(ສພຊ) ໃນຕອນເຊົ້າວັນທີ 25 ກໍລະກົດ 2018 ຕາງໜ້າຄະນະປະຈໍາ ແລະ ພະນັກງານ-ລັດຖະກອນສະພາແຫ່ງຊາດ (ສພຊ) ນໍາໂດຍທ່ານ ນາງ ສວນສະຫວັນ ວິຍະເກດ ເລຂາທິການ ສພຊ ໄດ້ນໍາພາຫົວໜ້າ-ຮອງຫົວໜ້າກົມ ແລະ ພະນັກງານວິຊາການ ຈໍານວນໜຶ່ງ ໄປມອບເງິນຊ່ວຍເຫລືອປະຊາຊົນຜູ້ທີ່ຖືກຜົນກະທົບໄພພິບັດນໍ້າຖ້ວມຢູ່ບັນດາແຂວງໃນຂອບເຂດທົ່ວປະເທດ ທີ່ກະຊວງແຮງງານ ແລະ ສະຫວັດດີການສັງຄົມ ນະຄອນຫລວງວຽງຈັນ.

ສ່ວນເງິນທີ່ນໍາໄປມອບໃນຄັ້ງນີ້ ຈໍານວນ 30 ລ້ານກີບ ໂດຍການກ່າວຮັບຂອງທ່ານນາງ ໃບຄໍາ ຂັດທິຍະ ຮອງລັດຖະມົນຕີກະຊວງແຮງານ ແລະ ສະຫວັດດີການສັງຄົມ ເຊິ່ງຈະນໍາເອົາໄປຊ່ວຍເຫລືອປະຊາຊົນຜູ້ທີ່ຖືກຜົນກະທົບຢ່າງຮ້າຍແຮງຈາກໄພພິບັດຢູ່ບັນດາແຂວງໃນຂອບເຂດທົ່ວປະເທດ ລວມທັງຜົນກະທົບຈາກຄູກັ້ນນໍ້າແຕກຢູ່ເຂື່ອນໄຟຟ້າເຊປຽນ-ເຊນໍ້ານ້ອຍ.

ສຳລັດເຫດການໄພພິບັດຄູກັ້ນນໍ້າແຕກຢູ່ ເຂື່ອນໄຟຟ້າເຊປຽນ-ເຊນໍ້ານ້ອຍ; ໃນເວລາ 14 ໂມງ ຂອງວັນທີ 23 ກໍລະກົດ 2018 ໄດ້ຮັບແຈ້ງຂ່າວ ຈາກບໍລິສັດເຂື່ອນໄຟຟ້າເຊປຽນ-ເຊນໍ້ານ້ອຍ ກ່ຽວກັບສະພາບປະລິມານນໍ້າຢູ່ພາຍໃນເຂື່ອນ ທີ່ຈະມີຄວາມສ່ຽງຕໍ່ຄວາມປອດໄພຂອງເຂື່ອນ. ດັ່ງນັ້ນ, ອໍານາດການປົກຄອງແຂວງ ຈຶ່ງໄດ້ຮີບດ່ວນແຈ້ງໃຫ້ອໍານາດການປົກຄອງເມືອງ ເພື່ອແຈ້ງຕໍ່ໄປຍັງບັນດາປະຊາຊົນພາຍໃນບ້ານ ທີ່ອາໄສຢູ່ເຂດບໍລິເວນດັ່ງກ່າວ, ເພື່ອກະກຽມຍົກຍ້າຍອອກຈາກບ້ານດ່ວນ. ພາຍຫລັງປະຊາຊົນ ໄດ້ຮັບຂ່າວດັ່ງກ່າວແລ້ວ ຄອບຄົວຈໍານວນໜຶ່ງ ກໍ່ໄດ້ພາກັນຮີບຮ້ອນອອກຈາກບ້ານຕົນເອງ, ສ່ວນປະຊາຊົນອີກຈໍານວນໜຶ່ງ ແມ່ນຍັງບໍ່ທັນສາມາດໄດ້ຍົກຍ້າຍອອກ. ຫລັງຈາກນັ້ນ, ເວລາ 19 ໂມງຂອງວັນດຽວກັນ ນໍ້າຈຶ່ງໄຫລຊຸເຂົ້າມາບັນດາບ້ານພາຍໃນເມືອງ ສະໜາມໄຊ ເຊິ່ງໃນນີ້ ມີຈໍານວນ 8 ບ້ານ (ບ້ານຫີນລາດ, ບ້ານ ໃໝ່, ບ້ານທ່າແສງຈັນ, ບ້ານທ່າຫີນ, ບ້ານສະໝອງ, ບ້ານໂຕກກ່ອງ, ບ້ານໄຊດອນໂຂງ, ໜອງຫີນ), ກວມເອົາ 1.005 ຄອບຄົວ, ເຊິ່ງມີພົນລະເມືອງ ຈໍານວນ 4.283 ຄົນ ທີ່ໄດ້ຮັບຜົນກະທົບໜັກ ແລະ ເສຍຫາຍຫລາຍກວ່າໝູ່.  ພາຍຫລັງເກີດສະພາບດັ່ງກ່າວແລ້ວ ອໍານາດການປົກຄອງແຂວງ, ເມືອງ ໄດ້ສົມທົບກັບທຸກກໍາລັງພາຍໃນແຂວງ ເຂົ້າຊ່ວຍເຫລືອຜູ້ປະສົບໄພເຄາະຮ້າຍ. ຕາມການເກັບກໍາຂໍ້ມູນເບື້ອງຕົ້ນ ຢູ່ບ້ານໃໝ່ ໄດ້ມີຜູ້ເສຍຊີວິດ ຈໍານວນ 7 ຄົນ, ເຮືອນເສຍຫາຍ 79 ຫລັງ ແລະ ບ້ານໄຊດອນໂຂງ ຍັງບໍ່ເຫັນ 20 ຄົນ, ສ່ວນບ້ານອື່ນໆ ແມ່ນຍັງສືບຕໍ່ເກັບກໍາຂໍ້ມູນ; ສໍາລັບບັນດາສັດລ້ຽງຂອງປະຊາຊົນ ເປັນຕົ້ນ: ງົວ, ຄວາຍ ແລະ ສັດນ້ອຍ ແມ່ນຖືກນໍ້າພັດໄຫລສຸໄປໝົດ ການປະເມີນຜົນເສຍຫາຍຄັ້ງນີ້, ແມ່ນຍັງບໍ່ທັນສາມາດສະຫລຸບໄດ້.

(ສອນສັກ ວັນວິໄຊ)