື້ນຟູ ພັດທະນາ ໃນວັນທີ 07 ມີນາ 2022 ຈົນຮອດປະຈຸບັນ.

           ປັນຍາຄູນຟາມ ຕັ້ງຢູ່ບ້ານໂນນໜອງຫວ້າ, ເມືອງລະມາມ, ແຂວງເຊກອງ ຫຼັກກິໂລແມັດທີ 9 ແຕ່ທາງແຍກ ຫາຟາມ 500 ແມັດ, ມີເນື້ອທີ່ທັງໝົດ 105 ເຮັກຕາ, ມີຄອກໝູທັງໝົດ 04 ຫຼັງ ສາມາດບັນຈຸໝູໄດ້ ທັງໝົດ ເຕັມຄອກປະມານ 6,190 ໂຕ/ງວດ, ມີພະນັກງານທັງໝົດ 15 ຄົນ ໃນນັ້ນ, ຜູ້ຈັດການຟາມ 1 ຄົນ, ພະນັກງານລ້ຽງສັດ 1 ຄົນ, ພະນັກງານສັດຕະວະແພດ 3 ຄົນ, ພະນັກງານບັນຊີ 1 ຄົນ ແລະ ມີກຳມະກອນ 9 ຄົນ.

          ປະຈຸບັນສັດລ້ຽງໃນຟາມມີປະເພດໝູພັນຊີ້ນສາຍພັນລູກປະສົມ ລາດສະໄວ+ດູລ໋ອກ ເຊິ່ງໝູທີ່ນໍາມາລ້ຽງໃນປະຈຸບັນແມ່ນນໍາມາຈາກບໍລິສັດພາຍໃນປະເທດເປັນຜູ້ສະໜອງພັນໃຫ້, ສ່ວນອາຫານ ແລະ ເຕັກນິກການລ້ຽງໝູ ແມ່ນນໍາມາຈາກບໍລິສັດ ທີ່ມີປະສົບການ ພາຍໃນປະເທດ. ເຊິ່ງນັບແຕ່ ເດືອນເມສາ ຮອດປະຈະບັນສາມາດສະໜອງໝູອອກຈຳໜ່າຍພາຍໃນ ແລະ ຕ່າງແຂວງໄດ້ ທັງໝົດ 10,121 ໂຕ, ນ້ຳໜັກສະເລ່ຍ 100-130 kg, ຮັບປະກັນ ໄດ້ມາດຕະຖານ, ປອດສານເລັ່ງ, ໝູຢູ່ຟາມ ໄດ້ຮັບການດູແລຈາກວິຊາການຜູ້ຊ່ຽວຊານ ຕັ້ງແຕ່ນ້ອຍຈົນຮອດນ້ຳໜັກ ເຊິ່ງສາມາດປ້ອນຕະຫຼາດພາຍໃນແຂວງ ແລະ ຕ່າງແຂວງ.

          ນອກຈາກນັ້ນ, ຍັງໄດ້ ລ້ຽງສັດປີກ ປະເພດ ໄກ່ພັນໄຂ່, ເປັດພັນໄຂ່, ໄກ່ສາມສາຍພັນ ແລະ ໄກ່ກະດູກດໍາ ເພື່ອສະໜອງໄຂ່ ແລະ ເນື້ອປ້ອນຕະຫຼາດພາຍໃນ ແລະ ຕ່າງແຂວງ. ປະຈຸບັນຢູ່ປັນຍາຄູນຟາມມີໝູພັນຊີ້ນ ຈໍານວນ 10,980 ໂຕ ແລະ ໄດ້ຂາຍອອກເປັນງວດທີ 2 ຈໍານວນ 7.350 ໂຕ, ຍັງໃນຟາມ 3,630 ໂຕ; ໄກ່ພັນໄຂ່ ຈໍານວນ 50.750 ໂຕ, ຂາຍອອກ 4.200 ໂຕ, ຍັງໃນຟາມ 46,550 ໂຕ; ເປັດພັນໄຂ່ 10,000 ໂຕ, ຂາຍອອກ 3.530 ໂຕ, ຍັງໃນຟາມ 6.470 ໂຕ; ໄກ່ສາມສາຍພັນ 24,500 ໂຕ, ຂາຍອອກ 8,300, ຍັງໃນຟາມ 16,200 ໂຕ ແລະ ໄກ່ກະດູກດໍາ ຈໍານວນ 2,500 ໂຕ, ຂາຍອອກ 1,750 ໂຕ ແລະ ຍັງໃນຟາມ 750 ໂຕ.

        ພ້ອມນີ້, ປັນຍາຄູນຟາມ ຍັງມີແຜນການຈະໄດ້ສືບຕໍ່ ແລະ ຂະຫຍາຍຟາມລ້ຽງໝູ ອອກຕື່ມອີກ 1 ຄອກ ຂະໜາດ 30×70 ແມັດ ສາມາດບັນຈຸລູກໝູໄດ້ 1,200 ໂຕ ເພື່ອສະໜອງດ້ານສະບຽງອາຫານ ພາຍໃນ ແລະ ຕ່າງແຂວງ ຄຽງຄູ່ກັບການຊຸກຍູ້ສົ່ງເສີມ ພາກລັດຕ້ອງໄດ້ ຄຸ້ມຄອງ ຕ້ອງສະກັດກັ້ນບໍ່ໃຫ້ຜູ້ປະກອບການ ແມ່ຄ້າຊາວຂາຍນຳ ໝູ ແລະ ສັດລ້ຽງທີ່ມີພາຍໃນແຂວງ ແລະ ຈາກຕ່າງແຂວງ ມາຈຳໜ່າຍໃນແຂວງ ເຊກອງ ເຊິ່ງປັນຍາຄູນຟາມ ສາມາດຜະລິດຮັບຮອງ ແລະ ຕອບສະໜອງດ້ານສະບຽງອາຫານໄດ້ທັງພາຍໃນແຂວງເຊກອງ ສົ່ງຂາຍຕ່າງແຂວງນໍາອີກ.

         ທ່ານ ສີເວີນ ພວງພະຈັນ ກ່າວຕື່ມອີກວ່າ: ຍ້ອນເຫັນໄດ້ເຖິງຄວາມດຸໝັ່ນຂະຫຍັນພຽນ ອົດທົນຜ່ານຜ່າອຸປະສັກ ຄວາມຫຍຸ້ງຍາກ ແລະ ຄວາມຕັ້ງອົກຕັ້ງໃຈ ມັກຮັກໃນການລ້ຽງໝູ ເປັນຊີວິດຈິດໃຈ ຂອງຟາມໝູປັນຍາຄູນ ເຊິ່ງເປັນຟາມລ້ຽງໝູທີ່ພົ້ນເດັ່ນຢູ່ພາຍໃນເມືອງລະມາມ ແຂວງເຊກອງ ພວກເຮົາ ຈຶ່ງໄດ້ໃຫ້ຄວາມສຳຄັນເອົາໃຈໃສ່ ລົງມາໃກ້ຊິດຕິດແທດ ໃຫ້ການຊ່ວຍເຫຼືອແນະນຳ ທາງດ້ານວິຊາການ ໂດຍສະເພາະແມ່ນວິທີການລ້ຽງ ແລະ ການຫາຕະຫຼາດຈຳໜ່າຍໃຫ້ ເຊິ່ງກໍໄດ້ລາຄາຍຸຕິທຳ ທັງຜູ້ຊື້-ຜູ້ຂາຍ ໂດຍບໍ່ມີຝ່າຍໃດຖືກເອົາລັດເອົາປຽບ, ພິເສດ ເປັນຟາມທີ່ມີລະບົບການຈັດການບັນຫາມູນ (ຂີ້) ໝູ, ເປັດ, ໄກ່ ໄດ້ດີ.

#ໂດຍ: ນາລີວັນ.