ວັນທີ 14 ກຸມພາ 2022, ທີ່ຫ້ອງປະຊູມສະພາປະຊາຊົນແຂວງຫົວພັນ ກົມສື່ມວນຊົນ ສະພາແຫ່ງຊາດ ນຳໂດຍທ່ານ ເປຄຳ ລໍຄຳສອນ ຮອງກົມສື່ມວນຊົນ ສະພາແຫ່ງຊາດ ພ້ອມດ້ວຍທ່ານ ຂັນທະວີ ວົງພະຈັນ ຮອງກົມສື່ມວນຊົນ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຝິກອົບຮົມວຽກງານສື່ມວນຊົນ ໃນຫົວຂໍ້ ຍຸດທະສາດໃໝ່ແຫ່ງການກະຈາຍຂໍ້ມູນຂ່າວສານ ຜ່ານໂທລະສັບມືຖືໂດຍການເຂົ້າຮ່ວມຂອງທ່ານ ສຸກມີໄຊ ສິງບຸນເຮືອງ ຮອງເລຂາທິການ ສະພາປະຊາຊົນແຂວງ ແລະ ພະນັກງານວິຊາການພາຍໃນຂະແໜງຄົ້ນຄວ້າ ສັງລວມ ແລະ ຂໍ້ມູນຂ່າວສານພ້ອມວິຊາການຂະແໜງການທີ່ກ່ຽວຂອງພາຍໃນສະພາປະຊາຊົນແຂວງເຂົ້າຮ່ວມ.

ທັງນີ້ເພື່ອເປັນການຍົກສູງຄຸນນະພາບຂອງວຽກງານສື່ມວນຊົນໃຫ້ທັນກັບເຫດການໃນຍຸກແຫ່ງ ເຕັກໂນໂລຊີໃໝ່ ແລະເພື່ອເປັນການປະຕິບັດພາລະບົດບາດຂອງຕົນໃນຖານະເປັນກະບອກສຽງອັນສຳຄັນ ໃນການເຜີຍແຜ່ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ກໍຄື ສະພາປະຊາຊົນແຂວງ ແລະ ທັງເປັນການສະໜອງຂໍ້ມູນ-ຂ່າວສານໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ປະຊາຊົນ ໃຫ້ນັບມື້ນັບກວ້າງຂວາງ ແລະ ທັນສະໄໝຍິ່ງຂຶ້ນ.