(ສພຂ) ໃນລະຫວ່າງວັນທີ 23-24 ພຶດສະພາ 2022 ນີ້, ສະພາປະຊາຊົນແຂວງສາລະວັນ ສືບຕໍ່ເຄື່ອນໄຫວ ຊຸກຍູ້ ແລະຕິດຕາມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 6 ເດືອນຕົ້ນ ແລະ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ກ່ຽວກັບການແກ້ໄຂບັນຫາຢາເສບຕິດ ຢູ່ 4 ເມືອງຂອງແຂວງ ໂດຍແບ່ງ ອອກເປັນ 2 ທິມງາມການເຄື່ອນໄຫວ; ທີ່ເມືອງເລົ່າງາມ, ເມືອງວາປີ ນໍາໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ພ້ອມດ້ວຍ ສະມາຊິກສະພາປະຊາຊົນແຂວງ, ຄະນະເລຂາທິການສພຂ, ມີຕາງໜ້າຈາກພະແນກການທີ່ກ່ຽວຂ້ອງ; ສ່ວນເມືອງລະຄອນເພັງ, ເມືອງຄົງເຊໂດນ ນໍາໂດຍ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານສພຂ ພ້ອມດ້ວຍ ສະມາຊິກສະພາປະຊາຊົນແຂວງ, ຄະນະເລຂາທິການສພຂ, ມີຕາງໜ້າຈາກພະແນກການທີ່ກ່ຽວຂ້ອງ; ໂດຍການຕ້ອນຮັບ ແລະເຮັດວຽກຮ່ວມກັບ ທ່ານເລຂາພັກເຈົ້າເມືອງ, ຄະນະປະຈຳພັກເມືອງ ກໍາມະການພັກເມືອງ, ອົງການປົກຄອງເມືອງ ເຂົ້າຮ່ວມ.
ການເຄື່ອນໄຫວໃນແຕ່ລະເມືອງ ບັນດາທ່ານເລຂາພັກເຈົ້າເມືອງ ໄດ້ລາຍງານຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນ ແລະ ທິດທາງແຜນການ 6 ເດືອນທ້າຍປີ 2022 ຂອງເມືອງ ແລະ ຜົນຂອງການຈັດຕັ້ງຜັນຂະຫຍາຍສອງວາລະແຫ່ງຊາດ ໂດຍຫຍໍ້; ຟັງການປະກອບຄໍາເຫັນ ບາງບັນຫາທີ່ພົ້ນເດັ່ນທີ່ເກີດຂຶ້ນ ເປັນຕົ້ນ ບັນຫາການຂາດແຄນນໍ້າມັນເຊື້ອໄຟ, ການຂາຍນໍ້າມັນເຊື້ອໄຟ ທີ່ບໍ່ຖືກຕ້ອງຕາມລະບຽບການ, ການແກ້ໄຂບັນຫາປະກົດການຫຍໍ້ທໍ້ ທີ່ຍັງບໍທັນເຮັດໄດ້ດີເທົ່າທີ່ຄວນ; ພ້ອມນັ້ນກໍ່ໄດ້ຮັບຟັງການຊີ້ແຈ້ງ ທັງລາຍງານ ຈາກຕາງໜ້າຫ້ອງການເມືອງ ແລະ ພະແນກການທີ່ກ່ຽວຂ້ອງຕາມຂົງເຂດຄວາມຮັບຜິດຊອບ.
ພ້ອມນັ້ນ, ການນໍາສະພາປະຊາຊົນແຂວງ ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາເມືອງ ທີ່ມີຜົນງານພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາ ທັງເນັ້ນໃຫ້ແຕ່ລະເມືອງ ເອົາໃຈໃສ່ບາງບັນຫາດັ່ງນີ້: ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກໍຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຊັ່ນ: ການຈັດເກັບລາຍຮັບເຂົ້າງົບປະມານໃຫ້ບັນລຸ, ຊຸກຍູ້ການປູກຝັງ-ລ້ຽງ ສັດ, ການຜະລິດສິນຄ້າທີ່ມີຫນໍ່ແໜງໃຫ້ເປັນທ່າແຮງຂອງເມືອງ, ສົ່ງເສີມ ໃຫ້ປະຊາຊົນຜະລິດໃຫ້ຫຼາຍເພື່ອທົດແທນການນຳເຂົ້າ, ກໍານົດຈຸດຂາຍທີ່ໝັ້ນຄົງຖາວອນ ເພື່ອຂາຍຜົນຜະລິດຂອງຕົນ, ຄຸ້ມຄອງລາຄາສິນຄ້າ ໃຫ້ຢູ່ໃນເກນມາດຕະຖານຕາມທ້ອງຕະຫຼາດ, ຂະແໜງການທີ່ກຽວຂ້ອງນໍາພາ-ຊີ້ນໍາໃຫ້ເອົາໃຈໃສ່ການຜະລິດ ໃຫ້ສໍາເລັດຕາມແຜນ ການທີ່ວາງໄວ້ທັງປະລິມານ ແລະຄຸນນະພາບທີ່ດີລື່ນເກົ່າ ເພື່ອຄໍ້າປະກັນທາງດ້ານສະບຽງອາຫານ ໃຫ້ຍືນຍົງ ແລະໝັ້ນຄົງ; ສຳລັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ແຕ່ລະພາກສ່ວນຂັ້ນເມືອງຂັ້ນບ້ານ ສືບຕໍ່ໂຄສະນາເຜີຍແຜ່ລະບຽບກົດໝາຍ ແລະ ນິຕິກຳຕ່າງໆທີ່ກ່ຽວຂ້ອງດ້ວຍຫຼາຍວິທີການ ທັງປຸກລະດົມຂົນຂວາຍມວນຊົນ ໃຫ້ຮັບຮູ້ເຂົ້າໃຈຕໍ່ຜົນຮ້າຍ ແລະ ເອົາຕົວອອກຫ່າງຈາກຢາເສບຕິດ; ສຸມໃສ່ວຽກງານສຶກສາອົບຮົມ ເກັບກຳສະຖະຕິເປົ້າໝາຍເສບ ແລະ ເດັດຂາດຕໍ່ຜູ້ຄ້າຂາຍຢາເສບຕິດ; ປະສານສົມທົບກັບທຸກພາກສ່ວນທີ່ກ່ຽວຂ້ອງປຶກສາຫາລືກ່ຽວກັບການແກ້ໄຂບັນຫາຢາເສບຕິດໃຫ້ເປັນປະຈຳ, ປົກກະຕິ ແລະ ຕໍ່ເນື່ອງ ເພື່ອເຮັດການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄດ້ຮັບຜົນດີກວ່າໄລຍະຜ່ານມາ.
ນອກຈາກນີ້ ຄະນະ ໄດ້ລົງຊຸກຍູ້, ຕິດຕາມການຜະລິດ ເປັນສິນຄ້າ ຂອງປະຊາຊາຊົນ ໂດຍສະເພາະແມ່ນການລ້ຽງໝູ, ການລ້ຽງເປັດ-ໄກ່, ການລ້ຽງປາ ທີ່ສາມາດສ້າງລາຍຮັບໃຫ້ແກ່ຄອບຄົວຫຼາຍພໍສົມຄວນ.
ການເຄື່ອນໄຫວຄັ້ງນີ້ ເພື່ອເປັນການຈັດຕັ້ງປະຕິບັດ ກົດໝາຍ ວ່າດ້ວຍການຕິດຕາມກວດກາ ຂອງ ສພຊ ແລະ ສພຂ, ເປັນການເກັບກຳຂໍ້ມູນຮອງຮັບໃຫ້ແກ່ ສະມາຊິກສະພາແຫ່ງຊາດ ເຂດ 14 ໃນການກະກຽມເຂົ້າຮ່ວມກອງປະຊຸມສະໄໝສາມັນເທື່ອທີ 3 ຂອງ ສພຊ ຊຸດທີ IX ທີ່ຈະເປີດໃນລະຫວ່າງກາງເດືອນມິຖຸນາທີ່ຈະມາເຖິງນີ້.
(ໂດຍ ນາງ ຄັດສອນ ຮຸ່ງສະຫວ່າງ)