ພິທີມອບຫຼຽນ ແລະ ໃບຍ້ອງຍໍຜົນງານ 5 ປີ ວຽກງານການແຂ່ງຂັນຮັກຊາດ ແລະ ພັດທະນາ (2016-2020) ໄດ້ຈັດຂຶ້ນໃນຕອນບ່າຍວັນທີ 6 ມີນາ 2023 ນີ້ ຢູ່ທີ່ສະໂມສອນສະພາປະຊາຊົນແຂວງ (ສພຂ) ໂດຍພາຍໃຕ້ການເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ເຊກອງ, ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ພະນັກຫຼັກແຫຼ່ງສະພາປະຊາຊົນແຂວງ, ພະນັກງານອາວຸໂສບໍານານ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ບົວທອງ ຄຸ້ມມະວົງ ຮອງເລຂາທິການສະພາປະຊາຊົນແຂວງ ໄດ້ຜ່ານດໍາລັດຂອງທ່ານ ປະທານປະເທດ ສະບັບເລກທີ 167/ປປທ, ລົງວັນທີ 14/09/2022; ຜ່ານດໍາລັດຂອງທ່ານ ນາຍົກລັດຖະມົນຕີ ສະບັບເລກທີ 373/ນຍ, ລົງວັນທີ 14/09/2022 ແລະ ຂໍ້ຕົກລົງຂອງທ່ານ ເຈົ້າແຂວງ ສະບັບເລກທີ 03/ຊກ, ລົງວັນທີ 10/01/2022. ຈາກນັ້ນ, ກໍໄດ້ມີການມອບຫຼຽນໄຊແຮງງານຊັ້ນ II; ຫຼຽນໄຊແຮງງານຊັ້ນ III; ຫຼຽນກາແຮງງານ ແລະ ມອບໃບຍ້ອງຍໍໃຫ້ກັບບຸກຄົນທີ່ມີຜົນງານດີເດັ່ນໃນການປະກອບສ່ວນເຫື່ອແຮງເຂົ້າໃນຂະບວນການແຂ່ງ ຂັນຮັກຊາດ ແລະ ພັດທະນາ, ຜັນຂະຫຍາຍວຽກງານສາມສ້າງ ໃນທົ່ວປະເທດ ແລະ ທົ່ວແຂວງ ໄລຍະ 05 ປີ 2016-2020. ໃນນັ້ນ, ບຸກຄົນທີ່ໄດ້ຮັບຫຼຽນໄຊແຮງງານຊັ້ນ II ມີຈໍານວນ 06 ທ່ານ; ຫຼຽນໄຊແຮງງານຊັ້ນ III ມີ 04 ທ່ານ, ຍິງ 01 ທ່ານ; ຫຼຽນກາແຮງງານມີ 05 ທ່ານ, ຍິງ 02 ທ່ານ; ໃບຍ້ອງຍໍລັດຖະບານມີ 14 ທ່ານ, ຍິງ 03 ທ່ານ ; ໃບຍ້ອງຍໍເຈົ້າແຂວງ 19 ທ່ານ, ຍິງ 09 ທ່ານ. ເຊິ່ງຜົນງານດັ່ງກ່າວເປັນການປະກອບສ່ວນອັນສໍາຄັນໃຫ້ແກ່ການພັດທະນາປະເທດຊາດກໍຄືແຂວງ ເຊກອງ.
ໂອກາດນີ້, ທ່ານ ດົງເພັດ ພະຍົນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ສາມາດຈັດຕັ້ງປະຕິບັດໄດ້ໃນໄລຍະຜ່ານມາ ແລະ ເນັ້ນໃຫ້ຄະນະພັກ-ຄະນະນໍາແຕ່ລະຂັ້ນສະພາປະຊາຊົນແຂວງ ເຊກອງ ສືບຕໍ່ນໍາພາ-ຊີ້ນໍາພະນັກງານ, ສະມາຊິກພັກ ແລະ ພະນັກງານຫຼັກແຫຼ່ງຂອງຕົນ ຈັດຕັ້ງປະຕິບັດມະຕິຄໍາສັ່ງ, ແຜນງານ, ໂຄງການຕ່າງໆທີ່ຂະແໜງການຕົນວາງໄວ້ໃຫ້ມີຜົນສໍາເລັດ ແລະ ໃຫ້ຖືກຕາມລະບຽບກົດໝາຍ ເພື່ອແນໃສ່ພັດທະນາເສດຖະກິດ-ສັງຄົມ, ພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນໃຫ້ຫຼຸດລົງເປັນກ້າວໆ.
ຄຽງຄູ່ກັນນັ້ນ, ຕ້ອງໄດ້ຍູ້ແຮງຂະບວນການແຂ່ງຂັນ-ຍ້ອງຍໍ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຜັນຂະຫຍາຍວຽກງານ 3 ສ້າງ ເຂົ້າສູ່ທຸກຂົງເຂດວຽກງານຢ່າງຕັ້ງໜ້າ; ປຸກລະດົມສະມາຊິກພັກ, ພະນັກງານຫຼັກແຫຼ່ງ ເຂົ້າຮ່ວມຢ່າງແຂງແຮງ ແລະ ກວ້າງຂວາງ ເພື່ອພ້ອມກັນພັດທະນາເສດຖະກິດ-ສັງຄົມຂອງແຂວງ, ເມືອງ ແລະ ບ້ານໃຫ້ເປັນຂະບວນຟົດຟື້ນ, ຕໍ່ເນື່ອງ ແລະ ມີຜົນສໍາເລັດ.
#ໂດຍ: ນາລີວັນ.