ໃນຕອນບ່າຍວັນທີ 04 ພະຈິກ 2024 ທີ່ສະໂມສອນ ສະພາປະຊາຊົນແຂວງເຊກອງ (ສພຂ) ໄດ້ຈັດພິທີມອບ-ຮັບ ໜ້າທີ່ລະຫວ່າງປະທານກຳມະການເສດຖະກິດ, ແຜນການ ແລະ ການເງິນ (ສພຂ) ຜູ້ເກົ່າ ກັບ ຜູ້ໃໝ່ ແລະ ຮັບຮອງເອົາການຍົກຍ້າຍຮອງປະທານກໍາມະການຍຸຕິທໍາ ແລະ ປກຊ-ປກສ ໄປປະຈໍາການຢູ່ກອງບັນຊາການ ປກສ ແຂວງເຊກອງ ໂດຍການເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ ປະທານ ສພຂ ເຊກອງ, ເຂົ້າຮ່ວມມີບັນດາທ່ານ ຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ, ກໍາມະການພັກແຂວງ, ຫົວໜ້າ-ຮອງພະແນກ, ອົງການທຽບເທົ່າ, ບໍລິສັດລັດວິສາຫະກິິດ ແລະ ພະນັກງານພາຍໃນ ສພຂ.
           ໃນພິທີ, ທ່ານ ນາງ ຄໍາເສັງ ທຸມມະວົງສາ ກຳມະການພັກແຂວງ ຮອງປະທານສະພາປະຊາຊົນແຂວງ ໄດ້ຜ່ານມະຕິຂອງຄະນະປະຈໍາ ສພຂ ສະບັບເລກທີ 204/ຄຈພຂ, ລົງວັນທີ 07 ຕຸລາ 2024 ວ່າດ້ວຍການພິຈາລະນາ, ຮັບຮອງເອົາການຍົກຍ້າຍທ່ານ ພົງສະຫວັດ ສິງຫາລາດ ສະມາຊິກສະພາປະຊາຊົນແຂວງ ຮອງເລຂາຄະນະພັກຮາກຖານ ປະທານກໍາມະການເສດຖະກິດ, ແຜນການ ແລະ ການເງິນ ສພຂ ໄປປະຈໍາການຢູ່ອົງການປົກຄອງເມືອງທ່າແຕງ; ມະຕິ ສະບັບເລກທີ 218/ຄປຈຂ, ລົງວັນທີ 28 ຕຸລາ 2024 ວ່າດ້ວຍຮັບຮອງການແຕ່ງຕັ້ງທ່ານ ໄຊຍະຫວັດ ກ້ອນຄໍາໝັ້ນ ຮອງເລຂາພັກເມືອງ ປະທານກວດກາພັກ-ລັດເມືອງ ຫົວໜ້າຄະນະ ສສຂ ປະຈໍາເຂດເລືອກຕັ້ງເມືອງລະມາມ ເປັນປະທານກໍາມະການເສດຖະກິດ, ແຜນການ ແລະ ການເງິນ ສພຂ ແລະ ມະຕິ ສະບັບເລກທີ 220/ຄຈພຂ, ລົງວັນທີ 04 ພະຈິກ 2024 ວ່າດ້ວຍຮັບຮອງເອົາການຍົກຍ້າຍທ່ານ ພັທ ກິໄພລົງ ໄຊຍະມຸງຄຸນ ສສຂ ຊຸດທີ II ຮອງປະທານກໍາມະການຍຸຕິທໍາ ແລະ ປກຊ-ປກສ ໄປປະຈໍາການຢູ່ກອງບັນຊາການປ້ອງກັນຄວາມສະຫງົບແຂວງ. ຈາກນັ້ນ, ກໍໄດ້ມີພິທີມອບ-ຮັບມະຕິ ແລະ ລົງນາມມອບ-ຮັບໜ້າທີ່ລະຫວ່າງປະທານກໍາມະການເສດຖະກິດ, ແຜນການ ແລະ ການເງິນ ຜູ້ເກົ່າ ກັບ ຜູ້ໃໝ່.
ໂອກາດດັ່ງກ່າວ ທ່ານ ດົງເພັດ ພະຍົນ ໄດ້ມີຄຳເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງທັງສາມທ່ານທີ່ຍາດມາໄດ້ໃນໄລຍະຜ່ານມາ ຊຶ່ງຜົນສໍາເລັດທີ່ຍາດມາໄດ້ນັ້ນ ແມ່ນຍ້ອນການປະຕິບັດໜ້າທີ່ດ້ວຍຄວາມຮັບຜິດຊອບສູງຂອງບັນດາທ່ານຮ່ວມກັບ ຄະນະ ແລະ ພະນັກງານທັງໝົດຂອງຄະນະກໍາມະການ, ຂະແໜງການ ໂອກາດຕໍ່ໄປນີ້ຮຽກຮ້ອງບັນດາທ່ານທີ່ໄດ້ຮັບໜ້າໜ້າທີ່ໃໝ່ ກໍາແໜ້ນພາລະບົດບາດໜ້າທີ່ຂອງຕົນ, ເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ການເມືອງຂອງຕົນໃຫ້ສູງຂຶ້ນ, ສຸມໃສ່ແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ, ເອົາໃຈໃສ່ແກ້ໄຂປະກົດການຫຍໍ້ທໍ້ ໃນກົງຈັກ ໃຫ້ຫຼຸດລົງເປັນກ້າວໆ ໂດຍສະເພາະ ເອົາໃຈໃສ່ວຽກງານການເມືອງແນວຄິດສຶກສາອົບສ້າງພະນັກງານໃຫ້ມີແນວຄິດຫຼັກໝັ້ນຕໍ່ການນຳພາຂອງພັກ, ກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ນິຕິກໍາ-ລະບຽບການທີ່ກ່ຽວຂ້ອງ, ຍົກສູງສະຕິຄວາມຮັບຜິດຊອບໜ້າທີ່ການເມືອງ, ມີຄວາມສາມັກຄີເປັນຈິດໜຶ່ງໃຈດຽວ, ມີຈັນຍາບັນ ຮັກວິຊາຊີບ, ປະຕິບັດວິໄນຢ່າງເຄັ່ງຄັດ, ແລະ ຖືເອົາຜົນປະໂຫຍດຂອງປະເທດຊາດ-ປະຊາຊົນເປັນຫຼັກ ໄປຄຽງຄູ່ກັບການປັບປຸງແບບແຜນວິທີເຮັດວຽກ ແລະ ແບບແຜນການນໍາພາ ຄຸ້ມຄອງໃຫ້ມີປະສິດທິຜົນສູງຂຶ້ນ.#ໂດຍ: ນາລີວັນ.