ເພື່ອຍົກສູງຂີດຄວາມສາມາດ ແລະ ທັກສະ ການສ້າງຄວາມເຂັ້ມແຂງໃຫ້ແກ່ ສະມາຊິກສະພາປະຊາຊົນແຂວງ ຊຸດທີ II ໃນການຈັດຕັ້ງປະຕິບັດພາລະບົດບາດຂອງຕົນ ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ມີປະສິດທິພາບ ແລະ ປະສິດທິຜົນ. ໃນລະຫວ່າງວັນທີ 15-16 ກຸມພາ 2024 ນີ້, ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມຝຶກອົບຮົມ ວິທີການແນະນໍາ ໃຫ້ຄໍາປຶກສາທີ່ດີກັບປະຊາຊົນ ຂອງສະມາຊິກສະພາປະຊາຊົນແຂວງ ຊຸດທີ II ຂຶ້ນ ທີ່ຫ້ອງປະຊຸມ ຫ້ອງວ່າການ ເມືອງກັວນ ແຂວງຫົວພັນ ພາຍໃຕ້ການເປັນປະທານຂອງ ທ່ານ ນາງ ອໍາໄພວອນ ລ້ອມບຸນແພງ ກໍາມະການ ສໍາຮອງສູນກາງພັກ, ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8, ປະທານສະພາປະຊາຊົນ ແຂວງຫົວພັນ ເຂົ້າຮ່ວມມີ ນັກວິທະຍາກອນ, ນັກສໍາມະນາກອນ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 10 ເມືອງ ທົ່ວແຂວງ ຕະຫຼອດຮອດ ພະນັກງານລັດຖະກອນຂະແໜງການກ່ຽວຂ້ອງ ຂອງສະພາປະຊາຊົນແຂວງ ເຂົ້າຮ່ວມທັງໝົດ 47 ຄົນ, ຍິງ 6 ຄົນ; ໂດຍໄດ້ຮັບທຶນສະໜັບສະໜູນ ຈາກໂຄງການມູນນິທິເອເຊຍ (The Asia Foundation).

                 ໃນກອງປະຊຸມ ໄດ້ຮັບຟັງການນໍາສະເໜີ ຈໍານວນ 4 ເອກະສານພາຍໃຕ້ຫົວຂໍ້: ບົດແລກປ່ຽນຄວາມເຫັນ ກ່ຽວກັບການຕິດຕາມກວດກາ ວຽກງານຍຸຕິທໍາ; ເຜີຍແຜ່ ກົດໝາຍວ່າດ້ວຍ ການແກ້ໄຂຄໍາຮ້ອງທຸກ ສະບັບປັບປຸງ ປີ 2022; ການຮັບ ແລະ ພິຈາລະນາ ຄໍາຮ້ອງຂໍຄວາມເປັນທໍາ ຂອງຄະນະປະຈໍາສະພາປະຊາຊົນແຂວງ; ຮ່າງບົດລາຍງານ ການແກ້ໄຂຄໍາຮ້ອງຂໍຄວາມເປັນທໍາ ແລະ ຮ່າງໜັງສືສະເໜີ, ຮ່າງບົດລາຍງານ, ຮ່າງໃບຄໍາຮ້ອງຂໍຄວາມເປັນທໍາຂອງພົນລະເມືອງ ແລະ ເຜີຍແຜ່ມະຕິ ສະພາແຫ່ງຊາດ ສະບັບເລກທີ 07/ຄປຈ, ວ່າດ້ວຍການຮັບ ແລະ ພິຈາລະນາຄໍາຮອງຂໍຄວາມເປັນທໍາ; ພ້ອມດຽວກັນນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາຄິດຄໍາເຫັນ ແລກປ່ຽນບົດຮຽນ ເຊິ່ງກັນ ແລະ ກັນ ພ້ອມທັງຍົກປະສົບການ ໃນການຈັດຕັ້ງປະຕິບັດໜ້າທີ່ວຽກງານຕົວຈິງມາສົມທຽບກັບ ບັນດາເນື້ອໃນກອງປະຊຸມຝຶກອົບຮົມ ໃຫ້ມີຄວາມຮັບຮູ້ເຂົ້າໃຈເລິກເຊິ່ງ ຄວາມເປັນເອກະພາບກັນ ແລະ ນໍາໄປຈັດຕັ້ງປະຕິບັດຕາມພາລະບົດບາດຂອງຕົນໃຫ້ນັບມື້ດີຂຶ້ນ.

            ຕອນທ້າຍ ປະທານກອງປະຊຸມໄດ້ມີຄຳເຫັນໂອ້ລົມ ພ້ອມທັງຮຽກຮ້ອງມາຍັງບັນດາທ່ານທີ່ເຂົ້າຮ່ວມກອງປະຊຸມຝຶກອົບຮົມສໍາມະນາຄັ້ງນີ້ ຈົ່ງພ້ອມກັນນໍາເອົາຄໍາຄິດຄໍາເຫັນ ຄວາມຮູ້ ຈາກວິທະຍາກອນ ໄດ້ນໍາສະເໜີມານັ້ນ ໄປຈັດຕັ້ງປະຕິບັດເຂົ້າໃນວຽກງານຕົວຈິງ ເພາະວ່າຫົວຂໍ້ ການແກ້ໄຂຄໍາຮ້ອງຂໍຄວາມເປັນທໍາ ເປັນວຽກງານທີ່ສໍາຄັນແນໃສ່ເຮັດໃຫ້ການຄຸມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍໃຫ້ເຂົ້າສູ່ລວງເລິກ ເທຶ່ອລະກ້າວ ແລະ ຍັງໄດ້ເນັ້ນໜັກບາງບັນຫາສໍາຄັນເຊັ່ນ: ເພີ່ມທະວີການລົງຕິດຕາມກວດກາຂອງສະພາປະຊາຊົນຂັ້ນແຂວງຕໍ່ກັບຄວາມຮັບຜິດຊອບການເມືອງ ຂອງອົງການທີ່ມີສິດ ແລະ ໜ້າທີ່ໃນການແກ້ໄຂຄໍາຮ້ອງເພື່ອຮັບປະກັນໃຫ້ສັງຄົມມີຄວາມສະງົບ, ຄວາມເປັນລະບຽບຮຽບຮ້ອຍ, ປະຊາຊົນສາມາດເຂົ້າໃຈຕໍ່ຂະບວນການຍຸດຕິທໍາຫຼາຍຂຶ້ນຮັບປະກັນຄວາມຍຸຕິທໍາ ແລະ ໂປ່ງໃສ ເອົາໃຈໃສ່ຄົ້ນຄວ້າເກັບກໍາຂໍ້ມູນ ວິເຄາະ, ວິໄຈ ໃຫ້ລະອຽດຈະແຈ້ງ ເພື່ອເປັນບ່ອນອີງ ໃນການຄົ້ນຄໍາຮ້ອງ ຄໍາສະເໜີຂອງປະຊາຊົນ ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າ ພິຈາລະນາແກ້ໄຂ, ເອົາໃຈໃສ່ຕິດຕາມກວດກາຜົນຂອງການແກ້ໄຂ ຄໍາຮ້ອງຂໍຄວາມເປັນທໍາຂອງຂະແໜງການກ່ຽວຂ້ອງ ໃຫ້ມີຄວາມຖຶກຕ້ອງຕາມ 5 ຫຼັກການ ໃຫ້ຄໍາປຶກສາ ແລະ ຄໍາແນະນໍາແກ່ພົນລະເມືອງກ່ຽວກັບການຍື່ນຄໍາຮ້ອງຂໍຄວາມເປັນທໍາ ແລະ ບັນຫາຕ່າງໆ ທີ່ຕິດພັນກັບຜົນປະໂຫຍດ ຂອງປະຊາຊົນ ເປັນເຈົ້າການໃນການຕິດຕາມກວດກາການຈັດຕັ້ງປະຕິບັດໜ້າທີ່ວຽກງານ ລະບົບອໍານາດລັດທີ່ຕິດພັນກັບວຽກງານກວດສອບ, ກວດກາ ບັນຫາສໍາຄັນຕ້ອງໄດ້ຊຸກຍູ້, ກະຕຸ້ນການແກ້ໄຂຜົນຂອງການກວດສອບ ແລະ ຜົນຂອງການກວດກາໃຫ້ໄວ ແລະ ເຂັ້ມງວດ.

ພາບ ແລະ ຂ່າວໂດຍ ນັັກຂ່າວ ສພຂ ຫົວພັນ.