ວັນທີ 17 ມີນາ 2024 ຜ່ານມານີ້, ທ່ານ ສົມມາດ ພົລເສນາ ກຳມະການສູນການພັກ, ຮອງປະທານສະພາແຫ່ງຊາດ ແລະ ທ່ານນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ, ປະທານສະພາປະຊາຊົນ ແຂວງຫົວພັນ ພ້ອມດ້ວຍທີມງານ ໄດ້ນຳເອົາໄຟຟ້າໂຊລາເຊວ ຈຳນວນ 1 ຊຸດ ມູນຄ່າ 25.000.000 ກີບ ມອບໃຫ້ເຂດພາລາທິການ ຫ້ວຍສີມ ກອງບັນຊາການທະຫານ ເມືອງຊຳເໜືອ ກ່າວຮັບໂດຍ ທ່ານ ພັທ ແສງເພັດ ອ້ວນສະຫວັນ ຫົວໜ້າການເມືອງກອງບັນຊາການທະຫານ ເມືອງຊຳເໜືອ ເພື່ອປະກອບສ່ວນເຂົ້າໃນການບໍລິຫານວຽກງານພາຍໃນເຂດພາລາທິການກໍຄືການປົກປັກຮັກສາ, ເວນຍາມ, ສັງເກດການ ໃນຂອບເຂດພາລາທິການໃຫ້ມີຄວາມຮັບປະກັນດ້ານວິຊາສະເພາະຕາມການຈັດຕັ້ງຂັ້ນເທີງມອບໝາຍ ພ້ອມນີ້ ທ່ານຍັງສະແດງຄວາມຂອບໃຈ ມາຍັງທີມງານຂອງສະພາແຫ່ງຊາດ ກໍຄືສະພາປະຊາຊົນ ແຂວງຫົວພັນ ທີ່ຍາມໃດກໍ່ໃຫ້ຄວາມເປັນຫ່ວງເປັນໃຍ ນຳພໍ່ແມ່ປະຊາຊົນ ກໍ່ຄື ພະນັກງານນັກຮົບ ທີ່ເຮັດໜ້າທີ່ປ້ອງກັນເວນຍາມ, ທຳການຜະລິດ, ເຮັດໜ້າທີ່ເປັນຮົ້ວປ້ອງກັນຊາດ ຮັບໃຊ້ຊາດ ຮັບໃຊ້ປະຊາຊົນ ແລະ ທ່ານ ຍັງໄດ້ໃຫ້ຄຳໝັ້ນສັນຍາ ວ່າຈະນຳໃຊ້ເຄື່ອງດັ່ງກ່າວເຂົ້າໃນວຽກງານໃຫ້ເກີດໂຫຍດສູງສຸດ.

                                                                                                                                                                                             ພາບ ແລະ ຂ່າວ: ສພຂ ຫົວພັນ