ກອງປະຊຸມ ຝຶກອົບຮົມສ້າງຄວາມເຂັ້ມແຂງ ໃຫ້ແກ່ພະນັກງານ-ລັດຖະກອນ ສະພາປະຊາຊົນ ແຂວງຫົວພັນ ໄດ້ຈັດຂຶ້ນໃນວັນທີ 30  ສິງຫາ 2024 ນີ້, ທີ່ຫ້ອງປະຊຸມ ສະພາປະຊາຊົນແຂວງ ພາຍໃຕ້ການເປັນປະທານ ຂອງທ່ານ ຄຳຟອງ ກົ້ວມີໄຊ ຮອງປະທານສະພາປະຊາຊົນແຂວງ ມີບັນດາທ່ານຄະນະປະຈຳ, ຮອງເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານ-ລັດຖະກອນ ພາຍໃນ ສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ການຝຶກອົບຮົມໃນຄັ້ງນີ້, ບັນດາທ່ານ ນັກສຳມະນາກອນ ໄດ້ຮັບຟັງການບັນຍາຍ ດ້ານທິດສະດີ ຈາກວິທະຍາກອນຂອງ ສະພາປະຊາຊົນແຂວງ ຈຳນວນ 04 ບົດຄື: ບົດບາດຂອງການເປັນນັກວິທະຍາກອນ; ບົດບາດວິທະຍາກອນ ແລະ ຫຼັກການເວົ້າ; ວິທີການສ້າງບົດຄະນະຈັດຕັ້ງພິທີຕ່າງໆ ແລະ ບົດຮຽນການສ້າງຄຳຖາມເຈາະຈີ້ມໃຫ້ປະທານ ພ້ອມທັງ ຍົກບາງຕົວຢ່າງ ແລະ ພຶດຕິກຳຕົວຈິງ ມາສົມທຽບກັບຫົວຂໍ້ຕ່າງໆ ເພື່ອເຮັດໃຫ້ບັນດາທ່ານທີ່ເຂົ້າຮ່ວມຝຶກອົບຮົມ ຮັບຮູ້ ເຂົ້າໃຈຢ່າງເລິກເຊິ່ງ ສາມາດປະຕິບັດພາລະບົດບາດການເປັນເສນາທິການໃຫ້ແກ່ຄະນະນຳຂອງຕົນແລະ ໝູນໃຊ້ເຂົ້າໃນວຽກງານ ໃຫ້ເກີດຜົນປະໂຫຍດສູງສຸດ.

ພາບ ແລະ ຂ່າວ: ນັກຂ່າວ ສພຂ.ຫພ