ວັນທີ 19 ມັງກອນ 2024 ນີ້, ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມ ສ້າງຄວາມເຂັ້ມແຂງໃຫ້ພະນັກງານ ສະພາປະຊາຊົນແຂວງ ຢູ່ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງ ທ່ານ ຄຳຟອງ ກົ້ວມີໄຊ ກຳມະການຄະນະປະຈຳ, ເລຂາທິການສະພາປະຊາຊົນແຂວງຫົວພັນ, ມີບັນດາທ່ານ ຮອງເລຂາທິການ, ຫົວໜ້າ, ຮອງຫົວໜ້າຂະແໜງ ຕະຫລອດຮອດພະນັກງານວິຊາການສະພາປະຊາຊົນແຂວງ ເຂົ້າຮ່ວມ.

          ກອງປະຊຸມ ໄດ້ຮັບຟັງການສະເໜີ ບົດຮຽນ, ຂັ້ນຕອນ, ວິທີການ ແລະ ຮູບແບບການຂຽນບົດໂອ້ລົມ ໃຫ້ແກ່ການນຳ ຈາກ ທ່ານ ເລຂາທິການ ສະພາປະຊາຊົນແຂວງ ເຊິ່ງທ່ານໄດ້ອະທິບາຍ ແຕ່ລະຂັ້ນຕອນ ແລະ ຍົກເອົາບົດໂອ້ລົມ ຂອງການນຳຂັ້ນສູງ ມາເປັນແບບຢ່າງ ເພື່ອເຮັດໃຫ້ພະນັກງານ ມີຄວາມຮັບຮູ້, ເຂົ້າໃຈ ຢ່າງເລິກເຊິ່ງ ທັງເປັນການຍົກລະດັບຄວາມຮູ້, ຄວາມສາມາດ, ໃນການເປັນເສນາທິການດ້ານເນື້ອໃນ ໃຫ້ແກ່ການນນຳ ນັບມື້ດີຂຶ້ນ.

          ຈາກນັ້ນ , ຜູ້ເຂົ້າຮ່ວມກອງປະຊຸມກໍໄດ້ພ້ອມກັນ ປະກອບຄຳຄິດຄຳເຫັນ ແລກປ່ຽນບົດຮຽນເຊິ່ງກັນ ແລະ ກັນ ໃນການປະຕິບັດຕົວຈິງໃນໄລຍະຜ່ານມາ ທຽບໃສ່ບົດຮຽນ ເພື່ອເປັນການຖອດຖອນບົດຮຽນ ສາມາດນຳໄປຈັດຕັ້ງປະຕິບັດໃນຕໍ່ໜ້າໃຫ້ມີຜົນສຳເລັດ.

ຕອນທ້າຍ ປະທານກອງປະຊຸມ ຍັງໄດ້ຮຽກຮ້ອງມາຍັງພະນັກງານ-ລັດຖະກອນ ທີ່ເປັນເສນາທິການໃຫ້ແກ່ການນຳ ສະພາປະຊາຊົນແຂວງ ຈົ່ງນຳເອົາເນື້ອໃນ, ວິທີການຂຽນບົດດັ່ງກ່າວ ນຳໄປສຶກສາ, ຄົ້ນຄວ້າ, ວິໄຈຄືນ ໃຫ້ມີຄວາມຮັບຮູ້, ເຂົ້າໃຈ ແລະ ກຳແໜ້ນຢ່າງເລິກເຊິ່ງ ສາມາດນຳໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານໃຫ້ມີປະສິດທິຜົນສູງຂຶ້ນ.

ພາບ ແລະ ຂ່າວໂດຍ ນ. ປຸ້ຍນິຕາ ເພັງມີໄຊ.