ໂດຍປະຕິບັດຕາມແຈ້ງການຂອງຄະນະເລຂາທິການສະພາແຫ່ງຊາດ ສະບັບເລກທີ 160/ຄລສ.ກກໝ, ລົງວັນທີ 25 ເມສາ 2023 ວ່າດ້ວຍ ການທາບທາມຄໍາເຫັນໃສ່ຮ່າງກົດໝາຍ 11 ສະບັບ ທີ່ຈະນໍາເຂົ້າພິຈາລະນາ ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX. ໃນວັນທີ 2 ພຶດສະພາ 2023. ສະພາປະຊາຊົນແຂວງ (ສພຂ) ອັດຕະປື ໄດ້ຈັດກອງປະຊຸມທາບທາມຮ່າງກົດໝາຍຈໍານວນ 11 ສະບັບຂຶ້ນທີ່ ຫ້ອງປະຊຸມ ສພຂ ໂດຍການເປັນປະທານຂອງ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານ ສພຂ, ມີບັນດາທ່ານຄະນະປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ສະມາຊິກສະພາປະຊາຊົນແຂວງ, ອະດີດການນໍາພັກ-ລັດແຂວງ ພ້ອມດ້ວຍພະແນກການທີ່ກ່ຽວຂ້ອງ ແລະ ແຂກທີ່ຖືກເຊີນເຂົ້າຮ່ວມ.
ກອງປະຊຸມຈະໄດ້ດໍາເນີນເປັນເວລາ 4 ວັນ. ເຊິ່ງຜູ້ເຂົ້າຮ່ວມຈະໄດ້ພ້ອມກັນສຸມທຸກສະຕິປັນຍາເຂົ້າໃນການຄົ້ນຄວ້າ, ວິເຄາະ, ເນື້ອໃນ ແລະ ການປະກອບຄໍາເຫັນຕໍ່ ຮ່າງກົດໝາຍວ່າດ້ວຍ ການຊົດເຊີຍຄ່າເສຍຫາຍຈາກລັດ(ສ້າງໃໝ່); ຮ່າງກົດໝາຍວ່າດ້ວຍ ການປົກຄອງ (ສ້າງໃໝ່); ຮ່າງກົດໝາຍວ່າດ້ວຍ ການຈັດຫາງານ (ສ້າງໃໝ່); ຮ່າງກົດໝາຍວ່າດ້ວຍ ອາກອນທີ່ດິນ (ສ້າງໃໝ່); ຮ່າງກົດໝາຍວ່າດ້ວຍ ສາທາລະນະສຸກ (ສ້າງໃໝ່); ຮ່າງກົດໝາຍວ່າດ້ວຍ ການຈັດພິມຈໍາໜ່າຍ (ປັບປຸງ); ຮ່າງກົດໝາຍວ່າດ້ວຍ ສັດນໍ້າ ແລະ ການປະມົງ (ປັບປຸງ); ຮ່າງກົດໝາຍວ່າດ້ວຍ ສັດປ່າ (ປັບປຸງ); ຮ່າງກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ (ປັບປຸງ); ຮ່າງກົດໝາຍວ່າດ້ວຍ ທະນາຄານທຸລະກິດ (ປັບປຸງ) ແລະ ຮ່າງກົດໝາຍວ່າດ້ວຍ ສານທະຫານ (ປັບປຸງ). ເພື່ອແນ່ໃສ່ເຮັດໃຫ້ເນືຶ້ອໃນມີຄວາມຄົບຖ້ວນ, ສົມບູນ, ຮັດກຸມ, ຊັດເຈນ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ມີຄວາມຖືກຕ້ອງສອດຄ່ອງກັບສະພາບຄວາມເປັນຈິງ, ສາມາດນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະໄດ້ໄຂຂຶ້ນໃນຕົ້ນເດືອນ ມີຖຸນາ 2023 ນີ້, ຮັບປະກັນການຕົກລົງບັນຫາຢ່າງມີຄວາມເປັນເອກະພາບ, ສາມາດເປັນບ່ອນອີງໃນການຈັດຕັ້ງປະຕິບັດວຽກງານຕົວຈິງ.
(ພາບ-ຂ່າວ: ສພຂ ອັດຕະປື)