ຕອນເຊົ້າວັນທີ 15 ກຸມພາ 2024 ສະພາປະຊາຊົນແຂວງ ຫລວງນ້ໍາທາ ໄດ້ເປີດກອງປະຊຸມສະຫລຸບຕີລາຄາຖອດຖອນບົດຮຽນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ II ຂື້ນທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມມີຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຫົວໜ້າ, ຮອງຫົວໜ້າພະແນກການຂອງແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 38 ທ່ານ, ຍິງ 10 ທ່ານ
ກອງປະຊຸມໄດ້ຮັບຟັງບົດລາຍງານ ການສະຫລຸບຕີລາຄາກ່ຽວກັບການກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ II ແມ່ນໄດ້ມີການກະກຽມແຕ່ຫົວທີ ໂດຍຄະນະປະຈໍາສະພາປະຊາຊົນແຂວງ ໄດ້ມີການປະສານສົມທົບ, ມີຄວາມເປັນເອກະພາບສູງ ກັບອົງການປົກຄອງແຂວງ ແລະ ແບ່ງຄວາມຮັບຜິດຊອບໃຫ້ແຕ່ລະພາກສ່ວນ ໂດຍໄດ້ຈັດກອງປະຊຸມຄະນະປະຈໍາສະພາປະຊາຊົນແຂວງ ແລະ ກອງປະຊຸມຮ່ວມກັບອົງການປົກຄອງແຂວງເພື່ອເອກະພາບທາງດ້ານເນື້ອໃນ ທີ່ຈະນໍາເຂົ້າພິຈາລະນາ, ຮັບຮອງເອົາໃນກອງປະຊຸມ;ຄະນະປະຈໍາສະພາປະຊາຊົນແຂວງ ມີແຜນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຫຼວງນໍ້າທາ ຊຸດທີ II;ອອກຂໍ້ຕົກລົງຂອງຄະນະປະຈໍາສະພາປະຊາຊົນແຂວງ ວ່າດ້ວຍ ແຕ່ງຕັ້ງຄະນະຮັບຜິດຊອບ ກະກຽມ ແລະ ດໍາເນີນກອງປະຊຸມ; ແຕ່ງຕັ້ງກອງເລຂານຸການກອງປະຊຸມ ຊຶ່ງໄດ້ກໍານົດສິດ, ໜ້າທີ່ ແລະ ແບ່ງຄວາມຮັບຜິດຊອບ ໃຫ້ແຕ່ລະພາກສ່ວນຢ່າງລະອຽດຈະແຈ້ງ;ອອກມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍ ການດໍາເນີນກອງປະຊຸມ ສະໄໝສາມັນເທື່ອທີ 6 ຂອງສະພາປະຊາຊົນແຂວງຫຼວງນໍ້າທາ ຊຸດທີ II;ໄດ້ອອກຂໍ້ຕົກລົງຂອງຄະນະເລຂາທິການສະພາປະຊາຊົນແຂວງວ່າດ້ວຍ ການແຕ່ງຕັ້ງພະນັກງານຊ່ວຍວຽກ ແຕ່ລະອະນຸກໍາມະການ;ອອກແຈ້ງເຊີນ, ກໍານົດເປົ້າໝາຍເຂົ້າຮ່ວມກອງປະຊຸມ; ບົດກ່າວເປີດ-ປິດກອງປະຊຸມ; ແຜນບັນຊາກອງປະຊຸມ. ພ້ອມກັນນີ້ ໄດ້ເອົາໃຈໃສ່ກະກຽມວຽກງານບໍລິຫານ-ພິທີການ ແລະ ການເງິນ ເປັນຕົ້ນແມ່ນການຂຶ້ນແຜນງົບປະມານຮັບໃຊ້ກອງປະຊຸມທັນຕາມກໍານົດເວລາ, ການປະດັບປະດາຫ້ອງປະຊຸມ ໃຫ້ມີຄວາມສະອາດສວຍງາມ, ຈັດບ່ອນນັ່ງຂອງຜູ້ແທນ, ຕ້ອນຮັບແຂກ, ລົງທະບຽນ, ບ່ອນຈອດລົດ, ກະກຽມບັດຕິດເສື້ອຜູ້ແທນກອງປະຊຸມ, ຈັດຕັ້ງການໂຄສະນາ, ການສໍາພາດຂ່າວ, ການຖະແຫຼງຂ່າວກ່ອນ ແລະ ຫຼັງການດໍາເນີນກອງປະຊຸມ ແລະ ໄດ້ກະກຽມວຽກງານອື່ນທີ່ປິ່ນອ້ອມ ສໍາເລັດຕາມຄາດໝາຍ ແລະ ທັນຕາມກໍານົດເວລາ;ກ່ອນການດໍາເນີນກອງປະຊຸມສະພາປະຊາຊົນແຂວງ ໄດ້ດໍາເນີນກອງປະຊຸມປະຖົມນິເທດ ເພື່ອແຈ້ງວາລະ, ລະບຽບການດໍາເນີນກອງປະຊຸມ ແລະ ທົດລອງລະບົບການລົງຄະແນນສຽງໃນຮູບແບບອອນລາຍ; ມີການຕິດຕາມ, ລາຍງານຄວາມຄືບໜ້າໃນການກະກຽມຄວາມພ້ອມ ຂອງແຕ່ລະພາກສ່ວນໃຫ້ຄະ ນະປະຈໍາສະພາປະຊາຊົນແຂວງຮັບຊາບແຕ່ໄລຍະ ຊຶ່ງສາມາດດໍາເນີນກອງປະຊຸມໄດ້ຕາມແຜນການທີ່ວາງໄວ້ ແລະ ໄດ້ຮັບຜົນສໍາເລັດຕາມຄາດໝາຍ;ພາກສ່ວນຕ່າງໆທີ່ກ່ຽວຂ້ອງຈາກພາຍນອກ ໄດ້ເອົາໃຈໃສ່ກະກຽມວຽກງານທີ່ຢູ່ໃນຄວາມຮັບຜິດ ຊອບຂອງຕົນ ໃຫ້ມີຄວາມຮັບປະກັນໃຫ້ນໍາໃຊ້ໄດ້ຢ່າງເປັນປົກກະຕິ.
ໃນກອງປະຊຸມບັນດາທ່ານຜູ້ແທນກອງປະຊຸມໄດ້ພ້ອມກັນປຶກສາຫາລື, ແລກປ່ຽນຄໍາເຫັນຕໍ່ບັນດາເນື້ອໃນສໍາຄັນ ເພື່ອຊອກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ໃນການກະກຽມ ແລະ ດໍາເນີນກອງປະຊຸມຂອງສະພາປະຊາຊົນແຂວງ ພ້ອມທັງສະເໜີວິທີປັບປຸງແກ້ໄຂໃນຕໍ່ໜ້າ ເປັນຕົ້ນແມ່ນການຕອບຄໍາຊັກຖາມຂອງຜູ້ແທນກອງປະຊຸມຕ້ອງຈະແຈ້ງຮັດກຸມກວ່າເກົ່າ, ສະເໜີໃຫ້ຂະແໜງການທີ່ກ່ຽວຂ້ອງຂຶ້ນຊີ້ແຈງໂດຍກົງ, ການນຳເອົາມະຕິຂອງກອງປະຊຸມໄປຈັດຕັ້ງປະຕິບັດ, ຕິດຕາມກວດກາ ແລະ ແກ້ໄຂຕົວຈິງຕ້ອງຊັດເຈນໃຫ້ເຫັນເປັນຮູບປະທຳ, ການສ້າງມະຕິຂອງກອງປະຊຸມໃຫ້ຮັດກຸມຂຶ້ນກວ່າເກົ່າ, ການປະກອບຄຳເຫັນຂອງຜູ້ແທນກອງປະຊຸມຕ້ອງຈະແຈ້ງ, ເນື້ອໃນໃຈຄວາມຮັດກຸມຊັດເຈນຂຶ້ນກວ່າເກົ່າ ທັງນີ້ກໍເພື່ອເປັນການຖອດຖອນບົດຮຽນ ເຮັດໃຫ້ການກະກຽມ ແລະ ດຳເນີນກອງປະຊຸມສະໄໝສາມັນ ຂອງສະພາປະຊາຊົນແຂວງ ຄັ້ງຕໍ່ໄປໃຫ້ມີເນື້ອໃນຖືກຕ້ອງຄົບຖ້ວນ, ວ່ອງໄວທວງທັນກັບເວລາ.
ຕອນທ້າຍ ປະທານກອງປະຊຸມໄດ້ເນັ້ນໜັກໃຫ້ແຕ່ລະພາກສ່ວນ ທີ່ມີເນື້ອໃນທີ່ໄດ້ຮັບຮອງເອົາໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ II ຮີບຮ້ອນປັບປຸງເນື້ອໃນບົດສະຫຼຸບ-ລາຍງານ, ບັນດາມະຕິກອງປະຊຸມ ຕາມຂອບເຂດຄວາມຮັບຜິດຊອບຂອງຕົນ ໃຫ້ມີຄວາມໜັກແໜ້ນ, ສົມບູນ ເພື່ອລົງລາຍເຊັນໃຫ້ສໍາເລັດ. ຕໍ່ກັບການກະກຽມໃຫ້ແກ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ທີ່ຈະຈັດຂຶ້ນໃນກາງປີ 2024 ນັ້ນ ໃຫ້ແຕ່ລະພາກສ່ວນ ເອົາໃຈໃສ່ກະກຽມເນື້ອໃນທີ່ຕົນຮັບຜິດຊອບແຕ່ຫົວທີ ຕາມທີ່ກໍານົດໄວ້ໃນກົດໝາຍວ່າດ້ວຍ ການປັບປຸງບາງມາດຕາຂອງກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ ໂດຍສະເພາະວຽກງານການສ້າງ ແລະ ປັບປຸງນິຕິກໍາໃຕ້ກົດໝາຍ, ແຜນພັດທະນະເສດຖະກິດ-ສັງຄົມ, ແຜນງົບປະມານແຫ່ງລັດ, ແລະ ວຽກງານຂອງສະພາປະຊາຊົນແຂວງ ໃຫ້ສໍາເລັດທັນເວລາ.