ເພື່ອເຮັດໃຫ້ສະມາຊິກສະພາປະຊາຊົນຂັ້ນແຂວງ, ບັນດາຂະແໜງການ ອ້ອມຂ້າງແຂວງ ແລະ ເມືອງ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ແລະ ຊັດເຈນ ກ່ຽວກັບຂັ້ນຕອນ ແລະ ວິທີການ, ໃນການແກ້ໄຂບັນຫາຕ່າງໆໃນການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ໃຫ້ສອດຄ່ອງຕາມແນວທາງນະໂຍບາຍຂອງພັກ-ລັດ ແລະ ລະບຽບກົດໝາຍ.
ກອງປະຊຸມຝຶກອົບຮົມ ກ່ຽວກັບການຄຸ້ມຄອງ ແລະ ປົກປ້ອງ ການເຄື່ອນໄຫວສາສະໜາ ໃຫ້ແກ່ສະມາຊິກສະພາປະຊາຊົນຂັ້ນແຂວງ ແລະ ພະແນກການທີ່ກ່ຽວຂ້ອງ ໄດ້ເປີດຂຶ້ນໃນວັນທີ 21 ກັນຍາ 2023 ທີ່ເມືອງຊານໄຊ ແຂວງອັດຕະປື ໂດຍການເປັນປະທານຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ; ເຂົ້າຮ່ວມມີນັກວິທະຍາການທີ່ມາຈາກອົງການແນວລາວສ້າງຊາດແຂວງ, ສະພາປະຊາຊົນແຂວງ, ພະແນກພາຍໃນ, ກອງບັນຊາການ ປກສ, ມີນັກສໍາມານາກອນທີ່ເປັນສະມາຊິກສະພາປະຊາຊົນແຂວງ ແລະ ຂະແໜງການທີ່ກ່ຽວຂ້ອງຂອງແຂວງ ແລະ ເມືອງເຂົ້າຮ່ວມຈໍານວນ 50 ກວ່າທ່ານ.
ກອງປະຊຸມ ທ່ານ ນາງ ມີນາພອນ ໄຊສົມພູ ໄດ້ກ່າວເປີດຝືກອົບຮົມວ່າ: ກອງປະຊຸມຈະໃຊ້ເວລາ 2 ວັນ, ເພື່ອຮັບປະກັນເຮັດໃຫ້ກອງປະຊຸມໄດ້ຮັບປະສິດທິຜົນສູງນັ້ນ, ບັນດາເອກະສານທີ່ນໍາມາສະເໜີ ແມ່ນໄດ້ຄັດຈ້ອນນໍາເອົາເນື້ອໃນທີ່ເລິກເຊິ່ງ, ຄົບຖ້ວນ ແລະ ສາມາດນໍາໄປຈັດຕັ້ງປະຕິບັດໃນວຽກງານຕົວຈິງ ເຊີ່ງປະກອບມີເອກກະສານດັ່ງນີ້: ສະພາບການກ່ຽວກັບວຽກງານສາສະໜາ ແລະ ທັດສະນະໃນການຄຸ້ມຄອງລັດ, ຄຸ້ມຄອງສັງຄົມ ແລະ ວຽກງານສາສະໜາ; ບົດຮຽນໃນການຄຸ້ມຄອງລັດ ກ່ຽວກັບວຽກງານສາສະໜາ ແລະ ວຽກງານທີ່ຄວນເອົາໃຈໃສ່ ໃນຕໍ່ໜ້າກ່ຽວກັບວຽກງານສາສະໜາ; ບົດຮຽນກ່ຽວກັບການປະຕິບັດພາລະບົດບາດ,ສິດ ແລະ ໜ້າທີ່ວຽກງານຂອງອົງການແນວລາວສ້າງຊາດແຂວງ, ຕິດພັນກັບການແກ້ໄຂປະກົດການຫຍໍ້ທໍ້ທາງດ້ານ ສາສະໜາຢູ່ແຂວງ ອັດຕະປື; ບົດຮຽນກ່ຽວກັບການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງ ປກສ ແຂວງຕິດພັນກັບການແກ້ໄຂປະກົດການຫຍໍ້ທໍ້ທາງດ້ານ ສາສະໜາຢູ່ແຂວງ ອັດຕະປື; ບົດຮຽນກ່ຽວກັບການຕິດຕາມ ກວດກາຜົນການຈັດຕັ້ງປະຕິບັດລັດຖະທໍາມະນູນ,ກົດໝາຍວຽກງານການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຂອງກໍາມະການ ວັດທະນະທໍາ-ສັງຄົມ ແລະບັນດາເຜົ່າຢູ່ແຂວງອັດຕະປື;
ພ້ອມນັ້ນນີ້ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມທັງໝົດ,ຈົ່ງເພີ່ມທະວີຄວາມຮັບຜິດຊອບຂອງຕົນປະກອບຄວາມຄິດຄວາມເຫັນຢ່າງເລິກເຊີ່ງ,ມີລັກສະນະສ້າງສັນ ແລະ ປະຊາທິປະໄຕ. ເພື່ອເຮັດໃຫ້ກອງປະຊຸມຝຶກອົບຮົມສໍາມະນາ ແລະ ສ້າງຄວາມເຂັ້ມແຂງ ກ່ຽວກັບການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ແຂວງອັດຕະປື ໃນເທື່ອນີ້ ໃຫ້ບັນລຸຕາມຈຸດປະສົງ ແລະ ລະດັບຄາດໝາຍ.
ກອງປະຊຸມຄັ້ງນີ້, ໄດ້ຮັບການສະໜັບສະໜູນໂດຍໂຄງການສ້າງຄວາມເຂັ້ມແຂງສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).
(ວິນັດ)