(ສພຊ) ວັນທີ 15 ມີນາ 2021 ສະພາແຫ່ງຊາດ (ສພຊ) ໄດ້ຈັດກອງປະຊຸມສະຫລຸບຖອດຖອນບົດຮຽນກ່ຽວກັບການກະກຽມ ແລະ ການດໍາເນີນການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ(ສສຂ) ຊຸດທີ II ຢູ່ທີ່ຫ້ອງປະຊຸມໃຫຍ່ ສພຊ (ຫລັກ 6) ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີບັນດາທ່ານຮອງປະທານຄະນະກໍາມະການເລືອກຕັ້ງລະດັບຊາດ, ຄະນະກໍາມະການເລືອກຕັ້ງລະດັບຊາດ, ຄະນະກໍາມະການເລືອກຕັ້ງແຂວງ, ນະຄອນຫລວງວຽງຈັນເຂົ້າຮ່ວມ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ປະກອບຄຳຄິດເຫັນ, ແລກປ່ຽນບົດຮຽນ ເຊິ່ງກັນ ແລະ ກັນ ພ້ອມທັງສະຫລຸບຕີລາຄາກ່ຽວກັບການກະກຽມ ແລະ ການດໍາເນີນການເລືອກຕັ້ງ ສສຊ ຊຸດທີ IX ແລະ  ສສຂ ຊຸດທີ II ທີ່ຢູ່ໃນຂອບເຂດຄວາມຮັບຜິດຊອບຂອງແຕ່ລະພາກສ່ວນ ເຊິ່ງບັນດາຄໍາຄິດຄຳເຫັນທີ່ນຳມາປຶກສາຫາລືກັນໃນຄັ້ງນີ້, ແມ່ນຈະເປັນຂໍ້ມູນໃຫ້ແກ່ການປັບປຸງບົດສະຫລຸບຕີລາຄາໃຫ້ມີເນື້ອໃນຄົບຖ້ວນ, ຈະແຈ້ງ ແລະ ເປັນບົດຮຽນໃຫ້ແກ່ການປັບປຸງກົດໝາຍ, ນິຕິກໍາໃຕ້ກົດໝາຍ ກ່ຽວກັບການກະກຽມ ແລະ ດໍາເນີນການເລືອກຕັ້ງ ສສຊ ແລະ  ສສຂ ໃນຕໍ່ໜ້າ.

ໃນພິທີປິດ, ທ່ານ ນາງ ປານີ ຢາທໍ່ຕູ້ ໄດ້ມີຄຳເຫັນຕໍ່ກອງປະຊຸມວ່າ: ຜ່ານການສະຫລຸບຕີລາຄາ ແລະ ປະກອບຄໍາເຫັນຕໍ່ການກະກຽມ ແລະ ດໍາເນີນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ສາມາດຖອດບົດຮຽນໄດ້ດັ່ງນີ້: ການກໍານົດນະໂຍບາຍຂອງພັກກ່ຽວກັບວຽກງານເລືອກຕັ້ງຢ່າງລະອຽດແຕ່ຫົວທີເຮັດໃຫ້ການກະກຽມ ແລະ ດໍາເນີນການເລືອກຕັ້ງສໍາເລັດຕາມຄາດໝາຍຢ່າງມີຄຸນນະພາບ; ການຄົ້ນຄວ້າປັບປຸງກົດໝາຍວ່າດ້ວຍການເລືອກຕັ້ງ ສສຊ ແລະ  ສສຂ ໃຫ້ມີເນື້ອໃນລະອຽດ, ຄົບຖ້ວນ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານດ້ານຕ່າງໆ ແລະ ເປັນບ່ອນອີງໃນການແກ້ໄຂບັນຫາທີ່ເກີດຂຶ້ນກ່ຽວກັບການກະກຽມ ແລະ ດໍາເນີນການເລືອກຕັ້ງທັນເວລາ; ການຜັນຂະຫຍາຍເນື້ອໃນຂອງກົດໝາຍເປັນນິຕິກໍາໃຕ້ກົດໝາຍ ຂອງຄະນະກໍາມະການເລືອກຕັ້ງຂັ້ນຕ່າງໆທັນເວລາຈະຊ່ວຍໃຫ້ການປະຕິບັດໜ້າທີ່ມີຜົນສໍາເລັດ; ການຄົ້ນຄວ້າປະກອບບຸກຄະລາກອນ ທີ່ມີບົດຮຽນ, ມີປະສົບປະການ, ມີຄວາມຮັບຜິດຊອບສູງໃນໜ້າທີ່ວຽກງານເຂົ້າໃນຄະນະກໍາມະການເລືອກຕັ້ງຂັ້ນຕ່າງໆ ລວມທັງກົງຈັກເສນາທິການຊ່ວຍວຽກ ເປັນປັດໄຈສໍາຄັນໜຶ່ງໃນວຽກງານເລືອກຕັ້ງ; ການວາງແຜນການເຄື່ອນໄຫວວຽກງານຂອງແຕ່ລະພາກສ່ວນຢ່າງລະອຽດ ເປັນແຕ່ລະບາດກ້າວ, ຕິດຕາມກວດກາ, ຊຸກຍູ້ ແລະ  ສະະຫລຸບການຈັດຕັ້ງປະຕິບັດເປັນປົກກະຕິ ຈະເຮັດໃຫ້ວຽກງານສໍາເລັດທັນເວລາ; ການຄົ້ນຄວ້າ, ຄັດເລືອກຜູ້ສະໝັກຮັບເລືອກຕັ້ງເປັນ ສສຊ ແລະ ສສຂ  ໃຫ້ຮັບປະກັນຕາມມາດຕະຖານ ແລະ ເງື່ອນໄຂທີ່ກໍານົດໄວ້ໃນກົດໝາຍກ່ຽວຂ້ອງ; ເອົາໃຈໃສ່ຄົ້ນຄ້ວາໂຄງປະກອບບຸກຄະລາກອນຈາກອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສາຂາ, ອາຊີບ ທັງພາກລັດ ແລະ ເອກະຊົນ, ເພດ, ໄວ, ຊົນເຜົ່າ; ການທາບທາມບຸກຄະລາກອນຜູ້ອອກສະໝັກຮັບເລືອກຕັ້ງ ຕ້ອງຮັບປະກັນມາດຕະຖານທີ່ກົດໝາຍກໍານົດ, ດໍາເນີນຖືກຕ້ອງຕາມຂັ້ນຕອນ ຈະເຮັດໃຫ້ການເລືອກຕັ້ງໄດ້ບຸກຄະລາກອນທີ່ມີຄຸນນະພາບ, ຮັບປະກັນການປະຕິບັດພາລະບົດບາດຂອງ  ສພຊ ແລະ ສະພາປະຊາຊົນຂັ້ນແຂວງ; ເອົາໃຈໃສ່ວຽກງານການສຶກສາອົບຮົມການເມືອງ-ແນວຄິດເປັນກົກ ແລະ ດໍາເນີນຢ່າງກວ້າງຂວາງ, ເລິກເຊິ່ງ, ແທດເໝາະກັບແຕ່ລະເປົ້າໝາຍ ແນໃສ່ຍົກລະດັບຄວາມຕື່ນຕົວທາງການເມືອງຂອງພົນລະເມືອງລາວໃຫ້ສູງຂຶ້ນ ໂດຍສະເພາະໃຫ້ຜູ້ມີສິດປ່ອນບັດເລືອກຕັ້ງມີຄວາມເຂົ້າໃຈແນວທາງນະໂຍບາຍຂອງພັກ, ກົດໝາຍ, ລະບຽບການທີ່ກ່ຽວຂ້ອງ ໃນການປະຕິບັດສິດ ແລະ ພັນທະພື້ນຖານຂອງພົນລະເມືອງ; ເອົາໃຈໃສ່ປັບປຸງບັນດາເອກະສານ ທີ່ນໍາມາເຜີຍແຜ່ສຶກສາອົບຮົມໃຫ້ເທດເໝາະ ແລະ ສອດຄ່ອງກັບສະພາບການທາງດ້ານເສດຖະກິດ-ສັງຄົມ ໃນແຕ່ລະໄລຍະ ແລະ ສອດຄ່ອງກັບແຕ່ລະກຸ່ມເປົ້າໝາຍ ໃນເຂດຕົວເມືອງ ແລະ ຊົນນະບົດ ຈະເຮັດໃຫ້ຜູ້ມີສິດປ່ອນບັດເຂົ້າໃຈຄວາມໝາຍ, ຄວາມສໍາຄັນຂອງການເລືອກຕັ້ງ ແລະ ເປັນເຈົ້າການໄປໃຊ້ສິດເລືອກຕັ້ງດ້ວຍຄວາມຮັບຜິດຊອບສູງ; ການໂຄສະນາຫາສຽງໃຫ້ຜູ້ສະໝັກຮັບເລືອກຕັ້ງ ຈະຕ້ອງໄດ້ເພີ່ມທະວີຊຸກຍູ້ໃຫ້ອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມເຂົ້າຮ່ວມດ້ວຍຄວາມເປັນເຈົ້າການ ເປັນຕົ້ນແມ່ນການໂຄສະນາຜ່ານສື່ມວນຊົນປະເພດຕ່າງໆ ຫລື ການໂຄສະນາດ້ວຍຮູບການຕ່າງໆ. ເອົາໃຈໃສ່ຕໍ່ເນື້ອໃນການໂຄສະນາຫາສຽງ ໂດຍສຸມໃສ່ການເຜີຍແຜ່ພາລະບົດບາດ, ສິດ ແລະ ໜ້າທີ່ຂອງ ສພຊ, ສະພາປະຊາຊົນຂັ້ນແຂວງ, ສສຊ, ສສຂ, ຜົນງານຂອງສະພາຕິດພັນກັບການໂຄສະນາແນວທາງນະໂຍບາຍຂອງພັກ, ມະຕິຂອງກົມການເມືອງສູນກາງພັກ, ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ລວມທັງຜົນງານຂອງຜູ້ສະໝັກຮັບເລືອກຕັ້ງໂດຍສັງເຂບ; ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຮັບປະກັນການເລືອກຕັ້ງ ດ້ວຍການຫັນລົງກໍ່ສ້າງຮາກຖານການເມືອງຢູ່ຂັ້ນບ້ານ ແລະ ກຸ່ມບ້ານ, ຫັນວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ເປັນໜ້າທີ່ ແລະ ຄວາມຮັບຜິດຊອບຂອງປວງຊົນ; ບັນຫາເກີດຂຶ້ນຢູ່ບ່ອນໃດ ແມ່ນຄວາມຮັບຜິດຊອບຂອງຄະນະພັກ, ອົງການປົກຄອງ ແລະ ກໍາລັງປ້ອງກັນຊາດ-ປ້ອງກັນຄວາມສະຫງົບຢູ່ບ່ອນນັ້ນ ຮັບຜິດຊອບ ແລະ ແກ້ໄຂບັນຫາທີ່ເກີດຂຶ້ນໃຫ້ທັນເວລາ ແລະ ການຂຶ້ນແຜນງົບປະມານຮັບໃຊ້ວຽກງານເລືອກຕັ້ງ ແລະ ຈັດສັນງົບປະມານຮັບໃຊ້ການເລືອກຕັ້ງໃຫ້ແຕ່ລະພາກສ່ວນ ໂດຍສະເພາະການຈັດສັນງົບປະມານໃຫ້ທ້ອງຖິ່ນ ທີ່ສອດຄ່ອງກັບວຽກງານຕົວຈິງຂອງແຕ່ລະພາກສ່ວນທັນກັບເວລາຈະເຮັດໃຫ້ແຜນການກະກຽມ ແລະ ດໍາເນີນການເລືອກຕັ້ງ ບັນລຸຕາມຄາດໝາຍ.

ນອກຈາກນີ້, ທ່ານຍັງໄດ້ສະເໜີບັນດາທ່ານຜູ້ແທນກອງປະຊຸມເອົາໃຈໃສ່ບາງວຽກຕົ້ນຕໍ ດັ່ງນີ້: ມອບໃຫ້ອະນຸກໍາມະການເລຂານຸການຂອງຄະນະກໍາມະການເລືອກຕັ້ງລະດັບຊາດ ສັງລວມຄໍາເຫັນຂອງຜູ້ແທນກອງປະຊຸມ ເພື່ອປັບປຸງເນື້ອໃນຂອງບົດສະຫລຸບຖອດຖອນບົດຮຽນວຽກງານເລືອກຕັ້ງໃຫ້ສົມບູນ ແລະ ສ້າງເປັນປື້ມປະມວນການດໍາເນີນການເລືອກຕັ້ງ ສສຊ ຊຸດທີ IX ແລະ  ສສຂ ຊຸດທີ II; ມອບໃຫ້ຄະນະກໍາມະການເລືອກຕັ້ງຂັ້ນຕ່າງໆ, ຄະນະພັກ, ອົງການປົກຄອງທ້ອງຖິ່ນທຸກຂັ້ນ ຈົ່ງນໍາເອົາຜົນສໍາເລັດການເລືອກຕັ້ງໄປເຜີຍແຜ່ໃຫ້ປະຊາຊົນບັນດາເຜົ່າໄດ້ຮັບຊາບ, ຕິດພັນກັບການເຜີຍແຜ່ຜົນສໍາເລັດການດໍາເນີນກອງປະຊຸມຄັ້ງປະຖົມມະລືກຂອງ ສພຊ, ສະພາປະຊາຊົນຂັ້ນແຂວງ; ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ໃຫ້ຄະນະພັກ, ອົງການປົກຄອງແຂວງ, ນະຄອນຫລວງວຽງຈັນ ປະສານສົມທົບກັບຄະນະປະຈໍາສະພາປະຊາຊົນຂັ້ນແຂວງ ໃນການກະກຽມ ແລະ ດໍາເນີນກອງປະຊຸມຄັ້ງປະຖົມມະລືກຂອງສະພາປະຊາຊົນຂັ້ນແຂວງ ເພື່ອພິຈາລະນາຮັບຮອງບັນຫາສໍາຄັນພື້ນຖານຂອງທ້ອງຖິ່ນ ໂດຍສະເພາະການເລືອກຕັ້ງ, ການຮັບຮອງການແຕ່ງຕັ້ງບຸກຄະລາກອນຂອງສະພາປະຊາຊົນຂັ້ນແຂວງ; ການເລືອກຕັ້ງ, ການຮັບຮອງການແຕ່ງຕັ້ັງ ບຸກຄະລາກອນຂອງອົງການປົກຄອງແຂວງ ຕາມກົດໝາຍກໍານົດ, ການພິຈາລະນາຮັບຮອງແຜນພັດທະນາເສດຖະກິດ-ສັງຄົມຂອງແຂວງ, ນະຄອນ ຫລວງວຽງຈັນ ແລະ ອື່ນໆ.

ແຫຼ່ງຂ່າວທີ່ມາ: ສະພາແຫ່ງຊາດ