ກໍາມະບານຮາກຖານ ສະພາປະຊາຊົນແຂວງ ເຊກອງ (ສພຂ) ໄດ້ຈັດພິທີປາຖະກະຖາເລົ່າຄືນມູນເຊື້ອ ວັນສ້າງຕັ້ງກໍາມະບານລາວ ຄົບຮອບ 66 ປີ ( 1 ກຸມພາ ປີ 1956 – 1 ກຸມພາ ປີ 2022) ໃນຕອນເຊົ້າ ວັນທີ 25 ກຸມພາ 2022 ນີ້ ທີ່ສະໂມສອນຂອງ ສະພາປະຊາຊົນແຂວງ ເປັນກຽດປາຖະກະຖາໂດຍ ທ່ານ ປອ ແພງສີ ສີລາວີ ຄະນະປະຈໍາພັກແຂວງ, ຮອງປະທານ ສະພາປະຊາຊົນແຂວງ, ເຊິ່ງມີບັນດາທ່ານ ຄະນະກໍາມະບານຮາກຖານ ສະພາປະຊາຊົນແຂວງ, ຫົວໜ້າຈຸ-ຮອງຈຸ, ສະມາຊິກກໍາມະບານຮາກຖານ ສະພາປະຊາຊົນແຂວງ ພ້ອມດ້ວຍແຂກທີ່ຖືກເຊີນ ເຂົ້າຮ່ວມ.
ໂອກາດດັ່ງກ່າວ ທ່ານ ປອ ແພງສີ ສີລາວີ ໄດ້ຍົກໃຫ້ເຫັນເຖິງປະຫວັດມູນເຊື້ອ ການກຳເນີດເຕີບໃຫຍ່ຂະຫຍາຍຕົວ ແລະ ຜົນສໍາເລັດ ໃນການປະກອບສ່ວນເຂົ້າໃນພາລະກິດປະຕິວັດ ຂອງອົງການຈັດຕັ້ງກໍາມະບານລາວໃນແຕ່ລະໄລຍະ ເປັນຕົ້ນ: ໄລຍະການປະຕິວັດຊາດ ປະຊາທິປະໄຕ, ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ
ທັງໝົດນັ້ນ, ກໍເພື່ອເປັນການສຶກສາອົບຮົມການເມືອງ-ແນວຄິດໃຫ້ຖັນແຖວກໍາມະບານ, ກໍາມະກອນ ແລະ ຊາວຜູ້ອອກແຮງງານ ກໍຄືສະມາຊິກກໍາມະບານຮາກຖານ ສະພາປະຊາຊົນແຂວງ ໄດ້ຮັບຮູ້ ແລະ ເຂົ້າໃຈເຖິງຄວາມໝາຍ ແລະ ຄວາມສໍາຄັນກ່ຽວກັບພາລະບົດບາດ, ສິດ ແລະ ໜ້າທີ່ຂອງອົງການຈັດຕັ້ງກໍາມະບານລາວໄລຍະໃໝ່ຂອງການປະຕິວັດ ເຊິ່ງເປັນອົງການຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທໍາຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານ ເພື່ອນໍາເອົາມູນເຊື້ອດັ່ງກ່າວມານໍາໃຊ້ເຂົ້າໃນວຽກງານຂອງຕົນຮັບຜິດຊອບໃຫ້ປະສົບຜົນສໍາເລັດຕາມລະດັບຄາດໝາຍ.
ນອກຈາກນີ້, ຍັງໄດ້ຮັບຟັງກ່ຽວກັບບັນດາແຈ້ງການຂອງສະຫະພັນກໍາມະບານແຂວງ ແລະ ເອກະສານທີ່ສໍາຄັ້ນຕ່າງໆທີ່ກ່ຽວຂ້ອງຈາກທ່ານ ສຸກັນ ທັນທະວົງສາ ປະທານກໍາມະບານຮາກຖານ ສະພາປະຊາຊົນແຂວງ ຕື່ມອີກ.