ຕອນບ່າຍວັນທີ 19 ກັນຍາ 2023 ນີ້, ທີ່ສະໂມສອນສະພາປະຊາຊົນແຂວງ ເຊກອງ (ສພຂ) ທ່ານ ປອ ລີເບີ ລີບົວປາວ ປະທານກຳມາທິການ ແຜນການການເງິນ ແລະ ກວດສອບ ພ້ອມດ້ວຍຄະນະທີມງານທີ່ມາຈາກສະພາແຫ່ງຊາດ ໄດ້ ຕາງໜ້າບໍລິສັດທອງສະຫວັນກໍ່ສ້າງ ຈໍາກັດ ມອບຄັອມພິວເຕີຕັ້ງໂຕະ ຈໍານວນ 15 ຊຸດ ລວມມູນຄ່າ 130 ລ້ານກີບ ໃຫ້ແກ່ສະພາປະຊາຊົນແຂວງ ເຊກອງ ໃຫ້ກຽດກ່າວຮັບໂດຍທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ເຊກອງ, ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ພະແນກການ ແລະ ຂະແໜງການພາຍໃນສະພາປະຊາຊົນແຂວງ ເຂົ້າຮ່ວມ.
ໂອກາດນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ໄດ້ສະແດງຄວາມຂອບໃຈມາຍັງ ທ່ານ ລີເບີ ລີບົວປາວ ພ້ອມຄະນະ ທີ່ໄດ້ນຳເອົາຄັອມພິມເຕີ ມາມອບໃຫ້ໃນຄັ້ງນີ້, ພ້ອມທັງໃຫ້ຄຳໝັ້ນສັນຍາວ່າ ຈະນຳໄປບັນຈຸໃຫ້ຂະແໜງການຂອງສະພາປະຊາຊົນແຂວງທີ່ຂາດເຂີນ ເພື່ອໃຫ້ໄດ້ຊົມໃຊ້ກັນຢ່າງທົ່ວເຖິງ ແລະ ໝູນໃຊ້ເຂົ້າໃນແຕ່ລະໜ້າວຽກງານໃຫ້ເກີດປະໂຫຍດສູງສຸດ.#ໂດຍ: ນາລີວັນ.